ამ ადგილმონაცვლეობით პოლიტიკურმა პარტნიორებმა ორმხრივი სარგებელი მიიღეს: მარინე თურნავამ სრულიად გაუფასურებული პოლიტიკური ძალა მიატოვა და და ამჟამად სახელისუფლებლო გუნდში მყოფ პარტიაში იპოვა ადგილი, ხოლო გამოცდილმა “რესპუბლიკელმა” რომან ბიწაძემ ლანჩხუთის საკრებულოში პოზიციები გაიმყარა.
მთელ წინასაარჩევნო პერიოდში დადიოდა ხმები, რომ თურნავა “ქართული ოცნების” სასარგებლოდ მუშაობდა. საუბნო-საარჩევნო კომისიებში “ქრისტიან-დემოკრატების” კვოტით ჩასმული წევრები, არჩევნების დღესაც არა საკუთარი პარტიის, არამედ გაერთიანებული ოპოზიციური კოალიციისთვის იღვწოდნენ.
მარინე თურნავას საკმაო პოლიტიკური ალღო აღმოაჩნდა და დროზე მოასწრო ჩასაძირად განწირული ნავის დატოვება, ამას კი იმით ხსნის, რომ ბოლო დროს მისი და პარტიის ლიდერების მოსაზრებები ერთმანეთს არ ემთხვეოდა. იგი არ უარყოფს, რომ არჩევნებზე “ქართული ოცნების” პარტნიორად მოიაზრებოდა.
ლანჩხუთში აქტიურად საუბრობდნენ იმაზეც, რომ “ქრისტიან-დემოკრატიული პარტიის” სათაო ოფისიდან გადმორიცხული ფულით, რომელიც არჩევნებში გასამარჯვებლად უნდა დაეხარჯათ, ყოფილმა “ქრისტიან-დემოკრატმა” ცოლ-ქმარმა ახალი მანქანა შეიძინა, თუმცა, მარინე თურნავა მსგავსს ფაქტს კატეგორიულად უარყოფს: “ფული საერთოდ არ გადმოურიცხავთ. გვაძლევდნენ მონობარათებს, რომ ერთმანეთთან კომუნიკაცია შეგვძლებოდა. არჩევნების დღეს, რამდენიმე უბანზე ცოტაოდენი საჭმელი მივიტანეთ კომისიის წევრებისთვის. სულ ეს იყო, რომელ ფულზეა ლაპარაკი?” _ ამბობს თურნავა.
_ თქვენ პოლიტიკოსი ხართ და ვალდებულება გაქვთ საზოგადოებაში გაჩენილ კითხვებს უპასუხოთ. გავრცელდა ხმები, რომ პარტიის თანხები არამიზნობრივად დახარჯეთ…
_ ეს არის სრული აბსურდი, უაზრობა. ამდენი ფული რომ ჰქონოდათ, ერთ უბანზე ორ-სამ ხმას კი არ მიიღებდნენ. პარტიის რეიტინგი სულ უფრო ეცემოდა, ხოლო “ქრისტიან-დემოკრატების” წევრის მხარდაჭერამ ცესკოს გადაწყვეტილებისადმი, რომელიც საარჩევნო უბნებზე ფოტო და ვიდეოგადაღების აკრძალვას ეხებოდა, მათი რეიტინგი საერთოდ გაანადგურა.
_ ორი კვირის წინ, როცა თქვენ არ ესწრებოდით საკრებულოს სხდომას, რომელზეც თქვენი კოლეგების და ფრაქციის წევრების მხრიდან გაკეთდა განცხადება, რომ ახალი ფრაქციის შექმნა იგეგმებოდა. რეალურად კი სხვა შედეგი დადგა _ ახლის შექმნის სანაცვლოდ, თქვენი ფრაქცია ერთი წევრით გაფართოვდა, თქვენ კი კვლავ თავმჯდომარედ დარჩით.
_ ლევან ჩხაიძე ჩემი ძველი თანამებრძოლია და წარმოუდგენელია, ჩემთვის ეღალატა. მე არ ვიცი, ვინ რას გეგმავდა, მაგრამ დაშლის ნაცვლად, ფაქტია, რომ გავფართოვდით. დავით წულაძეც ჩვენთან დარჩა. იგი პარტია “ქართულ ოცნებაში” აპირებს გაწევრიანებას. შეგვემატა ნუგზარ ხავთასი, რომელსაც ისეთი სუფთა პოლიტიკური და ადამიანური წარსული აქვს, რომ შეუძლებელია მასზე რამე ცუდი თქვან. ამიტომ არ შეეშინდა მას ჩვენთან გადმოსვლა _ ვერავინ ვერაფერს წამოუძახებს. არ გამოვრიცხავ, რომ სხვებიც შემოგვიერთდნენ.
_ “რესპუბლიკურ პარტიაში” შესვლა თქვენი სურვილი იყო თუ აქაც პოლიტიკურ გათვლასთან გვაქვს საქმე? ცნობილია, რომ რომან ბიწაძეს კარგად ეხერხება ადამიანების დარწმუნება, მას კი საკრებულოში დასაყრდენი ესაჭიროებოდა…
_ ბატონ რომანთან მე და რეზო (მარინე თურნავას მეუღლე, იგი “ქრისტიან-დემოკრატიული პარტიის” რაიონული ორგანიზაციის თავმჯდომარე იყო) ერთად გავდიოდით კონსულტაციებს. რა თქმა უნდა, ჩემი სურვილით გადავედი. ვერავინ ვერაფერს ვერ მაიძულებს. როცა ინგა გრიგოლიამ დატოვა პარტია, ეს ჩემთვისაც ბოლო წვეთი აღმოჩნდა. მე ლანჩხუთელი ვარ, ჩემს ოჯახთან ერთად აქ უნდა ვიცხოვრო და რაც ჩემთვის და ჩემი ქალაქისთვის იქნება უკეთესი, იმ გადაწყვეტილებას მივიღებ.
_ სხვა ოპოზიციონერი დეპუტატებისგან განსხვავებით, სხდომებზე თქვენ ნაკლები ხმაურით გამოირჩევით. თქვენს სათქმელს თქვენი კოლეგა დეპუტატები ამბობენ?
_ არასოდეს არ ვიხევ უკან, როცა რამე მაქვს სათქმელი. დღესაც დავსვი შეკითხვა გამქრალ მავთულთან დაკავშირებით. იგივეს ვაკეთებ ყოველთვის, როცა რამე პრობლემაა. დათო წულაძე, მართალია ჩემზე უფრო ხმაურიანია, მაგრამ არც მე ვცდილობ დამალვას, როცა რამე არ მომწონს.
მარინე თურნავას კაბინეტში, პარტიული კონსულტანტების რანგში, უკვე დაბინავდნენ რომან ბიწაძის ერთგული თანამებრძოლები ლილი და ნინო ებრალიძეები.
