“გურია ნიუსის” ინფორმაციით, ამ ეტაპზე, ის ინტესივობით აღარ მიმდინარეობს სხვადასხვა პროექტის გახორციელების ინტენსივობამაც იკლო. მაგალითად, ოზურგეთის მუნიციპალიტეტის სოფელ შრომაში, წინასაარჩევნო პერიოდში გზის სარემონტო სამუშაოები ჩქარ ტემპში მიმდინარეობდა, თუმცა დღეს ასე აღარ არის.
როგორც სოფელ შრომის მცხოვრებლები გვეუბნებიან, სულ სამი კილომეტრზე დააგეს ასფალტი. სოფელში გზის სარეაბილიტაციო სამუშაოების შეჩერების მიზეზად მუშებისთვის ხელფასის გადაუხდელობა და ასფალტის მიწოდების შეწყვეტა სახელდება.
სარემონტო სამუშაოები 10 დღეზე მეტია რაც შეჩერდა. სოფლის რწმუნებული დათო ჯაბუა ამბობს, რომ რამდენიმე დღეა გურიაში ავდარია და სამუშაოებს ვერ გააგრძელებდნენ.
“მე როგორც ვიცი, ქარხანაში არის პრობლემა, საიდანაც ასფალტი მოჰქონდათ. მშენებლობის დროს მითხრეს, რომ ოთხ თვეში უნდა ჩაებერებინათ პროექტი, ამ ეტაპზე შეჩერებულია, მაგრამ მალე გაგრძელდება”, _ გვითხრა დათო ჯაბუამ.
ოზურგეთის მუნიციპალიტეტის გამგეობის პრესასთან და საზოგადოებასთან ურთიერთობის სამსახურის უფროსის, ნინო სალუქვაძის თქმით, შრომის გზის სარემონტო სამუშაოები 15-თვიანი პროექტია.
“როგორც მე გავარკვიე, სოფელ შრომაში ახლაც მიდის სამუშაოები და ეს არ არის ორთვიანი პროექტი. ეტაპობრივად ყველაფერი გაკეთდება,” _ ამბობს ჩვენთან სატელეფონო საუბარში ნინო სალუქვაძე.
გზების დეპარტამენტის თავმჯდომარემ, მამუკა ლეჟავამ შრომის გზის მშენებლობის დაწყების დროს გვითხრა, რომ გზის დაგება 2 წელიწადში დასრულდება, მაგრამ ეცდებიან, ეს სამუშაო ადრე დაასრულონ.
“გურია ნიუსს” სოფელ შრომაში მხოლოდ მიტოვებული ტექნიკა დახვდა.
“მშენებლობა სექტემბერში დაიწყეს; უცებ და იმავე დღეს პრეზიდენტიც გამოჩნდა, ვინც მოასწრო მასთან შეხვედრა კი მივიდა და ვინც გვიან გავიგეთ, ვერ მივუსწარით. კარგია, რომ გზა შენდება, მაგრამ არჩევნების შემდეგ გაჩერდა ეს მშენებლობა და იმედია, გაგრძელდება. ამბობენ, რომ ხელფასები ვერ აიღეს მუშებმა და პროტესტის ნიშნად დატოვეს მშენებლობა… არ ვიცი, ვერაფერს გეტყვით”, _ ამბობს ჩვენი რესპონდენტი ადგილობრივი მცხოვრები.
გზის მშენებლობას შპს “სანი” ახორციელებს, რომელიც გზის მშენებლობის ტენდერებში ხშირად იმარჯვებს; განსაკუთრებით რეგიონული განვითარების და ინფრასტრუქტურის სამინისტროს და საგზაო დეპარტამენტის ტენდერებში.
გზის მშენებლობაში რამდენიმე წუთით მიხეილ სააკაშვილმაც მიიღო მონაწილეობა, ის თავად მართავდა ბულდოზერს და 13 სექტემბერს განაცხადა: “აქ ძალიან მაგარი ხალხი ცხოვრობს!” არა მხოლოდ მშრომელი, არამედ ჭკვიანი, განსაკუთრებული, შეიძლება ხშირად ბევრად დაუმსახურებლად დაჩაგრული, მაგრამ ძალიან განსაკუთრებული ადამიანები ცხოვრობენ. თქვენ იცით, რომ ჩვენ ძალიან სერიოზულად მოვკიდეთ ხელი გურიის ინფრასტრუქტურას. აი, ახლა, გზად რომ მოვდიოდი, მე ჩემს თავს მივეცი რამდენიმე დავალება, რომ სკოლაა გასაკეთებელი ძალიან მაგრად, იმიტომ, რომ ეს ცნობილი სკოლაა, მეორე ის, რომ კლუბებია გასაკეთებელი კარგად.
გზა, რა თქმა უნდა, ძალიან მნიშვნელოვანია, მაგრამ მარტო გზა ყველაფერს ვერ წყვეტს, გზას ხომ აქვს ეკონომიკური მოძრაობა, დასაქმება, განვითარება, ასე ხდება ყველაფერი, ყველაფერს უნდა მიყვანა, იმდენი საქმე იყო თავიდან, საიდან უნდა დაგვეწყო არ ვიცოდით. ამიტომ, რა თქმა უნდა, მთავარია აქ დასაქმება. ამიტომ არის ოზურგეთში ძალიან მაგარი გადამზადების კოლეჯი და ჩვენ უზრუნველვყოფთ იმას, რომ ყველა ადამიანისთვის იყო ხელმისაწვდომი. პირველივე ერთ თვეში, 80% კურსდამთავრებულებს იღებს და შოულობს საკმაოდ მაღალანაზღაურებად სამუშაოებს, ესე იგი შესაძლებელია ამ ყველაფრის გაკეთება”, _ განაცხადა სექტემბერში, ბულდოზერის მართვისას მიხეილ სააკაშვილმა.
