ავედით, HR-მა სამწუხარო ამბავი უნდა გითხრათო შენ, ნათიამ, პოტრჟემ (საუბარი უნდა იყოს ნინო პოტრიჟებსკაიაზე. ავტ.), თეონამ და გიგანმა (ამ უკანასკნელზე გავამახვილებ ყურადღებას ჩვენ რაღაც თანამდებობები გვეკავა და გიგანი პრ-ში მთავარი სპეციალისტია)… . ლოგიკურია პრ ახალ უფროსს ვკითხეთ მიზეზი გაშვების რა არის-თქო. ჩვენ ამას არ ვწყვიტავთ, საკადრო პოლიტიკას სხვასთან ათანხმებენო, მაგრამ ესე გადაწყდა სისტემაში თქვენ ვერ იმუშავებთო….
ამაზე კომენტარი თქვენთვის მომინდია. ჩემი მეგობარი თეონას თქმის არ იყოს ეხლა ამათი საქციელის გამართლებას ნუ მოყვებით წინა ხელისუფლების მიერ ჩადენილი მსგავსი ქმედებების შედარებებით, ფაქტი ერთია არაფერი ქვეყანაში არ იცვლება მითუმეტეს უკეთესობისკენ.
ჩემთვის დაუვიწყარია ყველა იმ ადამიანთან ურთიერთობა, რომლებთან ერთადაც ბოლო რამოდენიმე წელი ვიმუშავე. არაჩვეულებრივები ხართ, პროფესიონალები ხართ თქვენი საქმის და რაც მთავარია კარგი მეგობრები ხართ. დიდი მადლობა თქვენ ამისთვის. წარმატებები მინდა გისურვოთ თქვენც და საკუთარ თავსაც:)))“ _ ამ ვრცელ განცხადებას საკუთარ “ფეისბუქზე” თავდაცვის სამინისტროს საზოგადოებრივ საქმეთა დეპარტამენტის ყოფილი უფროსი, ეკატერინე ჭუმბურიძე ავრცელებს.
ეკეტერინე ჭუმბურიძე ამავე თანამდებობაზე იყო შაშკინის განათლების მინისტრობის პერიოდშიც.
რაც შეეხება ნინო პოტრიჟებსკაიას, ის დიმიტრი შაშკინის პრესსამსახურის უფროსი იყო განათლების სამინისტროშიც და ეტყობა, ჟურნალისტებთან „განსაკუთრებულად გამორჩეული კომუნიკაციის“ გამო შაშკინმა თან გაიყოლა თავდაცვის სამინისტროში. რაც შეეხება ეკატერინე ჭუმბურიძის სტატუსში მოხსენიებულ ანასტასიადს, საუბარია ნათია ანასტასიადზე, რომელიც განათლების სამინისტროში საზოგადოებასთან ურთიერთობის დეპარტამენტის ადგილობრივ ორგანიზაციებთან ურთიერთობის სამმართველოს უფროსი გახლდათ. დიმიტრი შაშკინმა ისიც თავდაცვის სამინისტროში გადაიყვანა.
თავდაცვის სამინისტროში “გურია ნიუსს” განუცხადეს, რომ ჭუმბურიძემ და ანასტასიადმა განცხადებები თავად დაწერეს. შევეცადეთ დავკავშირებოდით ნინო პოტრიჟებსკაიასაც და მასთან გაგვერკვია წამოსვლის მიზეზები, მაგრამ მან ჩვენს სატელეფონო ზარებს არ უპასუხა, რაც საერთოდ არ გაგვკვირვებია. ასე იქცეოდა ის მაშინაც, როდესაც მედიასთან ურთიერთობა და პასუხების გაცემა მის პირდაპირ მოვალეობაში შედიოდა.
რაც შეეხება ნათია ანასტასიადს და ეკატერინე ჭუმბურიძეს, მათი საქმიანობის საინტერესო შტრიხების შესახებ „გურია ნიუსი“ ჯერ კიდევ ივნისის თვეში წერდა სტატიაში: “შაშკინის ახალი ინიციატივა _ როგორ “დაიცვან” პედაგოგები არასასურველი ჟურნალისტებისგან.”
2012 წლის აპრილის ბოლოს, ქობულეთისა და ხელვაჩაურის სკოლის დირექტორები განათლების სამინისტრომ შეხვედრაზე მიიწვია. როგორც “გურია ნიუსისთვის” გახდა ცნობილი, სასაუბრო თემა ძალიან საინტერესო და წინასაარჩევნოდ ერთობ აქტუალური იყო
_ როგორ იურთიერთობონ პედაგოგებმა მედიასაშუალებებთან, უფრო სწორად, როგორ აარიდონ მათთან ურთიერთობას თავი, _ ამ თემაზე სკოლის დირექტორებისთვის პრეზენტაცია მოაწყვეს განათლების სამინისტროს საზოგადოებასთან ურთიერთობის დეპარტამენტის უფროსმა ეკა ჭუმბურიძემ და ამავე დეპარტამენტის ადგილობრივ ორგანიზაციებთან ურთიერთობის სამმართველოს უფროსმა ნათია ანასტასიადმა.
