მიატოვეს რემონტი, დაგვტოვეს უპასუხისმგებლოდ, უპატრონოდ, განადგურებული, დაზიანებული ბინების შემყურე, სადაც ისე წვიმს, როგორც გარეთ, იქნებ თქვენ, ჟურნალისტებმა შეძლოთ ჩვენი დახმარება”, _ ამ თხოვნით კიდევ ერთხელ მიმართეს”გურია ნიუსს” რუსთაველის ქუჩის მცხოვრებლებმა.
_ ეს არ არის რამდენიმე ადამიანის კაპრიზი _ ესაა მთელი ბინის მცხოვრებთა პრობლემა, რომელიც თუ არ მოგვარდა და არ გააკეთეს, ამ ზამთარში, მოსახლეობა ძალიან ცუდ დღეში ჩავარდება და პასუხისმგებელი თავისი საქციელზე აღარავინ იქნება, _ აცხადებენ ისინი.
საჯარო ინფორმაციას ამ გასაიდუმლოებული მშენებლობის შესახებ, “გურია ნიუსი” მთელი ზაფხულის განმავლობაში ელოდებოდა ოზურგეთის მუნიციპალიტეტის გამგეობიდან. ინფორმაციის მოთხოვნის მიზნით, სასამართლოშიც შევიტანეთ სარჩელი. რამდენიმე დღის წინ, როცა სარჩელი უკვე შეტანილი იყო სასამართლოში, გამგეობიდან წერილის პასუხი მივიღეთ მწირი ინფორმაციით, რომლის შესახებაც უფრო ვრცელ მასალას უახლოეს ხანებში მოგაწვდით.
“ნუ გვაწვებით”, _ ასეთი იყო, მაშინ ოზურგეთის მუნიციპალიტეტის გამგეობის პრესსამსახურის პასუხი, რომელიც საჯარო ინფორმაციის მოთხოვნას “წყლის ნაყვას” უწოდებდა.
ამ “წყლის ნაყვაში”, რუსთაველის ქუჩის მცხოვრებლები, მთელი ზაფხულის განმავლობაში წყალმა წაიღო და დღესაც ასე გრძელდება:
_ წვიმის გამო, დაზიანებული სახურავებიდან ისევ ჩამოდის წყალი, დაზიანებულია კედლები, დაცლილი გვაქვს ოთახები, როგორ მოვაწესრიგოთ, თუ სახურავი არ გაგვიკეთეს? წყალი ხომ ისევ ჩამოვა? რა აზრი აქვს, გეკითხებით? საშინელ სიტუაციაში ვართ, დაგვპირდნენ გაგიკეთებთო, მაგრამ დღემდე არაფერი ჩანს. შევიტანეთ განცხადებები გამგეობაში რამდენიმეჯერ, მაგრამ პასუხი ოფიციალურად არ მიგვიღია. მოვიდნენ წარმომადგენლები, დაიწყეს რაღაც აზომვები, ვითომ გაგვაჩერეს დროებით და არაფერი, გაიარეს და წავიდნენ, _ ამბობს ეთერ მამულაიშვილი.
_ გააკეთეს გუმბათი, სადაც მილიონი ლარი იქნება დახარჯული, კაცმა არ იცის ვისია, წყალი ჩამოდის ჩანჩქერივით, ბევრს ახალაგარემონტებული ბინები ჰქონდა და მთლად გაუნადგურდათ ყველაფერი. ჩვენს ძალებს აღემატება ის, რაც არის საჭირო, ჩვენ სად შევძლებთ სახურავის შეკეთებას? ჭერი საერთოდ ჩამოგვენგრა და ჩამოვარდა, დაგვიტოვეს და წავიდნენ, ასე უპასუხისმგებლოდ მოგვეკიდნენ მოსახლეობას. არც ვიცით, ვის მივმართოთ. ვინაა გამკეთებელი, პასუხს არავინ და ვერავინ გვცემს, ჩვენს მეზობლად მარტოხელა ქალი ცხოვრობს, ინვალიდი, ორი ჯოხით ხელში, საშინელ დღეშია, აწვიმს თავზე, ვიღაცამ ხომ უნდა შეიწუხოს თავი? მიტოვებულია სამუშაოები, არავინ პატრონი არ ჩანს და მოსახლეობას წყალი წაიღებს მალე, _ ამბობს ეთერ ტოტოჩავა.
ნანული მეგრელაძე: _ ამას შეხედეთ აგერ, რა დღეშიც ვარ, გაწკრიალებული სახლი ასეთ დღეში დამხვდა, განადგურებული, ჩამოგლეჯილი, დაზიანებული კედლებით, ეს ყველაფერი იმის ბრალია, რომ დააშენეს მეხუთე სართული, რატომ, რისთვის გეკითხებით? გამკითხავი არ უნდა ვინმე? გადაიღეთ ყველაფერი, ჩამოდის წყალი, ავეჯი ავეჯს აღარ ჰგავს, ვირთხები დარბიან სახლში. ვის ვუჩივლო, არ ვიცი, ვინაა პასუხისმგებელი, რომ სასამართლოში სარჩელი შევიტანოთ?
