_ სექტემბერში ეს პრობლემა არ იყო და მიკროავტობუსით ხდებოდა ბავშვების გადაყვანა. ეს, რა თქმა უნდა, ადგილობრივი ბიუჯეტით ხდებოდა, ახლა რა მოხდა, არ ვიცით, მაგრამ ის ყველამ კარგად ვიცით, რომ მიკროავტობუსი აღარ გვემსახურება. ბავშვებს 9 კილომეტრის დაფარვა უჭირთ ფეხით, რადგან მძიმე ჩანთები აქვთ და გარდა ამისა, სხვა საფრთხეცაა _ სოფელში მგლებია. არ შეიძლება, რომ ასე ხდებოდეს, ეს არის უპასუხისმგებლობა და მეტი არაფერი, – განაცხადა ჩვენთან საუბრის დროს რამდენიმე მშობელმა.
ჩვენს მიერ მოპოვებული ინფორმაციით, მიკროავტობუსი პრობლემის გარეშე დადიოდა სექტემბრიდან ნოემბრის ჩათვლით.
ოზურგეთის საგანმანათლებლო რესურსცენტრის უფროსის, ირინა ინარიძის თქმით, ტრანსპორტის ხარჯებს ადგილობრივი გამგეობა აფინანსებდა.
_ ნარუჯის საჯარო სკოლას თავისი ავტობუსი არ ჰყავს. მიკროავტობუსით მომსახურება ოზურგეთს მუნიციპალიტეტის ბიუჯეტიდან ფინანსდებოდა. მაგალითად, შარშან გამგეობის დახმარებით, ბავშვების გადაადგილება ხდებოდა, მაგრამ წელს ეს არ ხდება. ჩვენ გადავგზავნეთ განათლების და მეცნიერების სამინისტროში მოთხოვნა ხუთ სოფელზე, რომელსაც ესაჭიროება მიკროავტობუსი და ჩვენ ვფიქრობთ, რომ ეს საკითხი დადებითად გადაწყდება, _ გვითხრა ირინა ინარიძემ.
“გურია ნიუსის” ინფორმაციით, ამ სიაში, ვერ მოხვდა ნარუჯის საჯარო სკოლა.
ნარუჯის საჯარო სკოლის დირექტორის მედეა ობოლაძე ამბობს, რომ მიკროავტობუსის გადაადგილების საკითხი ამ დღეებში გადაწყდება.
_ მე, მეტი არაფერი ვიცი. ეს სკოლის არ იყო და აქედან გამომდინარე მეტ ინფორმაციას არ ვფლობ, _ თქვა ჩვენთან საუბრის დროს, მედეა ობოლაძემ.
ოზურგეთის საკრებულოს მუნიციპალიტეტის დეპუტატმა, ვალოდია ბერიძემ გვითხრა, რომ ორ დღეში ეს პრობლემა მოგვარდება, მაგრამ არ აზუსტებს, თუ რის გამო შეაჩერა მიკროავტობუსმა ბავშვების გადაადგილება.
_ სექტემბრიდან მოხერხდა და 60 ბავშვის გაადგილება სკოლაში მიკროავტობუსით ხდებოდა. ზუსტად ვერ გეტყვით, რა მოხდა.როგორც ვიცი, საწვავის პრობლემა იყო და ეს აუცილებლად გამოსწორდება.
_ რამდენი ლიტრი საწვავი ეძლეოდა მიკროავტობუსის მძღოლს დღეში?
_ 7 ლიტრი.
_ როგორც ვიცი, მძღოლს ბავშვების გადაადგილებაში ხელფასი ეძლეოდა.
_ კი, 210 ლარი ეძლეოდა თვეში, მაგრამ ეს არ ყოფილა პრობლემა.
_ დაფინანსება ადგილობრივი მუნიციპალიტეტიდან ხდებოდა?
_ კი. მეტი, არაფერი ვიცი.
პარლამენტარ ზვიად კვაჭანტირაძის ოზურგეთის ბიურის ხელმძღვანელის, მარინე სუნგულიას თქმით, ხალხმა გააპროტესტა ის, რომ არჩევნებამდე დადიოდა ავტობუსი და ეს ერთი წლის განმავლობაში ხდებოდა და არჩევნების შემდეგ მოხსნეს ავტობუსი.
_ ერთ-ერთი ბავშვი, რომელსაც ფეხით მოუხდა სკოლაში წასვლა, ტურამ დაკბინა და მოსახლეობა ითხოვს აღუდგინონ ტრანსპორტი. ორშაბათიდან ოზურგეთის მუნიციპალიტეტის საკრებულოს თავმჯდომარემ შეპირდა, რომ პრობლემას მოაგვარებს და ბავშვებს მიკროავტობუსი კვლავ მოემსახურება.
_ თქვენი აზრით, რას უკავშირდებოდა ამ მიკროავტობუსის დროებით გაჩერება?
_ ჩვენ აუცილებლად ვაპირებთ გამოვითხოვოთ ის საბუთები, რომლითაც დავადგენთ ავტობუსის მოხსნის მიზეზს.
_ ვის უნდა მოეხსნა მიკროავტობუსი?
_ კონკრეტულად ვერ დავასახელებ, მაგრამ ჩემი აზრით, ეს მხოლოდ ძველ ხელისუფლებას ხელეწიფება. ჩემთან ბევრი ადამიანი მოსულა, რომელსაც თანამდებობის პირები გადმოამისამართებენ ხოლმე ისეთი პრობლემებით, რომელიც მიხეილ სააკაშვილის ხელისუფლების წარმომადგენლების გასაკეთებელი იყო.
ჩვენ შევეცადეთ, რომ ოზურგეთის მუნიციპალიტეტის საკრებულოს თავმჯდომარის, ალეკო მამეშვილის და ოზურგეთის მუნიციპალიტეტის გამგებლის მოვალეობის შემსრულებლის, ილია ვაშაყმაძის კომენტარები მოგვეპოვებინა, მაგრამ მამეშვილმა ჩვენს ზარებს არ უპასუხა, ვაშაყმაძის ტელეფონი კი გასული იყო მომსახურეობის ზონიდან ( ეს ზარი ორივე ჩინოვნიკთან 18:00 საათის შემდეგ განხორციელდა და აქედან გამომდინარე , ხალხის მიერ არჩეულმა ალეკო მამეშვილმა და საკრებულოს დეპუტატებისგან დამტკიცებულმა ილია ვაშაყმაძემ, ალბათ ამის გამო აღარ აიღეს ყურმილი. სამუშაო საათები დასრულებულად გამოაცხადეს).
