ისინი ამბობენ, რომ იმ შემთხვევაში, თუ მათი მოთხოვნები დაკმაყოფილებული არ იქნება, ისინი გაიხდიან ხალათებს, დაჯდებიან საავადმყოფოს კიბეზე და შიმშილობას გამოაცხადებენ. სამედიცინო ცენტრის მედპერსონალი, არსებული ხელფასების შენარჩუნებას და კოლეგების სამუშაოზე დატოვებას ითხოვენ.
კომპანიის მიერ ამ ხნის განმავლობაში განხორციელებული ქმედებების შესწავლის მოთხოვნით “უნიმედი აჭარა ქობულეთის სამედიცინო ცენტრის” შრომითმა კოლექტივმა, 2 ნოემბერს საჩივრით მიმართა საქართველოს მთავარ პროკურორს, არჩილ კბილაშვილს; პარლამენტის ჯანდაცვის კომიტეტის თავმჯდომარეს დიმიტრი ხუნდაძეს; შრომის, ჯანმრთელობისა და სოციალური დაცვის მინისტრს დავით სერგეენკოს; “ქართული ოცნება – დემოკრატიული საქართველოს” ადამიანის უფლებათა დაცვის კომიტეტის თავმჯდომარეს თედო კობახიძეს. საჩივარს ხელს 140 ექიმი აწერს:
_ არ არის არანაირი პირობები, არის ანტისანიტარია, სივიწროვე, სამშობიარო ბლოკის გვერდით კარდიოლოგიური პალატებია, 10-საწოლიან მელოგინეთა და ორსულთა განყოფილებას (ამას ზედ ემატება მედპერსონალიც) ერთი საერთო სველი წერტილი აქვს, ონკანიც აქვეა განთავსებული და ჭურჭელიც აქ ირეცხება. ბავშვთა განყოფილებას კი ონკანი საერთოდ არ გააჩნია. მიუხედავად იმისა, რომ ამ ყველაფრის შესახებ პირველი დღიდანვე იცოდა “ალდაგის” წარმომადგენელმა, “ჩემი ოჯახის კლინიკის” საოპერაციო დეპარტამენტის დირექტორმა გიგა ნემსაძემ, მდგომარეობა უცვლელი რჩება. მიუხედავად ჩვენი არაერთგზის თხოვნისა, რომ მოეწესრიგებინათ ელემენტარული ჰიგიენური პირობები, კომპანიამ ყურადღებაც არ მოგვაქცია. მათ არ გაითვალისწინეს არც ის, რომ ჩვენ პასუხისმგებლები ვართ თითოეული პაციენტის ჯანმრთელობაზე, რაც არსებულ პირობებში რისკის ქვეშ იდგა.
…წინასაარჩევნო პერიოდში “ალდაგი ბისიაიმ” გადაწყვიტა შეემცირებინა ტარიფები და სექტემბრის თვეში კონსულტაცია გახდა 10 ლარი, ამჟამად კი ეს მომსახურება 25 ლარს შეადგენს, 400-ლარიანი მშობიარობა გახდა 600 ლარი; 290-ლარიანი რეანიმაცია _ 450 ლარი. ერთი ღამის საფასური სამკურნალოდ შემოსული პაციენტებისთვის, თანაც ყოველგვარი პირობების გარეშე, 100-ლარი ღირს. კლინიკაში არსებულმა ფასების შეცვლამ მოსახლეობაში გამოიწვია უკმაყოფილება და მათი რაოდენობა მნიშვნელოვნად შემცირდა. გარდა ამისა, გაზრდილი ფასების გამო, პაციენტების მხრიდან არაერთხელ ჰქონია ადგილი ექიმების სიტყვიერ შეურაცხყოფას.
მომატებულ ფასებთან შედარებით, კატასტროფულად გამოიყურება ექიმების ხელფასები, რადგანაც ქობულეთელი ექიმების საშუალო ხელფასი საარსებო მინიმუმზე დაბალია (100-იდან 120 ლარამდე მერყეობს),” _ ნათქვამია საჩივრის ტექსტში.
ექიმები ამბობენ, რომ თუ კომპანია მათ მოთხოვნებს არ შეასრულებს, ისინი პოზიციებს არ დათმობენ. პოზიციას არც “ალდაგი ბისისაი” და მისი შვილობილი კომპანია “ჩვენი ოჯახის კლინიკა” თმობს. როგორც ექიმები ამბობენ, დღემდე არ აქვთ მიღებული საკონტრაქტო პირობები და არც ის იციან, რა სახის კონტრაქტს სთავაზობს მათ კომპანია.
