“გურია ნიუსის” ოზურგეთის განყოფილებას მის დანიშვნასთან დაკავშირებით არაერთმა მოქალაქემ მიმართა და საკუთარი აზრის დაფიქსირება ითხოვა. ყოფილი რაიკავშირის თავმჯდომარე ვანო კალანდარიშვილი და რამდენიმე თანამშრომელი “გურია ნიუსთან” ყვებიან, როგორ დაიბარეს პროკურატურაში და როგორ აჩუქებინეს ქონება სახელმწიფოს.
ვანო კალანდარიშვილი: _ 2000 წლიდან მე ვიყავი ოზურგეთის რაიკოოპერატივის გამგეობის თავმჯდომარე, ქონების წართმევა მოხდა 2006 წელს. ეს ასე დაიწყო: საჯარო რეესტრში მოვიდა ცნობა, რომელსაც ხელს დავით კეზერაშვილი აწერდა, ამ შენობის დაყადაღებაზე. ყოველგვარი ოპერაცია შეაჩერა საფინანსო პოლიციის მაშინდელმა უფროსმა კეზერაშვილმა. ანუ, შეჩერდა ყოველგვარი ყიდვა-გაყიდვის უფლება. 208 მეპაიე ჰყავდა ამ შენობას, რაიკავშირს.
2006 წელს, მე პირადად მიბარებს პროკურორი ილია ჯალაღანია, ეს იყო თებერვალი და მეუბნება, მომიტანე დისლოკაცია, ჩამონათვალიო, თუ არა, ამოღების ოქმს გავაფორმებო. მეც მივუტანე. შემდეგ მეუბნება: უნდა წავიდეთ ერთად ქუთაისში და შევხვდეთ საოლქო პროკურორსო. მაშინ გამგებელი იყო ვალერი ჩიტაიშვილი, მოადგილე ივანე ტაბატაძე.
გამგებლის მანქანით წავედით მე და ტაბატაძე ქუთაისში. იქ დაგვხვდა ადეიშვილის პირველი მოადგილე და ასევე, დასავლეთ საქართველოს რაიკავშირის თავმჯდომარეები. იქ გამოგვიცხადეს, _ თქვენ გინდათ თუ არ გინდათ, ოფიციალურად ქონება უნდა ჩააბაროთ სახელმწიფოსო.
ამის შემდეგ მიბარებს ყოველდღე ილია ჯალაღანია, მიმატანინა მეპაიეთა სიები, რადგან უნდა ჩატარებულიყო კრება, კრების გარეშე ეს მოხდებოდა. რა თქმა უნდა, ძნელი იყო მეპაიეთა უმრავლესობის დათანხმება ამ პროცესზე. იძულებული ვიყავი, ზოგიერთთან მე მეწარმოებინა საუბარი, ბევრს ვერ ვითანხმებდი და ზოგიერთს თვითონ ჯალაღანია იბარებდა და ახდენდა ზეწოლას. ვინც ურჩი მეპაიე იყო, იმას ემუქრებოდა, თუ ვინმეს ოჯახის წევრი მუშაობდა, გაათავისუფლებდნენ ან დაიჭერდნენ.
_ ამას ყველაფერს ილია ჯალაღანია აკეთებდა?
_ კი, კი, რა თქმა უნდა. ამის შემდეგ დამანიშნინა რიგგარეშე სხდომა, 2016 წლის 12 აპრილს. ამ სხდომას სჭირდებოდა მეპაიეების წინასწარი გაფრთხილება და ის მეპაიეების გასართხილებელი მოსაწვევები თვითონ პროკურატურის კომპიუტერში ამობეჭდა. დამარიგებინა მოსაწვევები, კრებას სჭირდებოდა ნოტარიუსი, რადგან დაემტკიცებიდა კრების ოქმი, ნოტარიუსი მაშინ კურსებზე იმყოფებოდა და დაურეკა სასწრაფოდ, მოხსნა კურსებიდან და ჩამოიყვანა, მანვე შეუკვეთა ყოფილი რუდოს შენობა, იქ დიდი კლუბია,სხვაგან ვერ დავეტეოდით ამდენი მეპაიე, კრებას 110 კაცი მაინც სჭირდებოდა, ერთი მესამედი. მივედით და დაგვხვდა უშიშროების მთლიანი შემადგენლობა: შალვა ბოლქვაძე რომელიც მაშინ უფროსი იყო, ასევე ვანო საჯაია, თვითონ ჯალაღანია. ჩატარდა კრება და კრების თავმჯდომარედ დაგვინიშნეს მაშინდელი საგადასახადო ინსპექციის უფროსი აწ.უკვე გარდაცვლილი მიშა მიქატაძე. ის მეპაიეც იყო. რამდენიმე პირი წინააღმდეგი წავიდა, თუმცა, კრება ჩატარდა და მივიღეთ გადაწყვეტილება, _ ნებით თუ უნებლიეთ ქონება გადაეცა სახელმწიფოს.
