მათ რაოდენობას მაინც აშკარად ჭარბობდნენ ბაჩო ახალაიას მხარდამჭერი ნაციონალი დეპუტატები და სამეგრელოდან ჩამოსული გულშემატკივრები. სხდომის დარბაზის შესასვლელი თავიდანვე ოკუპირებული ჰქონდათ გლდანი-ნაძალადევის პოლიციის სამმართველოს უფროსის ყოფილ მოადგილეს, ასევე ყოფილ ”კმარელ” გიორგი ონიანს და მის კუნთმაგარ ბიჭებს. ონიანი და, სავარაუდოდ, ეს ბიჭებიც სამსახურიდან ახლად გათავისუფლებულები არიან და დასაკარგი არაფერი აქვთ. კუნთმაგარი ბიჭების ერთადერთ ამოცანას დარბაზში ყველაზე ადრე შევარდნა და წინა რიგების დაკავება წარმოადგენდა, რასაც შემდეგ ნაციონალ დეპუტატებს უთმობდნენ და ბედნიერები გადიოდნენ დარბაზიდან.
სამივე ბრალდებულმა: შინაგან საქმეთა ყოფილმა მინისტრმა ბაჩო ახალაიამ, მე-4 ბრიგადის ყოფილმა მეთაურმა ზურაბ შამათავამ და გაერთიანებული შტაბის ყოფილმა უფროსმა გიგი კალანდაძემ ერთხმად განაცხადეს, რომ გამოძიების მხრიდან მათზე არც ფიზიკური და არც ფსიქოლოგიური ზეწოლა არ გახორციელებულა.
აღსანიშნავია, რომ პროკურატურის წარმომადგენლები სასამართლოში საკმაოდ მოუმზადებლები წარსდგნენ. გაირკვა, რომ ოთხ სამხედრო მოსამსახურეს, რომელთა ცემაც ბრალდებათ მაღალჩინოსნებს, დღემდე მოწმის სტატუსი აქვთ და არა _ დაზარალებულის, ხოლო გიგი კალანდაძის საცხოვრებლის და პირადი ჩხრეკის დაკანონება სასამართლოს მიერ არ მომხდარა, ყოველ შემთხვევაში, საქმეში შესაბამისი დოკუმენტი არ აღმოჩნდა.
პროკურორის განცხადებით, შუამდგომლობა მათ ვადების დაცვით გაუგზავნეს სასამართლოს, საიდანაც ასევე ელოდნენ ოფიციალურ პასუხს, თუმცა კოტე კუბლაშვილის სასამართლოდან პროკურორებს პასუხი არ მისვლიათ.
ახალაიას ადვოკატმა ბაჩუკი ყურაშვილმა ”ცნობილი, დამსახურებული და ავტორიტეტის მქონე პირები” უწოდა ნაციონალ დეპუტატებს, რომლებმაც მზადყოფნა გამოთქვეს, თავდებში ჩადგომოდნენ სამივე ბრალდებულს. ხელმომწერთა შორის გასაგებ მიზეზთა გამო არ ყოფილან პავლე კუბლაშვილი და როლანდ ახალაია.
ალტერნატივის სახით დაცვის მხარემ ბრალდებულების ოც-ოცი ათას ლარიანი გირაოს სანაცვლოდ გათავისუფლების შუამდგომლობა დააყენა. გიგი კალანდაძის თავდებობა ითავა გენერალთა კლუბმაც. როგორც კალანდაძის ადვოკატმა გაბაიძემ განაცხადა, კალანდაძეს თავდებში კლუბის 40 წევრი ჩაუდგა, მათ შორის კობა კობალაძე.
მოსამართლე გიორგი გოგინაშვილის გადაწყვეტილებით, ზურაბ შამათავა და გიგი კალანდაძე 20 ათას ლარიანი გირაოს გადახდის შემდეგ დატოვებენ საპატიმრო ადგილს, ახალაიას კი ან გლდანის მე-8 საპყრობილეში ან მატროსოვის ქუჩაზე მდებარე დაწესებულებაში გადაიყვანენ.
საქმის არსებითი განხილვა 25 დეკემბერს ჩაინიშნა. 2 თვის შემდეგ, ახალაიას, სავარაუდოდ, გაგა მკურნალიძე და დავით ჭაკუაც მიუსხდებიან, სასჯელაღსრულების დეპარტამენტის ამ ორ მაღალჩინოსანს ვინმე ზვიად აბესაძის ცემა და მისთვის თავისუფლების უკანონო აღკვეთაში ედავება პროკურატურა.
შემთხვევა 2011 წლის 13 სექტემბერს მოხდა _ ზვიად აბესაძეს უცნობმა პირმა დაურეკა და რესტორან ”მასპინძელოში” დაიბარა. რესტორანში მას ახალაია, სასჯელაღსრულების დეპარტამენტის უფროსის მოადგილე გაგა მკურნალიძე და დეპარტამენტის უფროსი დავით ჭაკუა, ასევე თავდაცვის სამინისტროს და სხვა ძალოვანი უწყებების წარმომადგენლები დახვდნენ. ახალაიამ აბესაძეს საკუთარი ავტომანქანა BMW X-6 სასჯელაღსრულების დეპარტამენტისთვის ჩუქება მოსთხოვა. მკურნალიძემ მას ბოთლი ჩაარტყა თავში, ხოლო ჭაკუამ _ ზურგში სკამი. აბესაძე მანქანის გადაფორმებას დაჰპირდა, რის შემდეგ მკურნალიძემ რესტორანში სპეცსამსახურის თანამშრომლები გამოიძახა, რომლებმაც აბესაძე წაიყვანეს მუხიანის დასახლებაში მდებარე ერთ-ერთ ბინაში და რამდენიმე საათის განმავლობაში უკანონოდ აღუკვეთეს თავისუფლება. საღამოს 9 საათისთვის ის მიიყვანეს ორთაჭალაში სასჯელაღსრულების დეპარტამენტთან, მანქანა დაუბრუნეს, გააფრთხილეს რომ მომხდარზე არავისთან არაფერი ეთქვა.
ბაჩო ახალაიას ადვოკატები _ იოსებ ჯანაშია და ბაჩუკი ყურაშვილი დღევანდელი გადაწყვეტილების აპელაციის წესით გასაჩივრებას გეგმავენ, რისი სურვილიც, მათი განცხადებით, თავად ბრალდებულმა გამოთქვა.
