“გურია ნიუსის” ინფორმაციით, გუშინ, ოზურგეთის მუნიციპალიტეტის საკრებულოში გამართულ შეხვედრაზე ერთმანეთს მხარის გუბერნატორი ვალერი ჩიტაიშილი, ვიცე-გუბერნატორი პაატა მანჯგალაძე, ოზურგეთის მუნიციპალიტეტის საკრებულოს თავმჯდომარე ალეკო მამეშვილი და “ქართული ოცნების” ლიდერები კოტე შარაშენიძე, (რომელსაც, როგორც ამბობენ, ოზურგეთის მუნიციპალიტეტის გამგებლობა უნდა) და დათო დარჩია შეხვდნენ. შეხვედრას ასევე რამდენიმე ადამიანი ესწრებოდა ორივე მხრიდან. როგორც ჩვენთვის გახდა ცნობილი, ილია ვაშაყმაძეს “ქართული ოცნების” ლიდერებმა თანამდებობიდან წასვლა ურჩიეს.
მხარეები დეტალებზე არ საუბრობს, მაგრამ ექსკლუზიურად “გურია ნიუსისთვის” კომენტარებს აკეთებენ.
ახლადდანიშნული ვიცე-გუბერნატორი პაატა მანჯგალაძე ამ შეხვედრის დეტალებზე ასეთ კომენტარს აკეთებს:
_ ჩვენ ამის გაცხადებას ნამდვილად არ ვაპირებდით. რამდენიმე ადამიანმა დამიკავშირდა ამ თემის შესახებ და პირდაპირ გეტყვით: იყო შეხვედრა, რომელიც ჩვენი ინიციატივით შედგა. ერთ-ერთი ორგანიზატორი ამ შეხვედრის მე ვიყავი. გვქონდა გარკვეული ინფორმაცია, რომ რაღაც ჯგუფები აპირებდნენ საკრებულოს სხდომის ჩაშლას (საკრებულოს სხდომა 26 ნოემბერს, ორშაბათს უნდა გაიმართოს) და გვინდოდა გაგვეგო ვისი ორგანიზებით ხდებოდა ხალხის შეკრება. დავიწყეთ საუბარი ამ მიმართულებით. „ქართული ოცნების“ ერთ-ერთი ლიდერისგან მივიღე ის, რომ მან მითხრა, მე არ მქონდა ლაპარაკის უფლება, რადგან საერთოდ არ ვიყავი ოზურგეთელი. გამაკვირვა ასეთმა რამ. თავიდან შეთანხმებული ვიყავით მე და გუბერნატორი, რომ შეიძლებოდა აგრესია წამოსულიყო მათგან და არ ჩავერეოდით, არ ავყოლოდით მათ პროვოკაციას. ჩვენი კეთილგანწყობილი ტონი ჩაითვალა სხვანაირად და აგრესია გაიზარდა მათი მხრიდან. რაღაც საკითხებზე კი შევთახმდით, მაგრამ პირდაპირი მოთხოვნა, რაც იყო გამგებლის მისამართით, პირდაპირ ვამბობ, ითქვა გადადგეს გამგებელიო. ეს ამ ადამიანის გადასაწყვეტია, არანაირი ზემოქმედება არც ჩვენი მხრიდან შეიძლება პიროვნებაზე და არც სხვა ადამიანების მიერ. მისი გადასაწყვეტია პირადულად. მე არ ვიცი ილია ვაშაყმაძე რა გადაწყვეტილებას მიიღებს, მაგრამ მე, მის ადგილას, არ გადავდგებოდი ასეთი ზეწოლის ფონზე.
_ კონკრეტულად ვინ იყვნენ ეს ადამიანები?
_ ერთ-ერთი ლიდერი და სხვა თანმხლები პირები.
_ ეს ერთ-ერთი ლიდერი კოტე შარაშენიძეა თუ დავით დარჩია?
