„კოტე შარაშენიძე, ერთპიროვნულ გადაწყვეტილებებს იღებდა წინასაარჩევნო პერიოდში, ის ამას აკეთებდა კოალიციის წევრებთან შეუთანხმებლად… კითხვის ნიშნის ქვეშ დგას ამ ადამიანის ქმედებანი წინასაარჩევნო პერიოდში,“ _ განაცხადა ბესო მელუამ არჩევნების შემდეგ .
მისივე თქმით, კოტე შარაშენიძე, 6 აგვისტოს, ბახმაროში გაგა მკურნალიძეს შეხვდა:
_ გახსოვთ ალბათ ის შემზარავი კადრები, რაც მთელმა ქვეყანამ და არა მარტო საქართველომ იხილა. პატიმართა წამების კადრები, რომელმაც უემოციოდ არავინ დატოვა. ერთ-ერთი მათგანი, ჩვენ ყველამ ვიცით, რომელიც ამ სიბინძურეში მონაწილეობდა, გაგა მკურნალიძეა. პიროვნება, რომელსაც 5 აგვისტოს, დაძაბულ წინასაარჩევნო პერიოდში ხვდება ბატონი შარაშენიძე კურორტ ბახმაროში. რაზე ისაუბრეს, ეს უკვე ჩემთვის არ არის ცნობილი, მხოლოდ ის გვითხრა შარაშენიძემ, რომ მასთან მეგობრული ურთიერთობა აქვს, _ განაცხადა ბესო მელუამ.
მისივე თქმით, კოალიციაში ჯერჯერობით არ არის დაწყებული საუბარი თანამდებობრივ საკითხებთან დაკავშირებით და ელოდებიან პროცესების განვითარებას.
მელუას განცხადებებს აბსურდს უწოდებს კოტე შარაშენიძე და ის ამბობს, რომ ერთპიროვნულ გადაწყვეტილებებს არც წინასაარჩევნოდ იღებდა და არც ახლა:
_ არანაირი ერთპიროვნული გადაწყვეტილებები. ჩვენთან იყო ერთიანი გუნდური პრინციპი და ისე ვმოქმედებდით. ძალიან ძნელია ბესო მელუას ბოდვებზე განცხადებების გაკეთება. რაც შეეხება გაგა მკურნალიძის საკითხს, მე და გაგა ბახმაროში ვართ მეზობლები და ეს წლების განმავლობაში ასე მოდიოდა. 5 აგვისტოს ვიყავი ბახმაროში, ჩემი ოჯახი ვნახე და ისიც იქ იყო, მეტი არაფერი არ მომხდარა, _ განაცხადა კოტე შარაშენიძემ.
„ქართული ოცნების“ კიდევ ერთი წევრი, თემურ სალუქვაძე, რომელსაც, როგორც ამბობენ, სამომავლოდ საკრებულოს თავმჯდომარედ მოიაზრებენ, ჩვენთან სატელეფონოს საუბარში ამბობს, რომ რაც ხდება ახლა ოზურგეთში, ნაადრევია:
_ მე ვარ პოლიტიკაში და ვრჩები პოლიტიკაში. დღეისთვის, ვინ რა თანამდებობას დაიკავებს რეგიონებში, ამაზე საუბარი ნაადრევია. მე, ამ ბრძოლაში თანამდებობის გამო არ ჩავრთულვარ.
_ კოტე შარაშენიძეს და თქვენ შორის რა დამოკიდებულებაა, ამბობენ, რომ თქვენი მისი კანდიდატურის წინააღმდეგი ხართ.
_ მასთან ჩვეულებრივი, ნორმალური დამოკიდებულება მაქვს და არანაირი პრობლემა არ გამაჩნია მასთან დაკავშირებით.
_ ბატონო თემურ, დაუჭერთ მხარს გამგებლის პოსტზე კოტე შარაშენიძის კანდიდატურას?
