ამ ინფორმაციის გადასამოწმებლად „გურია ნიუსი” ილია ჯალაღანიას დაუკავშირდა.
_ ბატონო ილია, როგორც გავიგეთ, დასავლეთ საქართველოს ოლქის პროკურატურის პროკურორად დაინიშნეთ. გილოცავთ!
_ კი, ბატონო! ძალიან დიდი მადლობა!
_ როდის დაინიშნეთ?
_ ბრძანება დღეს დაიწერება.
_ბატონო ილია, თქვენ ოზურგეთის რაიონული პროკურატურის პროკურორად ძალიან დიდი ხანი მუშაობდით. რა გახდა ორი წლის წინ, თქვენი თანამდებობიდან გათავისუფლების საფუძველი?
_ განცხადება დავწერე პირადი სურვილის საფუძველზე და წამოვედი.თუმცა, ძალიან მიყვარს ოზურგეთი და ის სითბო, რომელიც წამომყვა ოზურგეთლებიდან, მომყვება ბოლომდე.
ილია ჯალაღანია წარმოშობით იმერეთიდანაა და ოზურგეთის რაიონული პროკურატურის პროკურორის თანამდებობაზე 5 წელი მუშაობდა. მისი თანამდებობიდან წასვლის მიზეზად ოზურგეთში სხვადასხვა ვერსიები სახელდებოდა. ერთი ვერსიით, მისი გათავისუფლება ბახმაროს მიწებთან დაკავშირებულ გახმაურებულ სკანდალურ ფაქტებს უკავშირდებოდა. მეორე ვერსიით _ გურიაში ლეგალიზაციის კომისიის მიერ გაცემული მიწების პრივატიზებას.
ჩვენი წყაროს ინფორმაციით, ოზურგეთის რაიონული პროკურორი კახა კოჩივარი ოზურგეთის რაიონულ პროკურორად რჩება. კოჩივარი „გურია ნიუსთან” ამბობს, რომ ის მუშაობას ჩვეულებრივ რეჟიმში აგრძელებს.
კახა კოჩივარი ოზურგეთის პროკურორად ილია ჯალაღანიას წასვლის შემდეგ დაინიშნა. ჩვენი წყაროს ინფორმაციით, მას ჯალაღანიასთან ნათესაური კავშირიც აკავშირებს.
“გურია ნიუსის” წყაროს ინფორმაციით, კახა კოჩივარის პროკურორად დანიშვნის შემდეგ, პროკურატურამ სწორედ იმ მიწების პრივატიზების კანონიერების შესწავლა დაიწყო, რომელიც ლეგალიცაზიის კომისიის მიერ არის გაცემული 2007-2010 წლებში.
საკუთრების ხელყოფის ფაქტებს უკავშირდება გაზეთ “გურია ნიუსში” გამოქვეყნებული არა ერთი სტატია _ საქმე მხოლოდ ბახმაროს მიწებს არ ეხება. გაზეთის ინფორმაციით, მაშინ, გურიის ახალი პროკურორი, კახა კოჩივარი პირადად დაინტერესდა ყველა იმ მიწით, რომელიც სამივე მუნიციპალიტეტში ლეგალიზაციის კომისიამ გასცა. პროკურორის ინტერესის სფეროში 2 ჰექტარზე მეტი მიწის მფლობელები მოექცნენ. საქმე ეხება იმ პირებს, რომლებსაც კომისიის მიერ, 2 ჰექტარზე მეტი მიწა აქვთ დაკანონებული და იყო თუ არა მიწები კანონის დაცვით პრივატიზებული.
მაშინ მოქალაქეები, “საკუთარი სურვილით” მიწებს სახელმწიფოს უსასყიდლოდ გადასცემდნენ; გარდა ამისა, ყოჩივარის პროკურორბის პერიოდში, “გურია ნიუსის” ჩოხატაურის ოფისის ფანჯრები დღემდე დაუდგენელმა პირებმა ქვით ჩაამსხვიეს, რაზეც სამართალდამცავებს არანაირი რეაგირება არ ჰქონიათ. სხვათა შორის, ეს ფაქტი სახალხო დამცველის ანგარიშშიც მოხვდა; პროკურორს არც იმისთვის მიუქცევია ყურადღება, როცა შს გურიის სამხარეო სამმართველოს უფროსმა გიგა ჯაფარიძემ ჟურნალისტს ფოტოვიდეო გადარება აუკრძალა და ხელი შეუშალა პროფესიულ საქმიანობაში; ყოჩივარის პროკურორობის პერიოდშივე მეტად დაიძაბა კრიმინალური ფონი მთელი რეგიონის მასშტაბით და სწორედ მაშინ დააპატიმრეს ოზურგეთის გამგებელი გია ტაკიძე.
ჩვენ ამ და სხვა არაერთ, მოსახლეობისთვის საინტერესო თემებზე რამდენჯერმე მივმართეთ ყოჩივარს, თუმცა, მისგან არანაირი პასუხი არ მიგვიღია, რის გამოც, იძლებულნი გავხდით, ეს კითხვები უპასუხოდ გამოგვექვეყნებინა.
“გურია ნიუსის” უპასუხო კითხვები პროკურორ კახა კოჩივარს
ილია ჯალაღანია
კახა კოჩივარი
