განსახილველ საკითხთა ჩამონათვალიც ტრადიციული იყო. პირველი ხუთი საკითხის განხილვა და მიღება სწრაფად მოხდა. უმრავლესობის დეპუტატებმა ერთხმად დაუჭირეს მხარი კიდევ ერთხელ გახორციელებულ ცვლილებას ადგილობრივ ბიუჯეტში, ცვლილებას შესყიდვების გეგმაში. წინააღმდეგი მხოლოდ დინების საწინააღმდეგოდ მცურავი წულაძე წავიდა.
რაც შეეხება “სხვადასხვას” სათაურით დამატებულ მეექვსე საკითხს, ამან დეპუტატების გამოცოცხლება და საერთო ჯამში ხმაურიანი განცხადებები გამოიწვია.
სხდომის საფინალო ნაწილში დეპუტატების და მოწვეული სტუმრების წინაშე სიტყვით გამოვიდა გამგებლის მოვალეობის შემსრულებელი კახა ასკურავა. იგი თავის მოხსენებაში სხვადასხვა აქტუალურ საკითხს შეეხო.
წინა შაბათს, ასკურავას გადადგომის მოთხოვნით შიმშილობა დაიწყო კოალიცია “ქართული ოცნების” შტაბის ყოფილმა კოორდინატორმა შოთა ფირცხალაიშვილმა _ იგი კახა ასკურავას წინასაარჩევნო პერიოდში უკანონო ქმედებებსა და მკვეთრად გამოხატულ აგრესიულ გამონათქვამებში ადანაშაულებს.
გამგებლის მოვალეობის შემსრულებელმა კახა ასკურავამ გამოსვლა ამ ფაქტის აღნიშვნით დაიწყო და განაცხადა: “ჩემთვის პრობლემაა ის, რომ დღეს გამგეობის შენობის წინ თუნდაც ერთი ლანჩხუთელი შიმშილობს გარკვეული მოთხოვნებით… მე ეს ძალიან მაწუხებს… მაგრამ, ეს შეიძლება აღიქმებოდეს, როგორც ჩემზე გახორციელებული ფსიქოლოგიური ზეწოლა. “ნაციონალურმა მოძრაობამ” საპარლამენტო არჩევნები წააგო, მაგრამ არ წაუგია ადგილობრივი თვითმმართველობის არჩევნები. იქნებ, მომავალ არჩევნებში მეც გავხდე საკრებულოს დეპუტატი? მე მზად ვარ ნებისმიერ დროს საზოგადოების გადაწყვეტილებას დავემორჩილო _ თუ ხალხი გამოხატავს ნებას, გამგებლის თანამდებობის დატოვება ჩემთვის არანაირ პრობლემას არ წარმოადგენს. ნებისმიერ დროს ვიშოვი ისეთ სამსახურს, რომ თავის რჩენა არ გამიჭირდეს…
რაც შეეხება ნიგვზიანის თემას, პრობლემა რომ არ გამწვავდა, ეს ჩვენ დავარეგულირეთ. ვგულისხმობ საკრებულოს თავმჯდომარის და პირადად ჩემს მონდომებას. ამ ეტაპზე კონფლიქტი თითქმის ამოწურულია. ჩემთვის ყოველი პარასკევი ნიგვზიანის რწმუნებულთან ირაკლი გუჯაბიძესთან სატელეფონო საუბრით იწყება…”
საკრებულოს ოპოზიციონერი დეპუტატის მაკა კვირკველიას აზრით, მოშიმშილე შოთა ფირცხალაიშვილს კონკრეტული პოლიტიკური ჯგუფი იყენებს საკუთარი მიზნების განსახორციელებლად: “ზეწოლა მხოლოდ გამგებლის მოვალეობის შემსრულებელზე ხდება. რეალურად კი ეს საკანონმდებლო ორგანოს პირველ პირებსაც უნდა ეხებოდეს. ეს მაფიქრებინებს, რომ ეს ჯგუფი პირადად კახა ასკურავას უპირისპირდება,” _ გამოთქვა აზრი კვირკველიამ.
ფრაქცია “ლანჩხუთელების” თავმჯდომარემ მარინე თურნავამ საკრებულოს თავმჯდომარის წინაშე ძველი თემა წამოსწია. ჩიბათის მაჟორიტარმა დეპუტატმა გიორგი ჩახვაძემ ერთ-ერთ სხდომაზე საკრებულოსგან კომისიის შექმნა მოითხოვა, რომელიც სოფლის პროგრამების პროექტებში მაჟორიტარი დეპუტატების წილების ფლობის ნამდვილობას გამოიძიებდა. თურნავა დაინტერესდა, შეიქმნა თუ არა კომისია და დაიწყო თუ არა საგამოძიებო მუშაობა.
რევაზ ჩიტიძე მიიჩნევს, რომ ეს საქმე ჩვეულებრივ კრიმინალთან ასოცირდება და იგი სამართალდამცავმა სტრუქტურებმა უნდა გამოიძიონ და არა საკრებულოს მიერ შექმნილმა კომისიამ. საკრებულოს თავმჯდომარის აზრით, ვერანაირი კომისია მსგავსი უკანონო ქმედებების გამოძიების სფეროში კომპეტენტური ვერ იქნება. ასე რომ, საგამოძიებო კომისიები ლანჩხუთის საკრებულოში არ შეიქმნება. ხოლო ჰქონდათ თუ არა წილები დეპუტატებს სოფლის პროგრამით გაკეთებულ პროექტებში, ამას ადგილობრივი სამართალდამცავები გაარკვევენ. გამგებლის თანამდებობის შესახებ რევაზ ჩიტიძემ განცხადება გააკეთა: “კიდევ ერთხელ ხაზგასმით ვიტყვი, კახა ასკურავა ღირსეულად ართმევს თავს ამ მოვალეობას. ასე ფიქრობს საკრებულოს წევრების უმრავლესობაც. მომავალი გამგებლის დანიშვნას სჭირდება გარკვეული პროცედურების გავლა და ჩვენ არსებული წესებიდან გადახვევას არ ვაპირებთ.”
