თავდაცვის სამინისტროში ჩაშლილი ტენდერები და ბენზინზე გახარჯული მილიონები

თავდაცვის სამინისტროს, როგორც ყველაზე დახურული და გასაიდუმლოებული უწყების მიმართ, საბიუჯეტო თანხების მიზნობრივ ხარჯვასთან დაკავშირებით კითხვები ყოველთვის არსებობდა, თუმცა, უწყებიდან ინფორმაციის მოპოვება ვერც ერთმა არასამთავრობო ორგანიზაციამ და მედიასაშუალებამ ვერ შეძლო. იარაღისა და საწვავის შესაძენად გამოყოფილი მილიონობით ლარი სრულიად გაურკვეველ ვითარებაში გაიხარჯა. ის მწირი ინფორმაცია კი, რასაც თავდაცვის სამინისტროს შესყიდვების სამსახური სახელმწიფო შესყიდვების სააგენტოს ვებგვერდზე ათავსებდა, რა თქმა უნდა კორუფციისა და თანხების გაფლანგვის მასშტაბებს სრულად ვერ ასახავს.

როგორც წესი, თავდაცვის სამინისტროს მიერ საწვავის შესაძენად გამოცხდებულ ტენდერები პრეტენდენტების არარსებობის საბაბით იშლებოდა. სად ქრებოდა მილიონობით ლარი და რომელი კომპანიებისგან იძენდა სამინისტრო საწვავს, გაურკვეველია.

იურისტი ლევან ალაფიშვილი “გურია ნიუსთან” საუბარში ამბობს, რომ ტენდერებში პრეტენდენტების არარსებობას ორი მიზეზი ჰქონდა: _ პირველი _ სატენდერო პირობები ხელმისაწვდომი არ იყო კომპანიებისთვის და მეორე _ საწვავის სფეროში არსებული კარტელური გარიგებები, როდესაც კომპანიებმა იციან, რომ არ უნდა მიიღონ მონაწილეობა ტენდერში, რადგან სახელმწიფო უწყებას გადაწყვეტილი აქვს პირდაპირი ხელშეკრულების გაფორმება რომელიმე კომპანიასთან.

2011 წლის იანვრამდე თითოული უწყება ცალ-ცალკე ყიდულობდა საწვავს, მთავრობის 2011 წლის 29 დეკემბრის განკარგულების შემდეგ კი სახელმწიფომ საწვავის კონსოლიდირებული წესით შესყიდვის გადაწყვეტილება მიიღო _ მთავრობა საწვავს გაერთიანებული ტენდერით შეიძენდა, რაც, შემდეგ, უწყებებზე გადანაწილდებოდა. ამავე დროს უწყებებს უფლება დარჩათ, უარი ეთქვათ კონსოლიდირებულ შესყიდვაზე და ტენდერები დამოუკიდებლად გამოეცხადებინათ.

თავდაცვის სამინისტროს მიერ 2011 წელს გამოცხადებული ტენდერების უმეტესობა, სადაც შესყიდვის ღირებულება 2 მილიონს აღემატებოდა, ჩაიშალა. ლევან ალაფიშვილი აცხადებს, რომ სავარაუდოდ, სამინისტრომ ხელშეკრულება რომელიმე კომპანიასთან პირდაპირი წესით გააფორმა.

2011 წელს პრეტენდენტების არარსებობის მიზეზით ჩაშლილი ტენდერები:

6 თებერვალი. შესყიდვის ღირებულება 2მლნ 553 ათას 600 ლარი;

21 იანვარი. შესყიდვის ღირებულება 2 მლნ 340 ათასი ლარი;

21 იანვარი. შესყიდვის ღირებულება 12 მლნ 606 ათას 750 ლარი;

3 თებერვალი. შესყიდვის ოდენობა 4 მლნ 920 ათასი ლარი;

21 თებერვალი. შესყიდვის ღირებულება 12 მლნ 736 ათას 500 ლარი;

21 თებერვალი. შესყიდვის ღირებულება 2 288 000 ლარი;

31 მაისი. შესყიდვის ღირებულება 14 მილიონ 19 ათას 300 ლარი. ტენდერი არ შედგა;

4 ოქტომბერი. შესყიდვის ღირებულება 2 მლნ 822 ათას 400 ლარი

4 ოქტომბერი. 7 მლნ 875 ათასი ლარი.

