აჭარელი ბიზნესმენი სერგო ბერიძე 2007 წელს კონსტიტუციური უსაფრთხოების დეპარტამენტის ხელმძღვანელმა სოსო თოფურიძემ კომპანია “ბათფარმასთვის” თანხის გამოძალვის ბრალდებით დააკავა. მან ციხეში 4 წელი და 5 თვე დაჰყო.
რა კავშირი აქვს ვანო მერაბიშვილის დედას ჟენია მერაბიშვილს სერგო ბერიძის დაჭერასთან და დაიბარებენ თუ არა შსს ყოფილი მინისტრის დედას პროკურატურაში ეს ჯერჯერობით უცნობია.
“გურია ნიუსი” ბიზნესმენ სერგო ბერიძეს ესაუბრა.
_ ბატონო სერგო, რას ედავებით ვანო მერაბიშვილს?
_ პირადად ვანო მერაბიშვილის ჩამოყალიბებული ჰყავს ბანდფორმირება, რომელშიც შედიან: ლუხუმი კაპანაძე, გელა გიგოლაშვილი, გიორგი გიგოლაშვილი, პროკურორი დავით ჭარბაძე, მამუკა მახარაძე, რომელიც იყო პატიმარი და ციხიდან იმისთვის გამოიყვანეს, რომ ჩემთვის ფული მოეცა.
_ რა ფულზეა საუბარი?
_ მე მქონდა დიდი ბიზნესი. სამკერვალო ფაბრიკა ახალსოფელში, გონიოს ტერიტორიაზე, რომელიც საქართველოს პრეზიდენტმა გახსნა. მქონდა ქათმების ფერმა, მყავდა 300 ჰოლანდიური ჯიშის ღორი, სუპარმარკეტი, ბენზინგასამართი სადგური, სასტუმრო. Eერთ დღეს, მეფრინველეობის ფაბრიკის მშენებლობა დავიწყე. ამ დროს, ჩემთან მოვიდა “ბათფარმის” დირექტორი, მერაბიშვილის ქვისლი გელა გიგოლაშვილი და მეუბნება, რომ “კოდა” არის ჩვენი ფირმა და აქ ქათმების ფერმას ვერ ააშენებო. ამის შემდეგ, ჩვენს შორის მოხდა შეკამათება.
თბილისში დამიბარა ლუხუმ კაპანაძემ. მთხოვა შეხვედრა. ჩვენი შეხვედრა თბილისში, ჩემს ხუთი პარტნიორთან ერთად სასტუმრო “შერატონ მეტეხი პალასის” რესტორანში შედგა. ლუხუმ კაპანაძესთან მოვილაპარაკეთ, რომ მე მათთვის უნდა მიმეყიდა ჩემი ქონება, ანუ ის მშენებლობები, სამკერვალო ფაბრიკა, ქათმების ფერმა, ღორების ფერმა, ავტოსადგომი, სუპერმარკეტი, ბიზინგასამართი სადგური, პურის საცხობი, ანუ ლუხუმ კაპანაძესთან დავჯექით და ვილაპარაკეთ ამაზე. ჩემთვის უნდა მოეცა 2 300 000 დოლარი. მომცა 85 000 დოლარი. გავიდა 7 თვე და დანარჩენი ფული არ დამიბრუნა. დავუწყე დავა.
გელა გიგოლაშვილი და ლუხუმი კაპანაძე ვანო მერაბიშვილით მემუქრებოდნენ, ამას ესწრებოდა ძალინ ბევრი ხალხი, მითხრეს, ვანო მერაბიშვილის ახლობლები ვართ თუ არ გაჩერდები ადგილზე მოგკლავთო. ამის შემდეგ, გადავწყვიტე ჩავსულიყავი ახალციხეში ვანო მერაბიშვილის დედასთან იმისთვის, რომ შევეხვედრებინე ვანოსთან.
ვანოს დედამ დარეკა, რომ მე არ ჩავსულიყავი. ამის შემდეგ, ჩემი ბიჭი და მისი ბათუმელი მეგობარი გულო შავაძე ჩავიდნენ ჟენია მერაბიშვილთან. იგი სკოლის დირექტორი იყო და სკოლაში შეხვდა. დაიტოვა კასეტები, საბუთები. დამირეკა და მითხრა, რომ ერთი კვირის განმავლობაში მომიგვარებდა საქმეს.
