შემცირება ტრანსპორტის, ქალაქის დაგეგმარების, საბინაო ამხანაგობების, კულტურისა და სპორტის პროგრამებს, საბავშვო ბაღების რეაბილიტაციის პროგრამებს შეეხო. “ცვლილებები განპირობებულია პრივატიზაციიდან დაგეგმილი შემოსავლების მიუღებლობით. ამის მიზეზი არის პოტენციურ ინვესტორთა მოლოდინები და არშემდგარი აუქციონები. ამან, ბუნებრივია, იმოქმედა ბიუჯეტის ხარჯვით ნაწილზე,” – ამბობს მერიის საფინანსო სამსახურის ხელმძღვანელი არჩილ ვანაძე.
საკრებულოს ოპოზიციას მიაჩნია, რომ ეს მიზანმიმართული საბოტაჟია, რათა ქვეყნის ახალ მთავრობამ დანაპირები ვერ შეასრულოს: “ესენი ცდილობენ თქვან, რომ მხარს უჭერენ ახალ ხელისუფლებას, თუმცა, ფაქტობრივად, ეს არის შეთქმულება ახალი მთავრობის წინააღმდეგ. ქვეყნის განვითარებაზე პასუხისმგებლობა აღებული აქვს ბატონ ბიძინა ივანიშვილს, ესენი ცდილობენ, რომ ხელი შეუშალონ, ვერ შესრულდეს დანაპირები და პასუხი მოთხოვონ კოალიციას,” – ამბობს საკრებულოს წევრი, კონსერვატორი მამული ჟღენტი.
დღესვე საკრებულოს სხდომაზე ცნობილი გახდა, რომ მერიის თანამშრომელთა სახელფასო ფონდის გაზრდისთვის და პრემიებისათვის ბიუჯეტიდან 887 ათასი ლარი გამოიყოფა, ხოლო საკრებულოს თანამშრომელთა ანაზღაურების გაზრდისა და ფინანსური წახალისებისათვის _ 60 ათასი ლარი.
მერიაში ამბობენ, რომ შრომის წახალისება მოტივაციის გასაზრდელად ხდება. ოპოზიციის განცხადებით კი, ეს არაბუნებრივი პროცესია: “ბიუჯეტის შეუსრულებლობის მიუხედავად, პრემიების გაცემა არამიზანშეწოლილად მიგვაჩნია. ეს არის არაბუნებრივი. ბიუჯეტის არასათანადო ხარჯვისა და დაგეგმვის ფონზე შრომის ანაზღაურების ფონდის ზრდაზე საუბარი არ უნდა იყოს. უნდა არსებობდეს სამსახური, რომელიც დააზუსტებს რამდენად მიზანშეწოლილია ახალი კადრების სამსახურში მიღება და საშტატო ერთეულების გაზრდა,” _ ამბობს საკრებულოს უპარტიო დეპუტატი, ფინანსისტი ვაჟა ვერულიძე.
საკრებულოს ოპოზიცია ვარაუდობს, რომ შესაძლოა, მერიის თანამშრომელთა საშტატო ერთეულები ხელოვნურად გაზრდა მოხდეს, რადგან უმაღლესი საბჭოს ყოფილი წვერები და აჭარის მთავრობის თავმჯდომარის მოადგილეები, რომლებმაც, შესაძლოა, დატოვეს ან მალე დატოვებენ აჭარის საკანონმდებლო ორგანოსა და მთავრობას, მათ დასაქმებას ნაციონალური მოძრაობა მერიაში მოახდეს.
“უმაღლესი საბჭოს ყოფილი დეპუტატები, ასევე, ახალი მთავრობის თავმჯდომარის დანიშვნის შემდეგ მოქმედი მთავრობის თავმჯდომარის მრჩეველებს სამუშაოდ მერიაში გადმოიყვანენ. უმუშევარს ხომ არ დატოვებენ? ამიტომაც ხდება სახელფასო ფონდის გაზრდა. მაგალითისათვის, გელა დეკანაძე, რომელიც უმაღლესი საბჭოს ფრაქცია “ნაციონალურ მოძრაობას” ხელმძღვანელობდა, ახლა მერის მოადგილედ დანიშნეს. ასე გააკეთებენ სხვების შემთხვევაშიც,” – ამბობს მამული ჟღენტი.
დღეის მდგომარეობით ბათუმის მერიას 435 საშტატო თანამშრომელი ჰყავს. მერიის წლიური სახელფასო ფონდი კი 6 მილიონ 147 ათას ლარს შეადგენს. გასულ წელს მერიის სახელფასო ბიუჯეტი 4 მილიონ 121 ათასი იყო, 2010 წელს კი 3 მილიონ 758 ათასი.
ქალაქის მერის და მერის მოადგილეების ყოველთვიური პრემია 500 ლარია, მერიის ადმინისტრაციის უფროსის გელა მახარაძის ყოველთვიური პრემია კი _ 750 ლარი. კვარტალურად მერიის მაღალი რანგის ჩინოვნიკები ერთი, რიგ შემთხვევაში კი ორი ხელფასის ოდენობის პრემიას იღებენ.
