უკანასკნელ წლებში ევროპაში “კავკასიის იმარათის” წარმომადგენელი და დოკუ უმაროვის უახლოესი მეგობარი ჩატაევი ჩეჩნებსა და ქისტებში დიდი ავტორიტეტით სარგებლობდა. 28 აგვისტოს ლაფანყურში მდგომარეობის გართულების შემდეგ შს სამინისტროს ანტიტერორისტულმა ცენეტრმა სწორედ მას სთხოვა ტყეში დაბანაკებულ შეიარაღებულ ჯგუფთან მოლაპარაკების დაწყება.
მოლაპარაკება უშედეგო დასრულდა და ჩატაევს, რომელიც სამართალდამცავების საბოლოო პასუხს ელოდა, მოულოდნელად გაუხსნეს ცეცხლი. ადვოკატი ნინო ანდრიაშვილი აცხადებს, რომ დაჭრილი ჩატაევი ფერდობზე დაგორდა. სამართალდამცავებმა ჩათვალეს, რომ ცოცხალი აღარ გადარჩებოდა და მისი დევნა შეწყვიტეს. ჩატაევი ტყეში 10 დღე დარჩა. 7 სექტემბერს ის მესაზღვრეებს ჩაბარდა.
ახმედ ჩატაევი სამხედრო ჰოსპიტალში გადაიყვანეს. მის წინააღმდეგ სისხლის სამართლის საქმე აღიძრა. ადვოკატი ნინო ანდრიაშვილი აცხადებს, რომ პროკურატურა ორ ძირითად მტკიცებულებას ეყრდნობა. ეს არის სამი მესაზღვრის იდენტური ჩვენება, რომლებიც აცხადებდნენ, რომ ჩატაევი დაკავებისას შეიარაღებული იყო და ექსპერტიზის დასკვნა, რომლის მიხედვითაც ჩატაევისაგან ამოღებული საბრძოლო მასალა გამოსაყენებლად ვარგისია.
სასამართლო პროცესზე ახმედ ჩატაევმა კიდევ ერთხელ განაცხადა, რომ თავს უდანაშაულოდ სცნობს. აღსანიშნავია, რომ გამოძიებისთვის მას ჩვენება არ მიუცია და დღემდე იყენებს დუმილის უფლებას. ჩატაევი ლტოლვილის სტატუსით ავსტრიაში ცხოვრობდა და პერიოდულად ჩამოდიოდა საქართველოში, სადაც მისი ცოლშვილი ცხოვრობდა.
ჩატაევს აქამდე სახაზინო ადვოკატები მამუკა ბასილაშვილი და ზურაბ ბაცანაძე იცავდნენ, დღევანდელ სასამართლო სხდომაზე განსასჯელმა მათ უნდობლობა გამოუცხადა და მათი აცილების საკითხი დააყენა. როგორც გაირკვა, ადვოკატები მას მხოლოდ წინასწარი გამოძების ეტაპზე იცავდნენ და სასამართლოში დაცვის ორდერები არ წარუდგენიათ.
წინასწარ სასამართლო სხდომაზე დაცვის მხარე ჟურნალისტ გელა მთივლიშვილის მოწმედ დაკითხვის შუამდგომლობის დაყენებას გეგმავდა. ჟურნალისტი პროკურატურის ძირითად მოწმეებს – მესაზღვრებს ესაუბრა, რომლებმაც წინა ჩვენებები გადათქვეს და განაცხადეს, რომ გამოძიების მხრიდან ზეწოლას ჰქონდა ადგილი.
ადვოკატი ანდრიაშვილი პროცესზე საკმაოდ მოუმზადებელი წარსდგა. ეს გარემოება მან დროის უკმარისობით ახსნა და სასამართლოს საქმის მასალების გასაცნობად დამატებითი დრო სთხოვა.
ახმედ ჩატაევის საქმის სასამართლო მოსმენა 1 ნოემბერს გაგრძელდება. საქმეს მოსამართლე მერაბ ჯორბენაძე იხილავს.