_ მიუხედავად იმისა, რომ კომპანიის წარმოამდგენლებს არაერთხელ ვთხოვეთ, ეჩვენებინათ ჩვენთვის კონტრაქტი, რომლის გაფორმებასაც აპირებენ, მათ უარი გაგვიცხადეს ამაზე. რატომ, ჩვენ არ გვაქვს უფლება, კონტრაქტი, რომელსაც გვთავაზობენ, სხვა, დამოუკიდებელ იურისტს ვაჩვენოთ? ორი შეხვედრა შედგა თბილისში “ალდაგის” წარმომადგენლებთან და არცერთი მოთხოვნის დაკმაყოფილებას არ აპირებენ. უფრო მეტიც, როდესაც მენეჯერის თანამდებობაზე ადგილობრივი კადრი მოვითხოვეთ, ჩვენი კოლექტივიდან, იცით რა გვიპასუხეს? _ თქვენ ალბათ “კარენოი” ქობულეთელი გინდათ, კარგი დედ-მამიშვილიო. ასე ცინიკურად გვიპასუხეს ჩვენს მოთხოვნაზე.
გუშინ, ზუგდიდიდან გამოუშვეს მენეჯერები ჩვენთან. საინტერესოა, ამ ადამიანებს აქ ჭირდებათ საცხოვრებელი, გზის ხარჯები და აქვთ მაღალი ხელფასი, ამისთვის აქვს “ალდაგს” ფული და ჩვენ, 30, 50 და მაქსიმუმ 100 ლარიან ხელფასზე გვიპირებენ გვამუშავონ, თანაც ამ პირობებში, სადაც ელემენტარული ჰიგიენური ნორმებიც არ არის დაცული, _ აცხადებენ “გურია ნიუსთან” ექიმები.
ექიმებს პროტესტს გუშინ, აჭარის ჯანდაცვის მინისტრის ნუგზარ სურმანიძის, მისი მოადგილის რომან ბოლქვაძის, აჭარის უმაღლესი საბჭოს ქობულეთის მაჟორიტარი დეპუტატის ანზორ თხილაიშვილის და უმაღლესი საბჭოს ჯანდაცვის კომიტეტის თავმჯდომარის ჯემალ ფუტკარაძის ვიზიტი მოჰყვა.
ქობულეთის მაჟორიტარი დეპუტატი ანზორ თხილაიშვილი “გურია ნიუსთან” საუბრისას აცხადებს, რომ ის ექიმებს არავის დააჩაგვრინებს და თუ ისინი შიმშილობას დაიწყებენ, ისიც მათ შეუერთდება.
_ ჩვენ ექიმებთან ერთად შევხვდით “ალდაგის” წარმომადგენლობას და მოვისმინეთ მათი პრეტენზიები. თუმცა, სიმართლე გითხრათ, კონკრეტული პასუხი კომპანიის წარომადგენლებისგან ვერ მოვისმინეთ, რადგან ამბობდნენ, რომ ისინი არ იყვნენ პასუხისმგებელი პირები.ამიტომ, ჩვენ მოვითხოვეთ, ჩამოსულიყვნენ და შეგვხვედროდნენ ის ადამიანები, რომლებსაც კონკრეტულ კითხვებზე ექნებათ პასუხები. ჩვენ ამ საკითხთან დაკავშირებით შეხვედრას ვაპირებთ აჭარის მთავრობის თავმჯდომარესთან, არჩილ ხაბაძესთან და მას გავაცნობთ დეტალებს.
მე გუშინაც ვთქვი და ახლაც ვამბობ, რომ თუ ექიმები პროტესტის ამ ფორმას მიმართავენ, მეც მათ შევუერთდები, მაგრამ ვფიქრობ, რომ საქმე აქამდე არ მივა და ყველაფერი მოგვარდება, _ განაცხადა ანზორ თხილაიშვილმა.
რაც შეეხება ქობულეთის მაჟორიტარ დეპუტატს პარლამენტში, ფატი ხალვაშს, ის გუშინდელ აქციაზე არ გამოჩენილა. ექიმების განცხადებით, ისინი დაუკავშირდნენ მათი რაიონის წარმომადგენელს საკანონმდებლო ორგანოში, რომელმაც განაცხადა, რომ კერძო კომპანიასთან პრობლემის გადაჭრაში ის მათ ვერ დაეხმარებოდა.
გურია ნიუსი ფატი ხალვაშსაც დაუკავშირდა.
_ ქალბატონო ფატი, როგორც გვითხრეს, ექიმებს განუცხადეთ, რომ კერძო კომპანიასთან პრობლემას ვერ გადავჭრითო და არ ჩასულხართ აქციაზე გუშინ…
_ კერძო კომპანიაში ჩვენ შესვლის და ჩარევის უფლება არ გვაქვს. ჩვენ მას ვერ მივუთითებთ, მაგრამ შეიძლება სახელმწიფო ჩაერიოს, ან აუდიტი შევიდეს თუ არამიზნობრივად იხარჯება თანხები. ჯანდაცვის სამინისტროს აქვს ამის უფლება, იმიტომ რომ სახელმწიფოს ბიუჯეტიდან ფინანსდება ის პროგრამები, რასაც ეს კომპანია ახორციელებს. ამიტომ კონკრეტულად, დეპუტატს მე არ მაქვს უფლება. მაგრამ ექიმების და ადამიანების უფლებები რომ ირღვევა, ამ საკითხებით დავინტერესდები, რატომ ხდება.