_ ასე მარტივად ეს არ ხდება, ვიღაცას სურვილი ჰქონდეს, ეს პროცესი ჯერ დაწყებული არ არის. რეგიონულ დონეზე იქნება კონსულტაციები და ამის შემდეგ გახდება ცნობილი ყველაფერი. ძალიან ბევრი საქმე არის გასაკეთებელი და ამ საქმეს უნდა ჩაუდგეს პროფესიონალები და წესიერი ადამიანები. ჩვენი კოალიცია, როგორც დაპირდა ხალხს, ყველაფერი ისე იქნება, _ განაცხადა თემურ სალუქვაძემ.
„ქართული ოცნების“ოზურგეთის მაჟორიტარი დეპუტატი ზვიად კვაჭანტირაძე „გურია ნიუსთან“ საუბარში აცხადებს, რომ ნებისმიერ ადამიანს, მათ შორის კოალიციიდან, აქვს იმის უფლება, ჰქონდეს პრენტეზია ნებისმიერ თანამდებობაზე აღმასრულებელ რგოლში.
_ კოტე შარაშენიძესა და ბესო მელუას შორის თუ რამე გაუგებრობა არსებობს, შესაბამისად ერთმანეთში უნდა გაარკვიონ ჯერ და მერე უნდა ილაპარაკონ საჯაროდ და თუ ვერ გაარკვიენ, მაშინ თვითონ გადაწყვიტონ, როგორ უნდა ამ პრობლემის მოგვარება. რაც შეეხება ამ შეხვედრებს, საუბარი მაქვს კოტე შარაშენიძისა და გაგა მკურნალიძის შეხვედრას, ჩვენ ამის საქმის კურსში ვიყავით. ეს არავისთვის დამალული არ ყოფილა და ვის რა შეკითხვები უჩნდება ჩემთვის ამ ეტაპზე მნიშვნელობა არ აქვს. კოტე შარაშენიძეს შემთხვევით შეხვდა გაგა მკურნალიძე ბახმაროში და ის მისი ბავშვობის მეგობარია, მჯერა კოტეს სიტყვების და იქ მარტო კოტე არ იყო. კოტემ ამის შესახებ შტაბში ისაუბრა კიდევაც. ჩვენ არცერთ შემთხვევაში არ ვერევით ამ ეტაპზე არანაირ პროცესებში, რაც შეეხება აღმასრულებელ ხელისუფლებას. მითუმეტეს, ჯერ ქვეყნის დონეზე არ არის ხელისუფლება გადმობარებული. მე მგონი, ძალიან ნაადრევად არის დაწყებული, ასე ვთქვათ, ინტერესების გამოხატვა _ განაცხადა ზვიად კვაჭანტირაძემ.
რაც შეეხება კოტე შარაშენიძეს, „გურია ნიუსის“ ინფორმაციით, მას რეკომენდაცია ბიძინა ივანიშვილთან, მისმა ძმამ, ადიკო ივანიშვილმა გაუწია. მაშინ, „გურია ნიუსთან“ ინტერვიუში ადიკო ივანიშვილმა ასეთი კომენტარი გააკეთა:
_ ბატონო ადიკო, “ქართული ოცნების” ოფისის ხელმძღვანელად ოზურგეთში კოტე შარაშენიძე დაინიშნა. ალბათ, გაქვთ ამის შესახებ ინფორმაცია.
_ უხ, თქვენ გენაცვალეთ.
_ ასე გაგიხარდათ?
_ მადლობელი ვარ. გამიხარდა კი არა, ძალიან მაგრად გამიხარდა.
_ მართალია, რომ შარაშენიძე თქვენი კადრი იყო?
_ მარტო ჩემი კადრი კი არა, გურულების კადრი იყო.
_ რით არის კოტე შარაშენიძე გამორჩეული?
_ რომ ნახოთ ეგ ბიჭი, შეგიყვარდებათ.
_ საკმაოდ კარგად ვიცნობთ, მაგრამ თქვენი აზრი გვაინტერესებს. რითი გამოარჩიეთ?
_ იმით, რომ ბიჭი ჩამოყალიბებულია და ხედავს ცხოვრებას.
_ თუმცა, ამბობენ რომ ხელისუფლებასთან და ზოგიერთ მაღალჩინოსანთან მეგობრობს…
_ არა. კარგით რა.
_ ეს მხოლოდ ჭორებია?
_ გამორიცხულია.
