_
რაც შეეხება დღევანდელ ადგილობრივ მმართველობას, მიჭირს მას ვუწოდო თვითმმართველობა. ნათელია, რომ რაც არ უნდა დაგვაბრალონ, ჩვენ არ ვერევით მიმდინარე პროცესებში. ამის თაობაზე მე თავიდანვე პრინციპულად განვაცხადე. ქართული ოცნების მხარდამჭერი ფრაქციის შექმნა საკრებულოში, რა თქმა უნდა, გამიხარდება, მაგრამ ეს ბუნებრივი გზით უნდა მოხდეს. თუმცა, ვიყოთ გულახდილები, საკრებულოს დღევანდელი პოლიტიკური ხარისხი არ ასახავს ქვეყანაში შექმნილ რეალობას და ასეთ საკრებულოს ხალხის მხარდაჭერა არ აქვს.აქაც ის ადამიანები უნდა დაწინაურდნენ, ვისაც ყველაზე მეტად ენდობა ხალხი. ხალხის მხარდაჭერა კი დღეს ბიძინა ივანიშვილს და მის ახალ მთავრობას აქვს.
თუ საკრებულოს უნდა ხალხის სამსახურში ჩადგეს, იგი აუცილებლად აქტიურად უნდა დაუდგეს გვერდით ახალ მთავრობას და მაქსიმალურად უნდა შეუწყოს ხელი მუშაობაში. სხვა მხრივ, უპირველესად, საკრებულოს გაუჭირდება. მთავრობა კი თავის საქმეს მაინც აუცილებლად გააკეთებს. მე, როგორც მაჟორიტარი, დაინტერესებული ვარ სწორედ ასეთ საკრებულოსთან აქტიური თანამშრომლობით.
_ ოზურგეთის აღმასრულებელ ხელისუფლებაში, ჯერჯერობით, არანაირი რადიკალური ცვლილება არ მომხდარა…
_ მე ვთქვი დეპუტატებთან შეხვედრის დროს, რომ გულწფრელად მივესალმები საკრებულოში ფრაქციების შექმნას, რომელიც იქნება „ქართული ოცნების“ მხარდამჭერი, მაგრამ ეს ფრაქციები თუ ისეთმა ადამიანებმა შექმნეს, რომლებიც, დაუშვათ, ჩვენ სხვადასხვა ხერხით გვებრძოდნენ არჩევნების პერიოდში, ეს არ იქნება ლოგიკური და ამას ნამდვილად ვერ მივესალმებით. უნდა შექმნან ისეთმა ადამიანებმა, რომლებსაც, როგორც მინიმუმ, ნეიტრალური პოზიცია ეკავათ, ანდა პირდაპირ ასოცირდება „ქართულ ოცნებასთან“. ჩვენ გავაგრძელებთ თანამშრომლობას დღევანდელ საკრებულოსთან, არავის არაფრისკენ მოვუწოდებთ. ქვეყანაში მიმდინარე ცვლილებები ადექვატურად უნდა იყოს აღქმული, მათ შორის ოზურგეთშიც. ამ მიმართულებით, პირდაპირ განვუცხადე ყველას, რომ ჩვენ გვაქვს სურვილი, ოზურგეთში აღმასრულებელი ხელისუფლება შეიცვალოს. ვგულისხმობ, რა თქმა უნდა, გამგებელს და შესაბამისად იმ ხალხს, ვისაც ეკუთვნის წასვლა. ოზურგეთში, რაც შეიძლება მალე უნდა შეიცვალოს აღმასრულებელი ხელისუფლება.
_ და როდისთვის იგეგმება ცვლილებები?
_ არ ვიცი, მაგრამ ეს ადრე უნდა მოხდეს, რათა ოზურგეთში, სასწრაფოდ დაიწყოს ადექვატური პროცესები და ამ ფერხულში ჩადგეს ოზურგეთის ხელისუფლებაც.
_ ბატონო ზვიად, სანამ ეს მოხდება, პრეზიდენტის ბრძანებულებით, საჯარო მოხელეებს და ჩინოვნიკებს ხელფასები მოემატათ, გუბერნიაში კი პრემიები დარიგდა.
_ ამის დრო ახლა არ არის და რაც ახლა ხდება, სირცხვილია! საკუთარ კეთილდღეობაზე ასეთი გამალებული ზრუნვის დაწყება ძალიან უხერხულია და ეს ხმამაღლა ვთქვი ოზურგეთის საკრებულოს დეპუტატებთან შეხვედრის დროს, სადაც საკრებულოს თავმჯდომარეც იმყოფებოდა. ჩვენ არ ვართ წინააღმდეგი ზოგადად ხელფასების მატების, პირიქით, ჩვენს მთავრობას მიაჩნია, რომ ეს პროცესი დაიწყება და გაგრძელდება და ხალხის კეთილდღეობა გაიზრდება, მათ შორის საჯარო მოხელეების. მაგრამ, დღეს ერთი ქალბატონი იყო ჩემთან მოსული და ტიროდა, სამკურნალო ფული არ აქვს და დიდი ხანია ითხოვს დახმარებას, მაგრამ უშედეგოდ.
ასევე დეპუტატებთან შეხვედრის დროს გავაკეთე აქცენტი იმაზე, რომ ამ ბოლო დროს, ძალიან მოუხშირეს ქეიფებს ჩვენმა ხელმძღვანელმა ამხანაგებმა, ისინი ერთმანეთს არწმუნებენ, რომ ერთი გუნდი არიან.
_ იმასაც ამბობენ, რომ ექვს თვეში, კვლავ ხელისუფლებაში აპირებენ მოსვლას.
_ იცით რა, ჩვენ თუ როლები გავცვალეთ და მაგათ ოცნება დაიწყეს კი, ბატონო არა ვართ ამის წინააღმდეგი, იოცნებონ. ბიძინა ივანიშვილის გუნდი, მინიმუმ ოთხი წლით არის მოსული ხელისუფლებაში. ჩვენ ძალიან მალე ჩავატარებთ ადგილობრივი თვითმმართველობის რეფორმას და აუცილებლად დავნიშნავთ ადგილობრივი თვითმმართველობის არჩევნებს და ძალიან რადიკალური ცვლილებები განხორციელდება ქვეყანაში.