_ ამ ინფორმაციას არც უარვყოფ და არც დავადასტურებ. ჩვენ საჯარო სამსახურში დიდი ხანია ვართ და საჯარო მოხელეები ვართ. შეგნებული გვაქვს, რომ ჩვენთვის თმენის ვალდებულება მაღალი უნდა იყოს. ამ ტიპის განცხადება მათი მხრიდან: “ლაპარაკის უფლება არ გაქვს, ოზურგეთელი არ ხარო,” _ ქუჩური გარჩევის ტოლ საუბრად შეიძლება ჩაითვალოს, _ გვითხრა პაატა მანჯგალაძემ.
საქართველოს პარლამენტის წევრი, ოზურგეთის მაჟორიტარი ზვიად კვაჭანტირაძე ამბობს, რომ საკადრო ცვლილებებთან დაკავშირებით მან უკვე დააფიქსირა თავისი მოსაზრება:
_ ჩემი დამოკიდებულება საკადრო ცვლილებასთან დაკავშირებით თავიდანვე გავაკეთე და ეს პოზიცია არ შემიცვლია. როდესაც ოზურგეთის მუნიციპალიტეტის საკრებულოს წევრებს შეხვდი, მაშინაც ძალიან მკაფიოდ გამოვხატე ჩემი მზადყოფნა, რომ დღეს არსებულ საკრებულოს შემადგენლობასთან, თავის თავმჯდომარის ხელმძღვანელობით, გავაგრძელო საქმიანი ურთიერთობა და თანამშრომლობა, მაგრამ იქვე დავაფიქსირე ჩემი აზრი, რომ მე მიმაჩნია და ეს არის ჩემი პირადი პოზიცია, რომ აღმასრულებელი ხელისუფლების დონეზე აუცილებლად მოსახდენია სერიოზული ცვლილებები და ამას დღესაც დარწმუნებით ვამბობ, აუცილებელია ოზურგეთს ჰყავდეს ახალი გამგებელი, ეს არის ჩემი პოზიცია. მსურველი შეიძლება იყოს ბევრი, მაგრამ ჩემი პირადი სიმპათია ვის ეკუთვნის, ამის შესახებ უკვე ერთხელ დავაფიქსირე, მეტი არაფრის თქმა არ შემიძლია. მე ვიცი, რომ იქ იყო სუფთა ადამიანური მოლაპარაკებები. ეს ხალხი, ზოგიერთი მათგანი ძალიან რეალურად ხედავს, რომ განწყობა არა მარტო გურიაში, მთელ საქართველოში არის ერთმნიშვნელოვნად ცენტრალური ხელისუფლების მხარდასაჭერად და ადგილობრივი ხელისუფლება არ უნდა იყვეს დისონანსში. ჩვენ ხომ არ ვამბობთ არჩევნით ორგანოებზე, ჩენ ხომ არ ვამბობთ საკრებულოებზე, ჩვენ ვსაუბრობთ აღმასრულებელ ხელისუფლებაზე, რომელიც უნდა იყოს პირდაპირი ინსტრუმენტი ცენტრალური ხელისუფლების და ცენტრალური მთავრობის გადაწყვეტილების გატარებისა ადგილებზე. ამიტომ, თუ ჩვენ გვინდა ხალხმა იგრძნოს სახელმწიფოში ხელისუფლების ცვლილება, ბიძინა ივანიშვილის მთავრობის მოსვლა, ადგილზე ეს ცვლილებები განსახორციელებელია.
გუშინ თუ რამე საუბრები და გაუგებრობები იყო, გარწმუნებთ, რომ ეს იყო მხოლოდ იმისთვის, რომ ადამიანები ორმაგ თამაშს თამაშობენ და საკუთარ დაპირებებს არ ასრულებენ. არ მგონია, რომ ეს ვინმეს სასიკეთოდ წაადგეს, მათ შორის ოზურგეთს და სართოდ ოზურგეთელებს, _ თქვა ჩვენთან საუბრის დროს ზვიად კვაჭანტირაძემ.
ვიცე-გუბერნატორის, ლელა თავართქილაძეს თქმით, მას გუშინდელი შეხვედრის შესახებ ინფორმაცია არ აქვს.
