_ ბატონო ზურაბ, არსებობს თუ არა პარლამენტის შენობის მიღება-ჩაბარების აქტი, სადაც წერია, რომ პარლამენტის ახალი შენობა ექსპლოატაციისთვის ვარგისიანია?
_ არა, არ არსებობს არანაირი აქტი. მეტიც, პარლამენტისთვის საკუთრებაშიც არ არის ეს შენობა გადაცემული. სასაცილო სიტუაციაა…
_ ოფიციალურად ვის ეკუთვნის პარლამენტის შენობა?
_ სამშენებლო კომპანიას. აქაც ძალიან არეული სიტუაციაა, დაახლოებით ისეთი, როგორიც მძიმე პაციენტის რეანიმაციაში მოხვედრისას რომ დგება _ არც აქეთაა და არც იქით: მიმდინარეობს მშენებლობა, ჯერ-ჯერობით სახელმწიფოსთვისაც არ არის გადაცემული შენობა, რამდენად უსაფრთხოა იგი, ამის დასკვნა არ არსებობს. ნახევრად ხუმრობით რომ ვთქვათ, მთელი პარლამენტის აპარატი, თავისი დეპუტატებით, უკანონოდ შემოჭრილები გამოვდივართ, რადგან ამ შენობის გადაცემა არ მომხდარა. ასეთ სიტუაციაში გარკვეულ მიზეზთა გამო აღმოვჩნდით; კონსტიტუციით განსაზღვრულია, რომ პარლამენტის შენობა არის ქუთაისში, პარლამენტი უნდა შეიკრიბოს ქუთაისში და იქ იმუშაოს. მივყვებით კონსტიტუციას და ვმოქმედებთ იმ ჩარჩოში, რასაც გვავალებს კონსტიტუცია.
_ გამოდის, რომ კანონს არღვევთ?
_ ჩვენ გვანუგეშებს ის, რომ კონსტიტუცია უფრო მაღალი იურიდიული ძალის მქონე აქტია; კონსტიტუციის ძალით მოქმედება კანონის პასუხისმგებლობისგან გვათავისუფლებს. რა თქმა უნდა ეს ნახევრად ხუმრობით. მართლა ძალიან ბევრი რამეა არეულ-დარეული, დაულაგებელი.
_ რამდენად უსაფრთხოა პარლამენტის შენობაში მუშაობა?
_ არც ეს არ ვიცით; ამის შეფასება არ მომხდარა, ექსპერტიზა არ ჩატარებულა. ოფიციალური დასკვნა არ არსებობს. ვენდობით მშენებლების კეთილსინდისიერებას და მათ განცხადებას, რომ შენობა უსაფრთხოა. შენობის ექსპლუატაციაში გაშვებასთან დაკავშირებით უამრავი საბუთი უნდა არსებობდეს, მაგრამ ჯერ ხელთ არაფერი გვაქვს..
_ შესაძლებელია, რომ სამშენებლო კომპანიამ, რომელიც ამ შენობის მეპატრონეა, განაცხადოს, რომ ეს მისი შენობაა და თქვენ არ შეგიშვათ?
_ არა, მთლად ასე არ არის. ეს შენობა სახელმწიფოს დაკვეთა იყო და ბიუჯეტიდან ფინანსდებოდა. პრობლემა იმაშია, რომ შენობა ჯერ დასრულებული არ არის. ჯერ კიდევ გარკვეული სარემონტო სამუშაოებია ჩასატარებელი. პარადოქსული სიტუაციაა – პარლამენტი მუშაობს და პარალელურად, ამავე შენობაში სარემონტო სამუშაოები მიმდინარეობს. შენობა ჯერ ოფიციალურად დასრულებული არ არის. დასრულების შემდეგ იქნება გადაცემის დოკუმენტებზე მუშაობა. დღეს ფორსმაჟორულ სიტუაციაში ვმუშაობთ, სხვა გამოსავალი არ არის.
_ არსებობს თუ არა პარლამენტის შენობის ოფიციალური ხარჯთაღრიცხვა?
_ დაახლოებით 340 მილიონ ლარზე არის საუბარი. ფინანსთა სამინისტრო საქმის კურსშია რა დაჯდა შენობა. საკმაოდ დიდი თანხაა. თქვენ მშენებლობას გულისხმობთ და ამ თანხების ნაწილი წინასწარ აღებულია. უდიდესი ნაწილი კიდევ 17 – 18 მილიონი ლარი ბიუჯეტიდან არის გასაღები, რათა დასრულდეს მიმდინარე სამუშაოები.
