მან ეს გეგმა დღეს უნივერისიტეტის ეზოში შეკრებილ სტუდენტებსა და პროფესორ-მასწავლებელებს წარუდგინა. მის ღიად და აშკარად გამოთქმულ სურვილს, რომ უნივერსიტეტის რექტორობა სურს, სტუდენტების მხრიდან კრიტიკული განცხადებები მოყვა: _ უნივერსიტეტს აქვს ავტონომია და არ დავუშვებთ, რომ დღესაც გარედან მოგვახვიონ რექტორის კანდიდატურა, _ აცხადებენ ისინი.
“პრესაში გავრცელებული ინფორმაციით, გია მაისაიშვილის კანდიდატურას მხარს უჭერს კონკრეტული პოლიტიკური ჯგუფი. მიმაჩნია, რომ ეს არის იგივე კურსის გაგრძელება, როცა გარედან ხდებოდა რექტორების დანიშვნა. თუმცა მაისაშვილი ამბობს, რომ გამოდის ინიციატივით და უბრალოდ საკუთარი კანდიდატურის წამოყენება სურს. აქ უპირველესი იქნება აკადემიური საბჭოს გადაწყვეტილება. თუ ის იქნება აკადემიური საბჭოს კანდიდატი, რა თქმა უნდა, მის გეგმებს უნივერსიტეტის ჭაობიდან ამოყვანის შესახებ მივესალმები,” _ ამბობს სტუდენტი ბექა გადაბაძე “გურია ნიუსთან” საუბარში. ბექა ამავე დროს აცხადებს, რომ თუ ამჟამინდელ რექტორ კვიტაშვილზე, რომელიც, იმის მიუხედავად, რომ კონკრეტული პოლიტიკური ძალის მიერ იძულებით თავსმოხვეულია რექტორია, გახორციელდება პოლიტიკური ზეწოლა, ის, როგორც ერთი კონკრეტული სტუდენტი, ამას გააპროტესტებს: “იმ შემთხვევაში, თუ კვიტაშვილთან დაიწყება მოლაპარაკება და ის საკუთარი ნებით დატოვებს თანამდებობას, ეს ვარიანტი მისაღები იქნება ჩემთვის. მაგრამ თუ მასზე პოლიტიკური ზეწოლა დაიწყება, მე ამას გავაპროტესტებ, რადგან ეს ისეთივე უკანონობა იქნება, როგორც თავის დროზე კვიტაშვილის ჩამორექტორება,” _ აცხადებს ბექა “გურია ნიუსთან” საუბარში.
“გურია ნიუსი” გია მაისაშვილს ესაუბრა, რომელიც ამბობს, რომ გრანდიოზული გეგმების გასახორციელებლად რექტორის თანამდებობა სჭირდება.
_ რა ბერკეტები გჭირდებათ გეგმის გასახორციელებლად?
_ ძირითადი ბერკეტი ხალხის მხარდაჭერაა, დანარჩენი ბერკეტი უკვე მაქვს.
_ მათ შორის ფინანსურ ბერკეტსაც ფლობთ?
_ ეს ერთი კაცის ფინანსებით კი არა, მთელი ერის დაფინანსებითაა გასაკეთებელი. სახელმწიფო ფინანსები, უცხოური ფინანსები, ინდივიდუალური ადამიანების თანამონაწილეობა _ ყველას მონაწილეობა გვჭირდება, ერთი კაცი არაფერს არ წყვეტს.
_ ამისთვის გჭირდებათ რექტორობა?
_ აი, ამას სჭირდება რექტორის თანამდებობა.
მაისაშვილის განცხადებით, უნივერსიტეტი უნდა იქცეს არა მხოლოდ სასწავლო, არამედ სამეცნიერო და პრაქტიკულ ცენტრად, სტუდენტი უნდა მონაწილეობდეს საერთაშორისო სემინარებში, სიმპოზიუმებში, კონკურსებში, რათა არა მარტო გაეცნოს თანამედროვე მეცნიერულ მიღწევებს, არამედ საკუთარი პროფესორების დახმარებით თავადაც შექმნას ისეთი ნაშრომები, რასაც უცხოელები გადათარგმნიან და იხელმძღვანელებენ.
მაისაშვილი აპირებს უცხოელი პროფესორების ჩამოყვანასაც, რომლებიც ქართველ პროფესორებთან ერთად თანამედროვე სახელმძღვანელოებს შექმნიან. ის ასევე შეეხო სტუდენტის დაფინანსების საკითხსაც და იდეალურად ჰარვარდის მოდელი დაასახელა, როდესაც სტუდენტი ფინანსდება, როგორც სასწავლებლის სასტიპენდიო ფონდიდან, ამავე დროს სახელმწიფოსგან იღებს შეღავათიან სტუდენტურ სესხს, რაც მინიმუმ 30 წელზე იქნება გადანაწილებული.
აღსანიშნავია, რომ უნივერსიტეტის რექტორის არჩევამდე 2 წელია დარჩენილი. ერთ-ერთ სტუდენტს, რომელმაც მას ეს გარემოება შეახსენა, მაისაშვილმა უპასუხა: _ ორი და სამი წელია ძალიან ბევრია, აღარ არის ამის დრო.
სტუდენტთა რეპლიკებზე, რომ არ სურთ კონკრეტული პოლიტიკური ძალის მიერ თავსმოხვეული რექტორი, მაისაშვილი საკმაოდ მწვავედ რეაგირებდა: “გია მაისაშვილს რაში სჭირდება ვინმეს დანიშვნა? 3 მილიონზე მეტი ჰქონდა ხელფასი, აქ სანამ ჩამოვიდოდა და ლიდერთა სკოლას დააარსებდა. შემირცხვენია ისეთი კაცი, ვისაც თანამდებობა უნდა. გადახედეთ ჩემს წარსულს და ნახეთ, თუ მე თანამდებობისთვის მიბრძოლია _ მე ვიწვი სტუდენტების სიყვარულით.”
