ალასანიამ ოფიცრებს ხელისუფლების დემოკრატიული არჩევნების გზით შეცვლა მიულოცა და აღნიშნა, რომ პოლიტიკური პროცესის ყველა მონაწილე ამის გამო დიდ მადლობას იმსახურებს. ოფიცრებს მინისტრი თანადგომას და მათ საქმეებში ჩაურევლობას დაჰპირდა.
“მე ვიცი, რა იყო ქართული არმია 1992-93 წლებში და როგორ განვითარდა და როგორი ტრანსფორმაცია განიცადა. მართლაც მოსალოცია და მე, როგორც თავდაცვის მინისტრი, როგორც პრემიერ ივანიშვილის გუნდის წევრი, მინდა დაგპირდეთ, რომ ჩვენ სამოქალაქო ხელისუფლება ყოველთვის ვიდგებით თქვენს გვერდით, არ ჩავერევით თქვენს საქმეში, მაგრამ შეგიქმნით ყველა პირობას, რათა თქვენი სამშობლო და ქვეყანა დაიცვათ სრულფასოვნად,” _ განაცხადა ალასანიამ კურსდამთავრებულებთან შეხვედრისას.
საქართველოს თავდაცვის მინისტრის განცხადებით, საქართველოს სჭირდება ისეთი შეიარაღებული ძალები, რომელიც სწრაფად მოახდენს რეაგირებას ყველა საფრთხეზე.
” ასევე საქართველოს სჭირდება არმია, რომელიც იქნება ძალიან ახლო კოორდინაციაში საერთაშორისო ძალებთან, ჩვენ ვართ მონაწილე ავღანეთში მიმდინარე საერთაშორისო ოპერაციისა, რაც მეტ გამოცდილებას და შემართებას ანიჭებს ჩვენს შეიარაღებულ ძალებს.
ჩემი მთავარი ღირებულება იქნება მეომარი ჯარისკაცი, მას უნდა შევუწყოთ ხელი ყველანაირად მათი ოჯახების სოციალური დაცვით და სამართლებრივი უზრუნველყოფით, რათა მათ შეასრულონ ყველაზე საპატიო მისია, რაც შეიძლება სამშობლომ დააკისროს მამაკაცს,” _ განაცხადა ირაკლი ალასანიამ.
უმაღლესი სამხედრო საკარიერო სასწავლებლის 28 კურსდამთავრებულის წინაშე სიტყვით გამოვიდა საქართველოს შეიარაღებული ძალების გაერთიანებული შტაბის უფროსის პირველი მოადგილე ბრიგადის გენერალი ვახტანგ კაპანაძე. კურსის წარმატებით გავლის სერთიფიკატები სამხედრო მოსამსახურეებს ასევე გადასცეს აშშ-ის ევროპის სარდლობის დაგეგმვის, პოლიტიკისა და სტრატეგიის დირექტორატის დირექტორის მოადგილემ კონტრადმირალმა მარკ მონტგომერიმ, საქართველოს შეიარაღებული ძალების გაერთიანებული შტაბის უფროსმა ბრიგადის გენერალმა გიორგი კალანდაძემ და ეროვნული თავდაცვის აკადემიის რექტორმა გიორგი ქველაძემ. საზეიმო ცერემონიას საქართველოში აკრედიტებული დიპლომატიური კორპუსიც დაესწრო.
სამეთაურო-საშტაბო სკოლის ათთვიანი კურსი მოსამზადებელი, საბრძოლო, სწავლების დაგეგმვისა და საბრძოლო მომზადების, თავდაცვისა და უსაფრთხოების, ომებისა და სამხედრო ხელოვნების მოდულებისაგან შედგებოდა. სამხედრო მოსამსახურეები სრული სპექტრის ოპერაციების განსახორციელებლად საერთო საჯარისო, გაერთიანებული, უწყებათაშორისი, მრავალეროვნულ და არაკონვენციურ ოპერატიულ გარემოში ბატალიონის, ბრიგადის და ოპერატიული დაჯგუფების ლიდერის უნარ-ჩვევებს დაეუფლნენ. სწავლება მოიცავდა როგორც თეორიულ, ასევე პრაქტიკულ ეტაპებს.
სამეთაურო-საშტაბო სკოლა 2009 წელს შეიქმნა. ოფიცრის უმაღლესი სამხედრო საკარიერო სასწავლებლის კურსის გავლა შეიარაღებული ძალების უფროსი ოფიცრების შემდგომი კარიერული წინსვლისთვის აუცილებელია.