კრების შემდეგ წამოგვიყვანეს პროკურატურაში, ჯალაღანიას კაბინეტში, სადაც ამობეჭდეს ამ კრების ოქმი, რომელიც ჩვენ შევადგინეთ. ამის შემდეგ, ფაქტობრივად, ჩაიბარეს ეს შენობა მათ.
_ ანუ, იძულების წესით ჩამოგართვეს ქონება?
_ კი, ეს იყო ძალოვნების მიერ, კონკრეტულად კი პროკურორის მიერ იძულების გზით ჩამორთმეული ქონება.
_ როგორ ვითარდება ამის შემდეგ მოვლენები?
_ გადავეცით ქონება, მე შემაქმნევინეს კომისია. ქონება ჩაიბარა ეკონომიკის სამინისტრომ. ამის შემდეგ, როგორ გაყიდეს ქონების ნაწილი, სად და ვის მიყიდეს, დამამტკიცებელი საბუთები უკვე აღარ გვაქვს. ამის შემდეგ, მიბარებდნენ ყველა კვირაში ქუთაისში, საფინანსო პოლიციაში და რა ზეწოლა იყო ჩემზე, ვერ აგიღწერთ.
_თქვენ ხომ ჩააბარეთ ქონება, ზეწოლა რატომ ხდებოდა მერე?
_ გვამუშავებდნენ, შიშის ფაქტორი იყო, _ თუ არ გაჩერდებით და სადმე იტყვით, საფინანსო პოლიცია დაგადგებათ და ნახავთო. რა გგონია, ვერ დაგიჭერთო? ასე გაგვაჩერეს.
საინტერესო, იცით, რა არის? ეს ქონება წაიღეს და ერთი თვის შემდეგ მირეკავენ და მეუბნებიან, საქართველოს პროკურატურიდან ვართო და წადი ახლა ფოთში და ხელახლა დაარეგისტრირე ეს შენობაო.იმიტომ, რომ რაიკავშირს მაშინ ჰქონდა ვალი და არ უნდოდათ, რომ ეს ვალით წაეღოთ და ამიტომ თავიდან დაარეგისტრირეს ორგანიზაცია. ის ვალი კი, მე მაწერია. სულ მეძახიან სააღმსრულებლოში. რაიკავშირმა მაშინ მოსახლეობაში დაარიგა მარილი და პურის ფქვილი, რომელიც ხელისუფლებას უნდა გადაეხადა, მაგრამ არაფერი. ყველა ჩვენ გვაწერია.
ნორა მოლარიშვილი: “აქ ვიმუშავე 35 წელი , როცა გაიხსნა ეს რაიკოოპერატივი, იმ დღიდან ვმუშაობ . ეს მოხდა 2006 წელს. მოიწვიეს სხდომა მაღაროთა სამმართველოს კლუბში, ვიყავით მეპაიეები და გამოგვიცხადეს, რომ გადაგვეცა სახელმწიფოსთვის ეს ქონება. თუმცა, ოქმში ჩაიწერა, რომ თუ გაიყიდებოდა აუქციონზე, პირველს ჩვენ _ თანამშრომლებს უნდა გვეყიდა. თუ ჩვენ ვერ ვიყიდდით, მერე უნდა გაყიდულიყო აუქციონზე. მერე კი ჩვენთვის არავის არაფერი შეუტყობინებია. გაიყიდა. ჩვენ გვეუბნებოდნენ, თითქოს, მილიონად არის ეს შეფასებული და თქვენ ვერ შეძლებთ ყიდვასო, მაგრამ როგორც გავიგეთ, ძალიან იაფად გაიყიდა. „ პროკრედიტ ბანკი“ სადაც არის განთავსებული, ის ადგილი მთლიანად იყო ჩემი სექცია და გაიყიდა 30 000 ლარად. შემდეგ ეს 80 000 ლარად გაყიდა. ეს იყო ჩვენი, რომელიც არ უნდა გაყიდულიყო საერთოდ, ეს არ იყო სახელმწიფოსი, ეს იყო ხალხის ქონება. ისე ჩამოგვართვეს ამხელა ქონება, არავის არაფერი უკითხვას.