“გურია ნიუსის” ინფორმაციით, სკოლის დირექტორებთან შეხვედრა ქობულეთის საზოგადოებრივ კოლეჯ “ახალ ტალღაში” შედგა.
როგორც ამ შეხვედრაზე დამსწრე ერთ-ერთმა პედაგოგმა გვითხრა, საუბრის თემა და შეხვედრის მიზანი ასეთი იყო: “ამ შეხვედრას ქობულეთისა და ხელვაჩაურის სკოლის დირექტორები ესწრებოდნენ. ორი გოგონა იყო ჩამოსული განათლების სამინისტროდან _ ეკა ჭუმბურიძე და ნათია ანასტასიადი, მათ ასე წარმოადგინეს თავი. თქვეს, რომ ჟურნალისტებთან ურთიერთობისას დიდი სიფრთხილეა საჭირო _ შეიძლება კომენტარზე მოვიდნენ, ჩაწერონ რაღაც და შემდეგ მიჭრან-მოჭრან და ისე გადააკეთონ, რომ სკოლის დირექტორებს პრობლემები შეექმნათ. ამიტომ, ამ საფრთხის თავიდან ასაცილებლად, უკეთესი იქნებოდა, თუ მსგავსი შემთხვევების დროს, ანუ ჟურნალისტების გამოჩენის შემთხვევაში, დავუკავშირდებოდით პრესსამსახურის უფროსს, ნინო პოტრჟებსკაიას, _ ყველაზე კომპეტენტური პირი მაგ საკითხში ეგ არისო, ასე გვითხრეს და მისი მობილურის ნომერიც ჩაგვაწერინეს.”
მაშინ, ამ საკითხთან დაკავშირებით, “გურია ნიუსიც” განათლების სამინისტროს პრეს-ცენტრის მაშინდელ უფროსს, ნინო პოტრჟებსკაიას დაუკავშირდა.
_ აპრილში განათლების სამინისტროს წარმომადგენლებს _ ეკა ჭუმბურიძეს და ნათია ანასტასიადს ქობულეთისა და ხელვაჩაურის სკოლის დირექტორებთან ჰქონდათ შეხვედრათ, ადასტურებთ?
_ დიახ.
_ ანუ ნამდვილად შედგა ეს შეხვედრა?
_ არ ვიცი, სხვის შეხვედრაზე მე ინფორმაციებს არ ვფლობ.
_ ქობულეთისა და ხელვაჩაურის სკოლის დირექტორებთან შეხვედრაზე იმყოფებოდნენ ქალბატონი ეკა და ქალბატონი ნათია. მათ დირექტორებს განუცხადეს რომ თუ ჟურნალისტები რაიმე საკითხზე დაუკავშირდებოდნენ, თქვენთან უნდა დაერეკათ. მათ თქვენი ნომერიც კი ჩააწერინეს.
_ ვაიმე, რა სისულელეა!
_ ისიც აუხსნეს, ჟურნალისტები თუ დაგიკავშირდებიან, შეიძლება თქვენი სიტყვები დაამახინჯონ და ინტერვიუში სხვაგვარი ინტერპრეტაციით გაუშვან, ამიტომ, ჯობს, მათთან ურთიერთობას თავი აარიდოთო.
_ ვერაფერს გეტყვით, იმიტომ რომ მსგავსი რაღაცა არ ყოფილა. აქედან გამომდინარე, ამ სისულელეზე ჩვენ კომენტარს არ გავაკეთებთ. კარგად ბრძანდებოდეთ. ნახვამდის.
პასუხების არცოდნის ან არარსებობის შემთხვევაში, ასეთი “კულტურული” დამშვიდობება პოტრჟებსკაიასგან ჩვეული სტილი იყო. არასასურველი ჟურნალისტების თავიდან მოსაშორებლად მას კიდევ ერთი ხერხი ჰქონდა _ ალო, იცით რა, თქვენი ხმა არ მესმის, _ განაცხადებდა ხოლმე შუა საუბრისას და ტელეფონს თიშავდა, შემდეგ კი ზარებს აღარ პასუხობდა.
მაშინ, ჟურნალისტებთან ურთიერთობისას “მოსალოდნელი საფრთხეების” აცილების შესახებ ინფორმაციის გადამოწმება ვერც ჭუმბურიძესთან მოხერხდა და ვერც ანასტასიადთან, რადგან ნინო პოტრიჟებსკაიამ ასე გადაწყვიტა…