“თუ თავდაცვის სამინისტროს მიერ გამოცხადებული ტენდერი ამა თუ იმ მიზეზის გამო ჩაიშალა, უწყება მეორე ტენდერს აცხადებს, მესამე შემთხვევაში კი სამინისტროს სრული უფლება აქვს, თავისი შეხედულებისამებრ გააფორმოს ხელშეკრულება ნებისმიერ კომპანიასთან,”_ აცხადებს ალაფიშვილი “გურია ნიუსთან” საუბარში.

აღსანიშნავია, რომ თავდაცვის სამინისტროს ჩაშლილი ტენდერები განმეორებით აღარ ჩაუტარებია. სავარაუდოდ, უწყებამ შესყიდვა ტენდერის გარეშე აწარმოა.

“არსებობს განსაკუთრებული შემთხვევები, როდესაც უწყება მიმართავს მთავრობას ან შესყიდვების სააგენტოს და გადაუდებელი აუცილებლობის გამო ითხოვს შეყიდვას ტენდერის გარეშე. ამ შემთხვევაში, აუცილებლად უნდა არსებობდეს მთავრობის განკარგულება და კომისიის ოქმი, სადაც ახსნილი იქნება, თუ რით იყო გამოწვეული ეს გადაუდებელი აუცილებლობა. ამავე დროს, აუცილებელია იმ კონკრეტული კომპანიის მითითება, რომელიც სახელმწიფო უწყებამ შეარჩია,” _ ამბობს ალაფიშვილიი.

საწვავის სახელმწიფო შესყიდვის მიზნით, 2012 წლის 6 იანვარს გამოცხადებულ კონსოლიდირებულ ტენდერში საუკეთესო სატენდერო წინადადების მქონე სამი მიმწოდებელი გამოვლინდა:

შპს სან პეტროლიუმ ჯორჯია (გალფი);

სს ვისოლ პეტროლიუმ ჯორჯია;

შპს უნიგრუპი (ლუკოილ ჯორჯია.)

მიუხედავად იმისა, რომ 21 იანვრიდან, სისტემაში დარეგისტრირებულ ნებისმიერ შემსყიდველ ორგანიზაციას უფლება ჰქონდა საწვავის სახელმწიფო შესყიდვა აღნიშნული მომწოდებლებისაგან ტენდერის გარეშე, გამარტივებული ხელშეკრულების დადების გზით მოეხდინა, თავდაცვის სამინისტრო კვლავაც ტენდერების გზით ცდილობდა საწვავის შეძენას. შედარებით დაბალბიუჯეტიანი ტენდერები ჩვეულებრივი წესით ტარდებოდა, რამდენიმე პრეტედენტიდან სამინისტრო გამარჯვებულს არჩევდა. თუმცა, იმ შემთხვევაში, როდესაც შესყიდვის ოდენობა რამდენიმე მილიონს აღწევდა, ტენდერში მონაწილეობის სურვილი რატომღაც ყველა კომპანიას ეკარგებოდა.

2012 წელს ჩაშლილი ტენდერები:

18 იანვარი. შესყიდვის ღირებულება 19 მლნ 823 ათასი ლარი;

10 იანვარი შესყიდვის ღირებულება 1 მლნ 677 ათასი ლარი. ტენდერი არ შედგა;

18 იანვარი. 3 მლნ 280 ათასი ლარი. ტენდერი არ შედგა;

17 აპრილი. 15 მლნ 275 ათასი ლარი, ტენდერი არ შედგა.

საწვავის გარდა, თავდაცვის სამინისტროს შესყიდვების სამსახურს იარაღის, სამხედრო აღჭურვილობის, სამხედრო მოსამსახურეებისთვის განკუთვნილი საცხოვრებელი ბინების და კიდევ სხვა არაერთ საკითხთან დაკავშირებით მოუწევს ხარჯვის კანონზომიერების დამტკიცება.