ჩვენ არ გავჩერდებით, ვაპირებთ გასაჩივრებას. ეს იყო ჩვენი საკუთრება, რომელიც იჩუქნიეს ძალით და გაყიდეს შემდეგ. ალბათ წილებში იქნებიან. ჩვენ იქ 40 და 26 წელი ვმუშაობდით. მოგვატყუეს, მაგრამ არავის არაფერი არ შერჩება_ ამბობენ „გურია ნიუსთან“ კვაჭანტირაძე დოდო და ხომერიკი იზოლდა”.
ივანე ტაბატაძე, რომელიც 2006 წელს გამგებლის ვალერი ჩიტაიშვილის მოადგილე იყო, “გურია ნიუსთან” ადასტურებს ფაქტს, რომ ის და ვანო კალანდარიშვილი ნამდვილად იყვნენ ქუთაისში დასავლეთ საქართველოს საოლქო პროკურატურაში რაიკავშირის ქონების გადაცემასთან დაკავშირებით: _ კი ბატონო, ნამდვილად ვიყავი ქუთაისში. ვესწრებოდო შეხვედრას, სხვათაშორის, მარტო ოზურგეთიდან არ ვყოფილვართ, იქ იყო ყველა რაიონის გამგებლები ან მოადგილეები და რაიკავშირის ყოფილი დირექტორები.
დასავლეთ საქართველოს საოლქო პროკურატურის ახალდანიშნული პროკურორი ილია ჯალაღანია “გურია ნიუსთან” აცხადებს, რომ ვანო კალანდარიშვილი ახსოვს, მაგრამ უკანონოდ არაფერი გაუკეთებია.
_ ბატონო ილია, ვანო კალანდარიშვილი ასეთი პიროვნება გახსოვთ?
_ კი ბატონო, როგორ არა, მახსოვს.
_ ვანო კალანდარიშვილი, რომელიც მაშინ რაიკავშირის ყოფილი თავმჯდომარე იყო, აცხადებს, რომ 2006 წელს თქვენ პირადად დაიბარეთ და განუცხადეთ, რომ ეს შენობა რომელიც იყო მეპაიეთა საკუთრება, “ჩუქების” სახით ჩამოგერთვათ მათთვის…
_ დიახ, უკვე მივხდი რასაც ეხება. ახლავე აგიხსნით, რომ თქვენ თვითონაც იყოთ საქმის კურსში რა და როგორ მოხდა. ასეთი ფაქტი ნამდვილად იყო, რომელიც ილია ჯალაღანიას ინიციატივა ნამდვილად არ იყო, ეს განხორციელდა მთელი საქართველოს მასშტაბით.
თვითონ რაიკავშირის ხელმძღვანელობამ მიიღო ასეთი გადაწყვეტილება. უვარგისი შენობები, რომელიც მოუვლელი იყო, გადაეცა სახელმწიფოს. პროკურატურის კურსი, ამ შემთხვევაში, ნამდვილად არ იყო, უბრალოდ ევალებოდა ასეთი შენობების აღრიცხვა, რა ქონება იყო. ამ ქმედებაში პროკურატურას არანაირი მონაწილეობა არ მიუღია.
ძალიან გთხოვთ რა, გაიგეთ სწორად, არანირი ზეწოლა არ ყოფილა პროკურატურის მხრიდან. ეს მოხდა ყველა რაიონში. ჩემი თხოვნა იქნება ობიქტურად გააშუქეთ და გადაუმოწმებელ მასალებს ნუ დადებთ!
_ ბატონო ილია, იქნებ გვითხრათ რას გულისხმობთ, რა გავაშუქე არაობიექტურად?
_ თქვენზე ნამდვილად არ ვსაუბრობ, თქვენ არ გგულისხმობთ, _ გვითხრა ილია ჯალაღანიამ.