_ ქალბატონო ლელა, ილია ვაშაყმაძე თქვენი ახლობელია. მასთან დაკავშირება ვერ ხერხდება, რადგან ტელეფონი გამორთული აქვს. გავრცელდა ინფორმაცია, რომ მასზე მიდის ფსიქოლოგიური ზეწოლა, რომ თანამდებობა დატოვოს და ასევე მის ახლო ნათესავებზე.
_ მე არანაირ მსგავს ინფორმაციას არ ვფლობ და მინდა გითხრათ, რომ რაც თქვენ მითხარით, პირველად მესმის. თუ მსგავსი რამ ხდება, თავად ილიამ უნდა თქვას, _ გვითხრა ლელა თავართქილაძემ.
“ქართული ოცნების” ერთ-ერთი თანადაფუძნებელი და ბიძინა ივანიშილის თანაკურსელი დათო დარჩია ჩვენთან საუბრისას აღნიშნავს, რომ საკადრო ცვლილება ცივილიზებურ ფორმებში უნდა მოხდეს:
_ შეხვედრა შედგა და იყო ჩვეულებრივი საუბარი რაიონის სასიკეთო საქმეებზე, იმის განსაზღვრა მომავალში როგორ იქნება საქმე, როგორ ჯობია. მე მგონი, ნათელია ყველასთვის, მართლაც ხელისუფლების ცვლილება სასიკეთოა. რაც მოხდა საქართველოში, ყველამ კარგად იცის და აქედან გამომდინარე, ხალხი ასევე ითხოვს საკადრო ცვლილებებსაც. კარგი იქნება, რომ ეს ცვლილება მოხდეს მშვიდობიანად.
_ ბატონო დათო, ხალხისგან მოდის ის ინიციატივა, რომ აქციები მოაწყონ და მოითხოვონ ადგილობრივი ხელისუფლების გადადგომა?
_ ხალხი ცვლილებებს რომ ელოდება, ეს ცხადია. მათ უნდათ, რომ ცვლილებები დაინახონ და ეს რა თქმა უნდა, არ ეხება მხოლოდ საკადრო ცვლილებებს. გურულები დიპლომატები ვართ და გვინდა სასიკეთო ცვლილება იყოს. ერთი და იგივე სახეებს ხედავს ეს ხალხი, ჩვენც უხერხულ მდგომარეობაში ვართ ამის გამო.
_ გავრცელდა ინფორმაცია, რომ მუქარა მიდის ოზურგეთის მუნიციპალიტეტის გამგებლის მოვალეობის შემსრულებლის, ილია ვაშაყმაძის მისამართით და იმასაც ამბობენ, რომ „ქართული ოცნების“ ოზურგეთის რაიონული ორგანიზაციის ლიდერები ამ ყველაფერში ფიგურირებენ.
_ არაფერი არ მიდის, რა მუქარა უნდა იყოს, იქნებ თავად ილია ვაშაყმაძემ დაასახელოს.
_ ჩვენს მიერ მოპოვებული ინფორმაციით, გუშინდელ შეხვედრაზე საკმაოდ ხმამაღალი საუბარი იყო და ქნებ კონკრეტულად გვითხრათ, რა ხდებოდა?
_ არანაირი ხმამაღალი საუბრები. მე, შემიძლია გითხრათ, რომ როდესაც მივედით, გურიის გუბერნატორმა ვალერი ჩიტაიშვილმა მოგვილოცა „ქართულ ოცნებას“ გამარჯვება. ერთი რამ არის ცხადი და ნათელი, ეს ცვლილება უნდა მოხდეს, რასაც საზოგადოება ელოდება. ჩვენ ბევრი მხარდამჭერი გვყავს და ისინი ითხოვენ ცვლილებებს. ისინი ხედავენ, რომ „ქართულმა ოცნებამ“ გაიმარჯვა არჩევნებში და საკადრო ცვლილებები კი რეგიონის და რაიონის დონეზე არ განხორციელებულა. ალბათ, ჯადოსნური სკამის დატოვება უჭირთ.
ვნახოთ, როგორ განვითარდება მოვლენები. “გურია ნიუსი” ამ თემაზე განაგრძნობს მუშაობას და იმედია, ილია ვაშაყმაძე ჟურნალისტებთან შეხვედრას დათანხმდება.
