_ ასეთია ზურაბ არსოშვილის “თელასში” ოთხთვიანი “მოღვაწეობის” შედეგი. ყოფილი თანამშრომლები “გურია ნიუსთან” საუბარში ამბობენ, რომ გათავისუფლებული პროფესიონალების ნაცვლად, ინიშნებოდნენ პოლიციის თანამშრომლები, ზურაბ არსოშვილის ახლობლები და მეგობრები. “გურია ნიუსის” ინფორმაციით, კომერციულ დირექტორს, ამ ეტაპზეც რამდენიმე ათეული უთარიღო განცხადება უდევს დარჩენილი თანამშრომლების დასაშანტაჟებლად.
ამ ყველაფერს “გურია ნიუსთან” თელასის გათავისუფლებული თანამშრომლები ყვებიან, რომლებიც გაჩუმებას არ აპირებენ და სამართლებრივ ბრძოლას იწყებენ. ისინი, ხვალ 12:00 საათზე “თელასის” ხელმძღვანელობას კიდევ ერთხელ მიმართავენ და მედიას “თელასში” არსებულ პრობლემებს გააცნობენ.
ვრცელ მასალას ჩვენ ცოტა მოგვიანებით შემოგთავაზებთ, მანამდე კი უცვლელად გთავაზობთ “თელასის” თანამშრომლების კოლექტიურ განცხადებას, რომლითაც “ქართული ოცნებისთვის” მიმართვას აპირებენ:
“მდგომარეობა გვაიძულებს მოგმართოთ თქვენ და გთხოვთ, დაგვიცვათ იმ უკანონობისგან, რაც ჩვენ შეგვემთხვა და გაგვიწიოთ დახმარება ჩვენი უფლებების დაცვაში. მოკლედ მოგახსენებთ საქმის არსს: ვმუშაობდით სს “თელასში” წლების მანძილზე, კეთილსინდისიერად და პატიოსნად. 2012 წლის 20 ივნისს, სს. “თელასში” შეიცვალა დირექცია, რომელიც გადმოვიდა საქართველოს ენერგეტიკის სამინისტროდან, რის შემდეგ დაიწყო თანამშრომლების უმიზეზოდ, ეტაპობრივი გათავისუფლება. კერძოდ, ზოგიერთ ბიზნეს-ცენტრების მენეჯერებს დაავალეს, რომ ყველა თანამშრომელს და მათ შორის თვითონაც დაეწერა განცხადება თარიღის დასმის გარეშე სამსახურიდან პირადი სურვილით გათავისუფლების თაობაზე ყოველგვარი ახსნა-განმარტებების გარეშე. იმ მიზეზის გამო, რომ ვიცოდით არსებული ხელისუფლების პირობებში კანონი არ დაგვიცავდა, ჩვენ იძულებულები გავხდით დაგვეწერა განცხადებები, რასაც რამდენიმე დღეში მოჰყვა ჩვენი გათავისუფლება. ჩვენს ადგილზე კი ეგრევე დანიშნეს პირები, რომლებსაც ენერგეტიკასთან არავითარი შეხება არ ჰქონიათ.
ზემოთ აღნიშნულიდან გამომდინარე, მიგვაჩნია, რომ ჩვენ გავხდით არსებული ხელისუფლების უკანონობის მსხვერპლნი, შეილახა ჩვენი უფლებები, დაგვტოვეს უმუშევრები. მსგავსს სიტუაციაში რამდენიმე ათეული თანამშრომელია. ამიტომ, გთხოვთ დახმარებას ჩვენს სამსახურში აღდგენასთან დაკავშირებით”.