ორი დღის შემდეგ, ჩემთან მოდის გულო შავაძე და მეუბნება, უნდა წავიდეთ, ახალციხეში გიბარებს ვანოს დედა, ოღონდ საბაჟოზე უნდა მიხვდიე “პასილკაა” ვანოს მამის და უნდა ჩაუტანოო. რომელ საათზე მეთქი – ღამის 2 საათზეო. წავედი საბაჟოს უფროსი ვნახე, მითხრა – სულელი ხომ არ ხარ, ღამის 2 საათზე რა “პასილკა” უნდა მოვიდეს, არ მოხვიდეო. ღამის 2 საათზე დამირეკეს, საბაჟოზე მოდიო. მე ვუთხარი, ჯავახიშვილზე ვცხოვრობ, გელოდებით, მომიტანეთ “პასილკა” და წავუღებ მეთქი. არ მივედი. მეორე დღეს გავიგე, მთელი ნიღბიანი სპეცნაზი იყო მობილიზებული. წამალი უნდა გადმოეცათ. ტელეფონში სერგო, სერგო, სერგო იძახდნენ.
_ მერაბიშვილის დედასთან ამის შემდეგ კიდევ გქონდათ შეხვედრა?
ამის შემდეგ, ჩემი ბიჭი კიდევ ერთხელ ჩავიდა ვანო მერაბიშვილის დედასთან. ვანოს დედამ დამირეკა – ხვალ შეგხვდებიანო. “ბათფარმა” სადაც იყო, იქ იყო ბენზინგასამართი სადგური. იმის ზევით ყოფილა პატარა სასადილო, მე არც ვიცოდი. დამირეკა ვანოს დედამ, აქ ვზივარო. მივედი, დამხვდა სოსო თოფურიძე, მომცეს დანომრილი 20 000 დოლარი და დამიჭირეს. წამართვეს ყველა ქონება. 12 000 000 დოლარი ქონება ჩადეს “ქართუ ბანკში”. 720 კაცი დატოვეს უმუშევარი და გაიქცნენ. დღეს ვედავები ვანოს და მის ბანდას, რომ დამიბრუნონ ჩემი ქონება. 7 წელი ვითხოვდი ვანოსთან შეხვედრას, ტელევიზიებიდან, ციხიდანაც. ახლა სასამართლოებში შევხდებით, იქ გავარკვევთ მე და ვანო ურთიერთობას.
საჩივარი შევიტანე მთავარ პროკურატურაში, შინაგან საქმეთა სამინისტროში და ახლა ვაპირებ შევიტანო პარლამენტის საგამოძიებო ჯგუფში, რომელსაც თინა ხიდაშელი ხელმძღვანელობს.
იმედი მაქვს იუსტიციის ახალი მინისტრის თეა წულუკიანის და მთავარი პროკურორის არჩილ კბილაშვილის. დარწმუნებული ვარ, გაარკვევენ სიმართლეს.
_ თქვენ დღეს განაცხადეთ, რომ თქვენს საქმეშიც იყო შოთა ხიზანიშვილი გარეული.
_ როდესაც ჩემს საქმესთან დაკავშირებით შოთა ხიზანიშვილს დაურეკეს ჟურნალისტებმა, ვანოს დედა შეხვდა თუ არა სერგო ბერიძესო, იგი აცხადებდა – ვანოს დედას არ შეხვედრიაო. არადა, ჩემს საქმესთან დაკავშირებით სტუდია “მონიტორმა” ფილმი გადაიღო სახელად “მინისტრის მეგობარი,” სადაც ვანო მერაბიშვილის დედა ადასტურებს, რომ ჩვენ შეგვხვდა და დაგვპირდა საქმის მოგვარებას. შოთა ხიზანიშვილი მემუქრებოდა, რომ გავჩერებულიყავი.
მე რომ დამიჭირეს, ჩემმა ახლობლებმა მიაკითხეს ვანოს დედას და ჰკითხეს, _ რატომ დააჭერინეო? არც კარი გაუღო და არც მიიღო, “მასე ეკუთვნის მასეთ ყაჩაღებსო,“ _ ასე განაცხადა ვანოს დედამ.
