ამბობენ იმასაც, რომ პეტრიაშვილი გურიაში პოლიტიკური სიტუაციის „დასაწყობად“ გამოუშვეს. როგორც პოლიტიკური კოალიციის წარმომადგენლები გვეუბნებიან, ისინი გურიის პოლიციის სამმართველოს უფროსის გასაცნობად თავისი სურვილით მიდიან. მათივე თქმით, არანაირ პოლიტიკურ საკითხზე არ საუბრობენ. თუმცა, ზაზა პეტრიაშვილი გურიის გაცნობას პოლიტიკური სახეების გაცნობით რომ იწყებს, ფაქტია. ამბობენ იმასაც, რომ ის დაახლოებით სამ თვეს დაყოფს რეგიონში და შემდეგ შინაგან საქმეთა სამინისტროში დააწინაურებენ.
კოტე შარაშენიძე ამბობს, რომ ზაზა პეტრიაშვილი გურიაში სტუმარია და სტუმარს გაცნობა უნდა:
_ გავიცანით, კაი კაცია. გვინდოდა, პირადად გაგვეცნო.
_ ანუ თქვენ გამოთქვით ზაზა პეტრიაშვილის გაცნობის სურვილი?
_ დიახ, მე და დათო დარჩიამ. აუცილებელია, სტუმარი კაცია და უნდა გაიცნო?
_ შეგიძლიათ რამდენიმე დეტალი გვითხრათ, რაზე იყო საუბარი შეხვედრის დროს?
_ დეტალი რა გითხრათ. გვქონდა ხუთწუთიანი შეხვედრა. გვინდოდა გვენახა სახეზე, ფიზიკურად დავლაპარაკებოდით და რომ ცნობოდა მას, ვინ იყო კოტე და ვინ იყო დათო.
„თავისუფალი დემოკრატების“ წევრი ლევან ჭელიძე გურიის პოლიციის სამმართველოს ახალდანიშნულ უფროსზე რამდენიმე დეტალს გვიყვება: მინდოდა გაცნობა ამ ადამიანის. ვიცი, რომ ის იყო „თავისუფალ დემოკრატებში“, არის წესიერი და გამოცდილი კაცი. გავრცელებულია ინფორმაცია, რომ ეს ადამიანი არ მუშაობდა შინაგან საქმეთა სამინისტროში, არის ტყუილი, ის მუშაობდა ზურიკო ჩხაიძის პერიოდში (საუბარია შინაგან საქმეთა მინისტრის ყოფილ მოადგილეზე ზურაბ ჩხაიძეზე, რომელიც ედუარდ შევარდნაძის პრეზიდენტობის დროს მუშაობდა, ავტ). ამას მისი ნალაპარაკებიდან გეუბნებით.
_ ვისგან წამოვიდა გაცნობის სურვილი?
_ ჩემგან წამოვიდა.
_ ადრეც ასე ხდებოდა? როდესაც გურიის სამმართველოს პოლიციის ახალი უფროსები მოდიოდა?
_ არ ვიცი, მე გეუბნები ახლა რაც იყო. ცნობისთვის, მე ადრე ვმუშაობდი ამ სტრუქტურაში.
_ ზაზა პეტრიაშვილს ნაკლებად იცნობენ გურიაში და იქნებ თქვენ გვითხრათ მის შესახებ?
_ მასთან დიდი ხნის საუბარი არ მქონია. ვიცი, რომ ის მუშაობდა შსს-ში და არის პროფესიონალი.
_ ბატონო ლევან, მისი ჩამოსვლის დღიდან გავრცელებულია ინფორმაცია, რომ მან უნდა დაარეგულიროს პოლიტიკური სიტუაციები გურიაში.
_ მე მგონი, მას პოლიტიკური შეხება ამ ეტაპზე არ აქვს. ეს ადამიანი დანიშნულია შსს გურიის პოლიციის სამმართველოს უფროსად და არა რაიმე პოლიტიკურ თანამდებობაზე. მასთან არანაირი პოლიტიკურ თემებზე საუბარი არ გვქონია.
რადგან ზაზა პეტრიაშვილი ამ ეტაპზე ჟურნალისტებს არ წყალობს, „გურია ნიუსი“ შინაგან საქმეთა სამინისტროს პრესამსახურის უფროსს, ნინო გიორგობიანს დაუკავშირდა. მისი თქმით, ზაზა პეტრიაშვილი დღის განმავლობაში უამრავ მოქალაქეს ხვდება და ის ამ ადამიანებს არ შეხვედრია, როგორც პოლიტიკური პარტიის წარმომადგენლებს.
_ დღის განმავლობაში უამრავ ადამიანს ხვდება, მათ შორის ამ ადამიანებსაც შეხვდა, როგორც უბრალო მოქალაქეებს. მისთვის არ იყო ცნობილი, თუ რომელი პარტიის წარმომადგენლები იყვნენ ისინი.
_ ქალბატონო ნინო, როდის იგეგმება ზაზა პეტრიაშვილის და ჟურნალისტების შეხვედრა?
_ რეგიონის პოლიციის სამმართველოს უფროსები ჟურნალისტებთან შეხვედრებს უახლოეს მომავალში დაიწყებენ, როდესაც ამის მითითება ექნება შინაგან საქმეთა სამინისტროს პრესამსახურიდან, _ თქვა ჩვენთან საუბრის დროს ნინო გიორგობიანმა.
