“გურია ნიუსი” ინფორმაციის გადასამოწმებლად ნინო გიორგობიანს დაუკავშირდა.
_ ქალბატონო ნინო, გავრცელდა ინფორმაცია, რომ თქვენ ინიშნებით შსს საზოგადოებრივ საქმეთა დეპარტამენტის ხელმძღვანელად. ადასტურებთ ამ ინფორმაციას?
_ კი, არის ამაზე საუბარი, მაგრამ უბრალოდ, ოფიციალურად, ჯერ არ არის გაფორმებული. იქითა კვირაში ალბათ გამოვაცხადებთ და საიტზე დაიდება.
_ ოფიციალურად ვისგან მიიღეთ თანამდებობაზე დანიშვნის შემოთავაზება?
_შინაგან საქმეთა მინისტრ ირაკლი ღარიბაშვილისგან.
შეგახსენებთ, რომ ნინო გიორგობიანი წლების განმავლობაში მუშაობდა “აირზენას” საზოგადოებასთან ურთიერთობის სამსახურის უფროსად. აირზენას დირექტორი, თამაზ გაიაშვილი კი 2012 წლის საპარლამენტო არჩევნების დროს „ქრისტიან-დემოკრატების“ სიაში პირველ ათეულში იყო. ბიძინა ივანიშვილის და მისი გუნდის დამოკიდებულება “ქრისტიან-დემოკრატების” მიმართ როგორიც გახლდათ, ქართული საზოგადოებისთვის კარგადაა ცნობილი. “ქართული ოცნება” მათ ფსევდოოპოზიციად მოიხსენიებდა.
“გურია ნიუსთან“ საუბრისას, ნინო გიორგობიანი აცხადებს, რომ მისი ყოფილი ხელმძღვანელის პოლიტიკური შეხედულებები მასთან არაფერ კავშირშია და ჯობდა, ამის შესახებ თავად გაიაშვილისთვის გვეკითხა.
_ მე არჩევნებზე ვიყავი და ჩემი პოზიცია დავაფიქსირე, თამაზ გაიაშვილთან მუშაობასა და ჩემს ახალ სამსახურს შორის ვერანაირ კავშირს ვერ ვხედავ, თუ ხელოვნურად გინდათ დაკავშირება, ეგ სხვა საქმეა, _ განაცხადა მან “გურია ნიუსთან.”
“გურია ნიუსის” ინფორმაციით, ნინო გიორგობიანი გიორგი კოდუასთანაც თანამშრომლობდა, რასაც ის კატეგორიულად უარყოფს და აცხადებს, რომ გიორგი კოდუასთან, არასდროს უთანამშრომლია და მათი ურთიერთობა მხოლოდ სატელევიზიო დებატებით შემოიფარგლებოდა.
შეგახსენებთ, რომ 2010 წელს, ნინო გიორგობიანი პრეზიდენტმა მიხეილ სააკაშვილმა ღირსების ორდენით დააჯილდოვა.
რაც შეეხება სალომე მახარაძეს, ის “გურია ნიუსთან” აცხადებს, რომ განცხადება საკუთარი ნებით, როგორც მას თხოვეს, არ დაწერა.
_ ახლა ზუსტად გეტყვით, რაც არის. სიტყვა-სიტყვით ჩაიწერეთ. ცოტა ურთიერთ გამომრიცხავი რაღაცეები სახელდება. მე, გუშინ ბატონმა ირაკლიმ დამიბარა და მითხრა, რომ ჩემთან დაკავშირებით მას არანაირი პრობლემა არ აქვს, ძალიან მადლიერია და აღფრთოვანებულია ჩემი პროფესიონალიზმით. ამ ერთი თვის განმავლობაში მართლა კარგად ვიმუშავეთ. საკმაოდ დამყოლი და ღია მინისტრია. მითხრა, რომ ძალიან წყდება გული. ამ ადამიანმა მართლა ინერვიულა, მაგრამ მას აქვს მითითება, რომ ასეთ თანამდებობებზე აუცილებლად უნდა დაინიშნოს მეგობრები და ვთქვათ არა პროფესიონალური ნიშნით, ამიტომ ის იძულებულია, თანამდებობაზე მოყვანოს თავისი მეგობარი.
ბატონმა ირაკლიმ შემომთავაზა, უსამსახუროდ რომ არ დავრჩენილიყავი მემუშავა სადმე სხვაგან. მითხრა, რომ იფიქრებს და რამეს მომიძებნის. მე უარი ვუთხარი. იმიტომ, რომ ეს პროფესია მაქვს, განათლებითაც და პრაქტიკითაც ჟურნალისტის ვარ და მე პატივს ვცემ პროფესიონალიზმს. დამიჯერეთ, ბატონი ირაკლი ძალიან უხერხულ მდგომარეობაშია. მან პირდაპირ მითხრა, რომ მასზე არ არის ეს მარტო დამოკიდებული. ის ჩემთან ძალიან კომფორტულად გრძნობდა თავს, რადგან ვთავსდებოდით რაღაცეებზე და ამ დღეების განმავლობაში, ერთობლივად ვაკეთებდით ყველაფერს. მიუხედავად იმისა, რომ ბოლო პერიოდში სამი მინისტრი შევიცვალე და ჩემთვისაც ძალინ რთული იყო, ძალიან კარგად ვიმუშავეთ ერთად ამ ერთი თვის განმავლობაში. მაგრამ მითხრა, რომ მას აქვს მითითება, აუცილებლად დანიშნოს მეგობარი. ძალიან ინერვიულა. პირდაპირ გეუბნებით, ძალიან ვუთანაგრძნობ ბატონ ირაკლის, იმიტომ რომ საკმაოდ რთული საქმის დასაწყისშია და იძულებულია, დინების საწინააღმდეგოდ იაროს, _ განაცხადა ჩვენთან საუბრისას სალომე მახარაძემ.