_ რა ჯდება პარლამენტის კომუნალური ხარჯები?
_ რაც შეეხება კომუნალურ ხარჯებს, აქამდე იგივე დონის საფასურს იხდიდა სამშენებლო კომპანია, რომელიც მშენებლობას ახორციელებდა. ახლა სარემონტო სამუშაოები ცოტა შეჩერდა და შესაძლებელი იქნება გავთვალოთ საშუალოდ, დღეში რამდენს ხარჯავს პარლამენტი, გადავამრავლოთ 30 დღეზე და დავთვალოთ საშუალოდ თვეში რა დაუჯდება, მაგალითად, დენის გადასახადი პარლამენტს. ჯერ-ჯერობით ეს არ მოხერხდება, მაგრამ უახლოეს მომავალში ამას გავარკვევთ. რაღაც უღრან ტყეში მოვხვდით ზოგადად, ეს ყველაფერი გაირკვევა და დალაგდება. სამწუხაროდ, მემკვიდრეობით გვერგო ასეთი სიტუაცია, ჩვენზე დამოკიდებული არ არის. ვმოქმედებთ ისე, რის საშუალებასაც არსებული რეალობა და სიტუაცია გვაძლევს.
_ საუბრობენ იმაზე, რომ შესაძლებელია საკანონმდებლო ორგანო დაბრუნდეს თბილისში. ძველი პარლამენტის შენობა კი, საინვესტიციო ფონდისთვის არის გადაცემული…
_ რა თქმა უნდა, ამ მხრივაც არის პრობლემები. ეს არის კიდევ ერთი დასტური იმისა, რომ ბოლო წლების განმავლობაში, სრულიად გაუაზრებლად და ნაჩქარევად ხდებოდა გადაწყვეტილების მიღება იდეის დონეზე და არავინ არ ფიქრობდა მის რეალურ უზრუნველყოფაზე. წინა პარლამენტმა კონსტიტუციაში ცვლილება შეიტანა და ჩაწერა, რომ პარლამენტის ადგილსამყოფელია ქუთაისი. თუ გადაწყდება, რომ შეიცვალოს პარლამენტის ადგილსამყოფელი და გახდეს თბილისი ან კიდევ რომელიმე ქალაქი, ეს ყველაფერი კონსტიტუციური საკითხია და საჭიროებს კონსტიტუციაში ცვლილებების შეტანას. ამას კი პარლამენტთა 2/3 სჭირდება. როგორც აღმოჩნდა, საპარტნიორო ფონდს, ნიკა გილაურის ხელმძღვანელობით კი გადაეცა, მაგრამ გაყიდვა არ მომხდარა. თუ გადაწყდა გადასვლა, შენობას რემონტი დასჭირდება და ესეც გარკვეულ ხარჯებთან იქნება დაკავშირებული.
_ თითქმის მთელ ქუთაისს წყალი გრაფიკით მიეწოდება. პარლამენტის შენობაში თუ გაქვთ წყალი?
_ ცნობილია, რომ წყალი ქუთაისში წლების მანძილზე სერიოზული პრობლემაა. ეს ფუფუნება “ძალზე თანამედროვე შენობას ერგო” – პარლამენტს წყალი შეუზღუდავად მიეწოდება.
_ როდის დასრულდება პარლამენტის შენობის რემონტი?
_ როგორც მშენებლები ამბობენ, ნოემბრის ბოლოს. იმედი გვაქვს, რომ წლის ბოლოს მაინც, რაც სამუშაო მიმდინარეობს დასრულდება. აქ გათვალისწინებული იყო უამრავი რამის გაკეთება, მაგრამ ამ ეტაპზე შეჩერდება. რადგან არც თავის დროზე იყო გაღებული ხარჯები; შენობის გარეთ ტერიტორიის მოწყობაზე მაქვს საუბარი. სანამ ზუსტად არ გაირკვევა სად იქნება პარლამენტი, მანამდე რამდენიმე მილიონის გაღება უყაირათობა და ლოგიკას მოკლებული იქნება.
_ ანუ ჯერ-ჯერობით პარლამენტის გადასვლა თბილისში არ იგეგმება?
_ ეს არის კონსტიტუციური საკითხი. თუ პარლამენტი შეცვლის კონსტიტუციას და მიიღებს ამ გადაწყვეტილებას, თავისთავად გადავა. თუმცა როდის მიიღებს პარლამენტი ამ გადაწყვეტილებას, მიიღებს საერთოდ თუ არა, ვერ მოგახსენებთ.
