ეკლესია, რომელიც XII საუკუნის II ნახევრით თარიღდება, სოფლის ცენტრში, შემაღლებულ ბორცვზე მდებარეობს. გალავანი, რომლის ნაწილიც ჩამოინგრა, ქვისაა და მასში დატანებულია თლილი ქვით ნაგები ოთხკუთხიანი სამრეკლო. მას ხის სახურავი აქვს, რომელიც ოთხ, ძალზე მახვილ ქვის სვეტს ეყრდნობა. მის ქვეშ ორი ზარია. სამრეკლოს ორივე ფასადი ყურძნის მტევნებისა და ხის ფოთლების გამოსახულებითაა მოჩუქურთმებული. სამრეკლოზე არის წარწერა და გამოკვეთილია ვერძის თავი.
ეკლესიის შენობაც იმავე ქვითაა ნაშენი და დარბაზული ტიპის ნაგებობაა. დასავლეთიდან მიშენებული აქვს კარიბჭე, რომელიც, ექსპერტების თქმით, მოგვიანებით უნდა იყოს მიდგმული. ეკლესიას ეტყობა გადაკეთებათა კვალი.
როგორც ლიხაურელები ამბობენ, ეს ტაძარი მათი სოფლის მფარველია და შეშფოთებულები არიან მომხდარით. მიიჩნევენ რომ ეს ფაქტი კარგის მაუწყებელი არ არის და ხელისუფლებისგან სპეციალური კომისიის შექმნას და გალავნის სასწრაფოდ აღდგენას ითხოვენ.
შემოქმედელი მთავარეპისკოპოსი, მიტროპოლიტი მეუფე იოსები, ჩვენთან საუბრისას ამბობს, რომ საშიში არაფერია და ჩამონგრეულ გალავანს ხელისუფლება და ძეგლთა დაცვის სააგენტო აღადგენს.
შპს “გზამშენი 18“-ის ხელმძღვანელის, თემურ ჯახვას ინფორმაციით, გაწმენდითი სამუშაოები და გალავნის გამაგრება მხოლოდ სპეციალისტების დასკვნის საფუძველზე უნდა მოხდეს:
_ გალავნის ნაწილი გასულ კვირას ჩამოინგრა. სოფლის ხელმძღვანელობამ მთხოვა, აღდგენითი სამუშაოები ჩამეტარებინა. ორშაბათს ვიყავი ლიხაურში, თუმცა, სამუშაოები არ დამიწყია. ხელისუფლებას უკვე ვუთხარი, რომ ეს არის უნიკალური ძეგლი და ამიტომ სასწრაფოდ უნდა მოვიწვიოთ სპეციალისტები, რომლებმაც უნდა დადონ დასკვნა, თუ რა ტიპის ნაგებობა შეიძლება გაკეთდეს. ამის შემდეგ უნდა შეგროვდეს საპროექტო დოკუმენტაცია. ნაგებობა ძალიან რთულია და მას ჩვენი საპროექტო სამსახური ვერ გაწვდება. სწორედ ამიტომ მოვთხოვე, რომ ჩამოიყვანონ როგორც ძეგლთა დაცვის სპეციალისტები, ასევე საპროექტო სამსახურის წარმომადგენლები. ჩემი გაანგარიშებით, ამ ეტაპზე სამუშაოების ღირებულება, დაახლოებით, 150 000 ლარს შეადგენს. უნდა ითქვას ისიც, რომ თუკი სამუშაოებს ახლა არ დავიწყებთ, არ არის გამორიცხული, რღვევა გაგრძელდეს, _ აღნიშნა ჯახვამ.
მისივე თქმით, გალავნის ნაწილის ჩამონგრევა სიძველის გამო მოხდა.
_ ნაგებობა 7-8 საუკუნის წინ არის აგებული. მას შემდეგ ნიადაგების ევოლუცია მოხდა, გალავანმა მდგრადობაც დაკარგა. ჩემი აზრით, თუკი გამაგრებით სამუშაოებს დროულად დავიწყებთ, ტაძარს საფრთხე არ ემუქრება.
როგორც ამბობენ, გალავნის ნაწილთან ერთად, დაზიანებულია მიმდებარე ტერიტორიაზე განთავსებული საფლავები. სპეციალისტები არ გამორიცხავენ, რომ სამუშაოების დაგვიანებით, შესაძლოა, უფრო მძიმე შედეგები მივიღოთ.
