არ თოვს, არააა!!!

ინფორმაციას თან ახლა დიდთოვლობის დამადასტურებელი ვიდეოკადრები.
ეს ვიდეოკადრები, როგორც ჩანს ძველი გადაღებული იყო, რადგან 22 თებერვალს ჩოხატაურში თოვლი, პრაქტიკულად, არ არის. სააგენტოების მიერ გავრცელებული ინფორმაციის თანახმად, პრობლემებია მაღალმთიან სოფლებში _ ქვაბღასა და ზემო სურებში. ერთ-ერთი საინფორმაციო სააგენტო აქვეყნებს ჩოხატაურის მუნიციპალიტეტის საკრებულოს თავმჯდომარის ანტონ ხუნდაძის კომენტარს, რომ სოფელ ჩხაკაურაში 5 მეტრი თოვლია(?!).
Мგურია ნიუსი” ჩხაკაურელებს დაუკავშირდა. მათი თქმით, დიდი თოვლი ნამდვილად იყო, თუმცა, არა 5 მეტრი და ამ ეტაპზე სოფელში ცენტრალური გზა გაწმენდილია. ჩხაკაურელებმა არ დაადასტურეს სააგენტოების მიერ გავრცელებული ინფორმაცია, რომ სოფელში 21 თებერვალს, ზვავი და მეწყერი ჩამოწვა.
ჩოხატაურის მუნიციპალიტეტის გამგებლის, გია გიორგაძის თქმით, ზღვის დონიდან თითქმის 2000 მეტრზე მდებარე სოფელში თოდთოვლობამ პრობლემები, მართალია, წარმოშვა, თუმცა, არა ისეთი რომ ადგილობრივი ძალებით ვერ მორეოდნენ. ზვავისა და მეწყრის ჩამოწოლის ფაქტი გიორგაძემაც უარყო.
ანტონ ხუნდაძე ამბობს, რომ ინფორმაცია, რომელიც 22 თებერვალს გავრცელდა დიდთოვლობასთან დაკავშირებით, ძველია. საკრებულოს თავმჯდომარე ვერ ხსნის, რატომ დაიდო ერთ-ერთი სააგენტოს ვებგვერდზე ძველი ინფორმაცია 22 თებერვალს.
რაც შეეხება სურებს, აქ თოვლის საფარი ნახევარ მეტრს არ აღემატება და ერთი კვირაა, ჩოხატაურთან დამაკავშირებელი გზა გაწმენდილია. შესაბამისად, გზაზე ტრანსპორტი ჩვეულ რეჟიმში მუშაობს.
ჩოხატაურელები, რომლებიც საინფორმაციო საშუალებებში Мსაკუთარი პრობლემების” შესახებ ისმენენ, ამბობენ, რომ “მსგავსი ინფორმაციების გავრცელებით ვიღაც ფულს შოულობს”:
_ როგორც ჩანს, ხელისუფლებას ძალიან გაუჭირდა. ახლა საბუთებს გააკეთებენ, რომ გზები გაწმინდეს, ძალიან ბევრი ფული დახარჯეს, რომ გამგებლის სარეზერვო ფონდი ამას მოხმარდა და ბიუჯეტში შექმნილ დეფიციტსაც ამას მიაწერენ. ასეთი ტყუილი გაგონილა? ისე წავიდა ეს დალოცვილი თოვლი, რომ უკან მოხედვა ვერ მოვასწარით და ამათ კი ახლა ატეხეს განგაში, დიდთოვლობააო! _ გვითხრეს რიგითმა მოქალაქეებმა.
_ როცა მართლა თოვლი იყო, მაშინ არ უთქვამთ არაფერი _ გზა არ იყო გაწმენდილი, შუქიც არ გვქონდა და არავინ არაფერს გვიხსნიდა. მაშინ არცერთ ცენტრალურ საინფორმაციო საშუალებას არ უთქვამს, რომ გურიაში დიდი თოვლი მოვიდა. დღეს კი, ამ მზიან ამინდში, თოვლი მხოლოდ გორაკებზე რომ არის შემორჩენილი, ძველ კადრებს ატრიალებენ და ცუდადაა გურიის საქმეო, გაიძახიან. შვილმა დამირეკა თბილისიდან, შეშინებული იყო. როგორ შეიძლება ხალხის ნერვებზე ასე ითამაშონ?! _ გაბრაზებას არ მალავენ ჩოხატაურში.