როგორც წყაროსგან ხდება ცნობილი, კონტროლის პალატის საბიუჯეტო დეპარტამენტის უფროსად, “ნაციონალური მოძრაობის” ყოფილი დეპუტატი და 2012 წლის საპარლამენტო არჩევნებში ზესტაფონში დამარცხებული მაჟორიტარობის კანდიდატი ბეჟან ბუცხრიკიძე დანიშნეს. აღნიშნული დეპარტამენტი, კონტროლის პალატის ქუთაისის ოფისშია განთავსებული.ბუცხრიკიძე წლების განმავლობაში კონტროლის პალატის შემმოწმებელ საპარლამენტო კომისიას ხელმძღვანელობდა, თუმცა, რამდენადაც ჩვენთვისაა ცნობილი, მან იქ რაიმე მნიშვნელოვანი დარღვევები ვერაფრით აღმოაჩინა.
“გურია ნიუსის” ინფორმაციით, ცვლილება განხორციელდა აუდიტის სამსახურის ადმინისტრაციულ დეპარტამენტშიც, რომლის უფროსად ასევე “ნაცმოძრაობის” დამარცხებული მაჟორიტარი ჩუღურეთის რაიონში, ანდრო ალავიძე დანიშნეს.
ადმინისტრაციის ყოფილი უფროსი, ირენა მელუა კი ქუთაისის კონტროლის პალატაში გადაუყვანიათ.
აუდიტის სამსახურის პრესსამსახურის უფროსი ფატი მამიაშვილი როგორც ყოველთვის, “გურია ნიუსთან” კომენტარს არ აკეთებს. ჩვენი კითხვის მოსმენის შემდეგ, _ ადასტურებდა თუ არა ის ამ საკადრო ცვლილებებს, მამიაშვილმა გაგვიცხადა, რომ უკვე სამუშაო საათები ამოწურული იყო და ორშაბათს შევხმიანებოდით. აუდიტის სამსახურის„ ორშაბათი“ კი ჩვენი საკუთარი გამოცდილებით, მინიმუმ 6 თვე შეიძლება გაგრძელდეს. რაც შეეხება სამუშაო საათებს, შეგახსენებთ, რომ ოპოზიციური პარტიების დაჯარიმებისას, ეს უწყება სადღეღამისო რეჟიმში მუშაობდა.
როგორც ჩანს აუდიტის სამსახურში “ნაცმოძრაობა” მყარად არის გამაგრებული და უწყების გაძლიერებას კიდევ უფრო მეტად ცდილობენ, განსაკუთრებით კი ლევან ბეჟაშვილის კადრებით.
ჩვენი წყაროს ცნობით, გასული თვის ბოლოს, აუდიტის სამსახურში თათბირი ჩატარდა, რომელზეც ნათია მოგელაძეს მეტად უცნაური სურვილი გამოუთქვამს. რა ხდება ამ დახურულ უწყებაში და რის სურვილი გაუჩნდა მოგელაძეს არჩევნების შემდეგ, ამას “გურია ნიუსის” ვებგვერდიდან დღესვე შეიტყობთ.
ჩვენს სატელეფონო ზარს არც ანდრო ალავიძემ უპასუხა. რაც შეეხება აუდიტის სამსახურის საზოგადოებასთან ურთიერთობის სამსახურს, თუკი მათ პასუხის გაცემა მოუნდებათ ორშაბათს, შეუძლიათ ჩვენს ელექტრონულ მისამართზე გამოგზავნონ და აუცილებლად გამოვაქვეყნებთ.
