ვარლამ ხათრიძის თქმით, ეკატერინე ზღულაძის მიერ გაგზავნილი ჯგუფი, რომელიც სპეციალურად იქნა გაგზავნილი გურჯაანში საქმის გამოსაძიებლად, ცდილობდნენ, რომ დაზარალებულებსა და მოწმეებზე ზეწოლა მოეხდინათ, რაც გამოიხატებოდა მათი მხრიდან აგრესიაში, მუქარასა და მუშტების ბრახუნში.
_ ეს ადამიანები ბარბარეს დედას და დეიდას თავიანთ ურთიერთგამომრიცხავ ვერსიებს სთავაზობდნენ, _ აცხადებს “გურია ნიუთან” ვარლამ ხათრიძე.
კიდევ უფრო შოკისმომგვრელი აღმოჩნდა ადვოკატის მიერ მოწოდებული ინფორმაცია ექსპერტიზის დასკვნის შესახებ, რომლითაც ჩვილის სიკვდილის მიზეზები დგინდება.
_ ბავშვი ქვევრში ცოცხალია ჩაგდებული და ამის ვარაუდის საფუძველს გვაძლევს ექსპერტიზის დასკვნა. ჩვენ ვფიქრობდით, რომ ბავშვი შემთხვევით გაეგუდათ და შემდეგ გადამალეს, რაც უფრო შემამსუბუქებელი გარემოება იქნებოდა, თუ ამას შემამსუბუქებელი შეიძლება ერქვას. მაგრამ ექსპერტიზის დასკვნა, რომელსაც გავეცანი ნამდვილად შოკისმომგვრელია. მე ბევრი ექსპერტიზა მინახავს, ასობითაც კი და ზოგჯერ ექსპერტი წერს ცოტა გაურკვევლად, მაგრამ ამ შემთხვევაში, ყოველგვარი მოსაზრებებისა და ვარაუდების გარეშე აქვს ექსპერტს სიკვდილის მიზეზები დადგენილი.
სამხარაულის სახელობის ექსპერტიზის სასამართლო-სამედიცინი ბიუროს კახეთის სამედიცინო განყოფილების მიერ გაცემულ დასკვნაში ვკითხულობთ: „ბარბარე ლაფარიანცის სიკვდილის მიზეზი არის ასფიქსია სასუნთქ გზებში სითხის მოხვედრით“ _ აცხადებს ვარლამ ხათრიძე „გურია ნიუსთან“.
ეს დეტალები მას შემდეგ გახდა ცნობილი, რაც საქმეში ადვოკატები ვარლამ ხათრიძე და ლალი ბიწოშვილი ჩაერთნენ.
სწორედ ლალი ბიწოშვილის წერილობითი მოთხოვნის შემდეგ გასცა გურჯაანის რაიონული სამმართველოს უფროსის მოვალეობის შემსრულებელმა გ. საბაშვილმა იმ ადამიანების სია, რომლებიც ეკატერინე ზღულაძემ საქმის გამოსაძიებლად სპეციალურად მიავლინა გურჯაანში. საბაშვილის წერილს უცვლელად გთავაზობთ:
დაზარალებულის უფლებამონაცვლის, თათია მექერიშვილის ინტერესების დამცველ ადვოკატს, ქალბატონ ლალი ბიწოშვილს
თქვენი 2012 წლის 13 ოქტომბრის განცხადების პასუხად გაცნობებთ, რომ 2012 წლის 12 ოქტომბერს, შინაგან საქმეთა მინისტრის მოვალეობის შემსრულებლის, ქალბატონ ეკატერინე ზღულაძის დავალებით, სისხლის სამართლის N 023300912005 საქმეზე ოპერატიული დახმარების აღმოჩენის მიზნით, ქ. თბილისიდან გურჯაანის რაიონში მივლინებული იქნა ჯგუფი შემდეგი შემადგენლობით: ქ. თბილისის მთავარი სამმართველოს ისანი-სამგორის სამმართველოს უფროსის მოადგილე ზაზა ჭაია, ქ. თბილისის მთავარი სამმართველოს დეტექტივების სამმართველოს I განყოფილების უფროსის მოადგილე კახაბერ სირაძე და ქ. თბილისის მთავარი სამმართველოს დეტექტივების სამმართველოს I განყოფილების დეტექტივ-გამომძიებლები: თამარ ზედგენიძე, თამარ გაგუა, გია გოროზია, ნუგზარ ნათელაშვილი, ვეფხია მაღრაძე და ზვიად ხატიაშვილი. ზემოაღნიშნულ პირებს რაიმე სახის საგამოძიებო ან საპროცესო მოქმედებები არ განუხორციელებიათ.
პატივისცემით, სამმართველოს უფროსის მ/შემსრულებელი,
პოლიციის ვიცე-პოლკოვნიკი გ. სიბაშვილი
შეგახსენებთ, რომ არჩევნების წინა საღამოს, ცხრა თვის ჩვილი ბარბარე რაფაიანცი მშობლებმა საძინებელში დაძინებული დატოვეს, თავად კი სამზარეულოში სავახშმოდ გავიდნენ, თუმცა უკან დაბრუნებულებს ჩვილი ადგილზე აღარ დახვდათ. დაახლოებით ერთსაათიანი ძებნის შემდეგ გოგონა ქვევრში დამხრჩვალი ნახეს.
დაზარალებულის ადვოკატებთან, ვარლამ ხათრიძესთან და ლალი ბიწოშვილთან ინტერვიუს “გურია ნიუსი“ მოგვიანებით შემოგთავაზებთ.
