“ყველაფერს გავაკეთებთ იმისთვის, რომ საქართველო საკუთარი ელექტროენერგიით იყოს უზრუნველყოფილი”

_ ბატონო კახი, რა არის თქვენთვის ის პრიორიტეტული საკითხი, რომელსაც ენერგეტიკის სამინისტროში მისვლისთანავე განახორციელებთ?

_ ჩვენი პრიორიტეტი იქნება, ჰესების მშენებლობა. ძალიან ბევრი კითხვა გაჩნდა დიდ ჰესებთან დაკავშირებით და გადაიხედება ყველა პროექტი. თუ გაგრძელდება ჰესების მშენებლობა, ეს უნდა მოხდეს გარემოს დაცვის სამინისტროსთან კონსულტაციების შემდეგ. ჩვენ არ გვინდა ერთი კარგი გაკეთებული საქმიდან მეორე დავაზიანოთ.

_ რა გველოდება 2012 წლის ზამთარში და არის თუ არა მზად თქვენი გუნდი პრობლემების მოსაგვარებლად?

_ საქართველოში, განსაკუთრებით ზამთრის პერიოდში, ელექტროენერგიის დიდი ნაწილის შემოტანა, ძირითადად რუსეთიდან ხორციელდება. ნოემბრიდან დაწყებული, ენერგეტიკის იმპორტირება რუსეთიდან ხდება. ჩვენ ყველაფერი უნდა გავაკეთოთ იმისთვის, რომ საქართველო უზრუნველყოფილი იყოს მთელი წლის განმავლობაში საკუთარი ელექტროენერგიით.

ჩვენ უკვე გამზადებული გვაქვს საბუთი, დავიმატოთ ელექტროენერგია რუსეთიდან. ზამთარში, როდესაც საქართველოს მასშტაბით სრული დატვირთვით მიმდინარეობს ელექტროენერგიის მოხმარება, ენგურჰესსზე წყლის ნაკლებობაა. აქედან გამომდინარე, იმისთვის რომ რომ დაცულები ვიყოთ, მოხდება რუსეთთან მოლაპარაკება, რათა გაფორმდეს ხელშეკრულება და ზამთრის პერიოდში არანაირი პრობლემა არ შეიქმნას. როგორც ენერგეტიკის სამინისტროში შეხვედრაზე მომახსენეს, ეს მარტო წელს არ ხდება, ასე იყო ყოველწლიურად.

_ გეგმავთ თუ არა საკადრო ცვლილებებს?

_ საკადრო ცვლილებებს რაც შეეხება, ის ადამიანები რომლებიც ღირსეულად ემსახურებოდნენ ქვეყანას, სამინისტროში გააგრძელებენ მუშაობას. ცვლილებები განხორციელდება მინისტრის და მისი მოადგილეების დონეზე. ძალიან მალე წარმოგიდგენთ იმ ადამიანებს, რომლებიც ჩემთან ერთად დაიწყებენ მუშაობას, არიან გამოცდილი სპეციალისტები და დარწმუნებული ვარ, ერთად გავამართლებთ იმ ნდობას, რომელიც ბატონმა ბიძინა ივანიშვილმა ჩვენს მიმართ გამოიჩინა.

_ ვიხილავთ თუ არა ენერგეტიკის სამინისტროში დავით მირცხულავას?

_ არა, დარწმუნებით შემიძლია გითხრათ, რომ დავით მირცხულავა სამინისტროში არ იქნება.