გამგეობაში მეუბნებიან, ჩვენ არაფერ შუაში ვართო, ეს კერძო კომპანიამ გააკეთაო, ჩვენთან არც ფორმა ორია და არც ხელშეკრულება გვაქვს ვინმესთან დადებულიო. მაწვალეს, ერთი კაბინეტიდან მეორეში გამიშვეს, აბა ზედამხედველობის სამსახურის უფროსი შუქრი გაბრიჩიძეო, გაბრიჩიძემ გამგებლის მოადგილესთან მიშა გოგოტიშვილთან გადამამისამართა, გოგოტიშვილმა მითხრა, წადი ინფრასტრუქტურის უფროსთან მერაბ წივწივაძესთანო, წივწივაძემ გამგებელთან გამიშვა, გამგებელმა მე არაფერი არ ვიციო და ასეთ გაუგებრობაში შეიძლება იყოს მოსახლეობა? მოგვეხმარეთ რაღაცა, გულთან მიიტანოს ვინმემ ჩვენი გასაჭირი, ორი კვირაა, კატა-თაგვობანას გვეთამაშებიან.
“გურია ნიუსი” ოზურგეთში რუსთაველის #6 მდებარე ბინის სარემონტო სამუშაოებთან დაკავშირებით არაერთხელ წერდა. როგორც მცხოვრებლები “გურია ნიუსთან” საუბარში აღნიშნავდნენ, ახალგარემონტებული ბინის სახურავიდან წყალი ზაფხულშიც ჟონავდა, აივნები ძალიან მძიმე მდგომარეობაში იყო და მათი განცხადებით, ვერ გაუძლებდა იმ დაშენებას, რასაც აკეთებდნენ: _ ჩვენ კი გაგვიხარდა, როცა დაიწყეს ეს მშენებლობა, მაგრამ ასე თუ გაგრძელდა და ამ ფორმით, ეს ბინები მალე დაინგრევა, _ აცხადებდნენ ისინი.
მარკრიტ სარუხანიანი: _ ვცხოვრობ მეოთხე სართულზე. სახლში მიცვალებული მესვენა და წყალი პირდაპირ ოთახში მოდიოდა. ეს რა უბედურებაა! უფრო უარესად გააკეთეს, მალე თავზე დაგვენგრევა სახლი. 50 წელია, ამ ბინებში ვცხოვრობ და არ გვახსოვს, წყალი ჩამოსულიყოს. ესაა გაკეთებული? ერთი კვირა არცაა, რაც მეუღლე დავკრძალე. იმ ოთახში სადაც მიცვალებული ესვენა, ჭირისუფალს თავზე წვიმის წყალი შადრევანივით ესხმებოდა. რატომ ანგრევენ ამ ბინებს და აივნებს?
_ ოთახებში სულ დაბზარულია კედლები, ჯერ გვიხაროდა, სახურავს გამოგვიცლიანო, მაგრამ ასე თუ გაკეთდება და წყალი ჩამოგვივა, სულ არ გვინდა. მოგვაქციონ ყურადღება, ისე გააკეთონ, როგორც საჭიროა _ გულით და ხარისხიანად, _ აცხადებდნენ “გურია ნიუსთან” რუსთაველის ქუჩის მცხოვრებლები.
_ მარტოხელა პენსიონერი, სოციალურად დაუცველი და ინვალიდი ვარ, ჯოხებზე დაყრდნობილი საშინლად ვწვალობ; აი, ნახეთ რა დღეშია ჩემი ბინა, ჩემი მშობლების ნაშენები! რა უნდათ, ვინ უთხრა, რა უფლება აქვთ ჩვენს ნაპატრონებ ბინას რომ გვინგრევენ?! უარესობისკენ მიდის ყველაფერი, ყველაფერი გაფუჭდა, გასწორებულია ჩემი ბინა მიწასთან! აქ ისეთი მდგომარეობა იყო წუხელ… რაც არ უნდა უთხრა მუშებს და მის ხელმძღვანელს, აზრი არ აქვს _ ყურადღებას არავინ არ გვაქცევს! არ ვაპატიებთ არავითარ შემთხვევაში, სააკაშვილამდე მივალ. ამის მეტი პასუხისმგებლობა არ უნდა ჰქონდეთ? ეს ასე უნდა დატოვონ? შიშით ძლივს გავათენე, მეგონა თავზე დამენგრა ყველაფერი, ისეთი ხმა ჰქონდა წვიმას, თავზე დამექცა,-თქო, ვიფიქრე… კედელი გასკდა. ვის მივმართო მითხარით, ვის უთხრათ? ვინაა გამკითხავი? გვეუბნებიან, გავაკეთებთო და ასე აკეთებენ?! ადამიანებს ასე უპატივცემულოდ უნდა მოექცნენ? _ მე, მარტოხელა პენსიონერი შევძლებ მე ამის გაკეთებას? გაგვიკეთონ თავიდან ყველაფერი, ისე, როგორც იყო, _ ჯერ კიდევ აგვისტოში აცხადებდა”გურია ნიუსთან” ლუიზა ქორიძე.