_ დაინტერესებაში რას გულისხმობთ? უკვე ორი კვირაა, ქობულეთელი ექიმები გაფიცვის რეჟიმში იმყოფებიან და პროკურატურაშიც შეიტანეს საჩივარი. მიწოდეთ პრობლემების შესახებ ინფორმაცია ჯანდაცვის მინისტრს დავით სერგეენკოს?
_ სერგეენკოსთან ეს საკითხი არ დამიყენებია, მაგრამ, მე დავაყენე ეს საკითხი პარლამენტის ჯანდაცვის კომიტეტში. ზუსტად ახლა ამ საკითხთან დაკავშირებით ველაპარაკებოდი ქალბატონ გუგულის, რომელიც ჯანდაცვის კომიტეტის თავმჯდომარის მოადგილეა. ვესაუბრე მანანა კობახიძეს, ეკა ბესელიას და ვთხოვე, რა სახით შეიძლებოდა ჩვენი ჩარევა. აჭარის მთავრობის მეთაურს, ხაბაძესაც ველაპარაკე და მაქვს გარკვეული რეკომენდაციები და დაველაპარაკები ქობულეთის ექიმებს.
ექიმები აცხადებენ, რომ მხოლოდ ერთი _ ქალთა სამეანო განყოფილებიდან, 16 ადამიანი გაათავისუფლეს, საერთო ჯამში, კი 40 მდე პერსონალია გათავისუფლებული, მათ შორის მედდები.
რაც შეეხება ალდაგის შვილობილ კომპანია “ჩემი ოჯახის კლინიკას”, ჩვენთან სატელეფონო საუბრისას, თავიდაპირველად ისინი აცხადებდნენ, რომ 15 ადამიანის, ტექპერსონალის გათავისუფლებაზე იყო საუბარი.
თუმცა, ჩვენთვის გამოგზავნილი ოფიციალური წერილის თანახმად, რომელიც მათგან 30 ოქტომბერს მივიღეთ, ირკვევა შემდეგი:
“30 ოქტომბერს, ქობულეთის სამედიცინო ცენტრის ადმინისტრაციის გადაწყვეტილებით კლინიკაში დასაქმებული 316 თანამშრომლიდან 34 თანამშრომელს (მათ შორის მედპერსონალი 23, დანარჩენი ტექნიკური სამსახური და ადმინისტრაცია), რომელსაც 1 ნოემბრამდე ქონდა კონტრაქტი, აღარ გაუგრძელდა შრომითი ხელშეკრულება. მოხდა აღნიშნული კადრების სარეზერვო რეჟიმში გადაყვანა კლინიკისთვის, რომლის გახსნაც იანვარშია დაგეგმილი, სადაც ვაკანტურ თანამდებობებზე პირველ რიგში სწორედ ამ სარეზერვო კადრებს განიხილავენ.“
ამ განცხადებასთან დაკავშირებით, ქობულეთელი ექიმები აცხადებენ, რომ არ სჯერათ კომპანიის და არ ენდობიან:
_ თუკი ამ ადამიანების დასაქმებას იანვრიდან მაინც აპირებენ, ერთი თვით მათი გათავისუფლება არანაირ ლოგიკაში არ ჯდება, მითუმეტეს მაშინ, როდესაც კლინიკა მომგებიანია და საკმაოდ დიდი შემოსავალიც შეჰქონდა, _ აცხადებენ ექიმები.
დღეს, აღნიშნული საკითხი აჭარის მთავრობის ხელმძღვანელთან უნდა განიხილონ. ექიმები პასუხს ელოდებიან, წინააღმდეგ შემთხვევაში შიმშილობის დაწყებას აპირებენ.
დღესვე, “გურია ნიუსი” ვრცელ მასალას შემოგთავაზებთ ქობულეთელი ექიმების 2 კვირიანი პროტესტის მიზეზებზე. ასევე, შემოგთავაზებთ ინტერვიუს ყოფილ სამედიცინო მენეჯერთან ზაალ მიქელაძესთან, რომელმაც საკუთარი ნებით დატოვა თანამდებობა და განაცხადა, რომ კომპანია „ალდაგის ბისიაისთან“ ის არ ითანამშრომლებდა. რატომ მიიღო მენეჯერმა ეს გადაწყვეტილება და რა მოხდა იმ შეხვედრაზე, რომელიც მასსა და კომპანიის ხელმძღვანელობას შორის შედგა, ამას ჩვენი შემდეგი სტატიიდან შეიტყობთ.
კომპანია “ალდაგთან” და მის შვილობილ “ჩვენი ოჯახის კლინიკასთან” დაკავშირება, ჯერჯერობით ვერ მოვახერხეთ. იმედი გვაქვს, დღის განმავლობაში დავუკავშირდებით და მათ კომენტარებსაც შემოგთავაზებთ.
