მინისტრი ევროსაბჭოს ფარგლებში ევროპის ადამიანის უფლებათა სასამართლოს თავმჯდომარეს და სხვადასხვა მოსამართლეებს შეხვდა, მათ შორის იმ სექციის წარმომადგენელსაც, სადაც ქართული საჩივრები იხილება.
წულუკიანის განცხადებით, სტრასბურგში ის კონკრეტული წინადადებით ჩავიდა _ გაათავისუფლოს ისედაც გადატვირთული სასამართლო ქართული საქმეებისაგან.
“დღეს სასამართლოს აქვს 700 დასაბუთებული ქართული საქმე. ამდენივეა ერთი შეხედვით დაუსაბუთებელი საქმეებიც. 700 დასაბუთებული საქმე არის ძალიან ბევრი საქართველოსთვის. მაგალითისთვის, საფრანგეთს აქვს 60 დასაბუთებული საქმე. ჩვენი მიზანია, განვტვირთოთ ევროპული სასამართლო ქართული საჩივრებისგან და კულტურად დავამკვიდროთ ის, რომ ადამიანის უფლებები გვარდებოდეს ქვეყნის შიგნით და ადამიანებს არ უწევდეთ საზღვარგარეთ ამტკიცონ საკუთარი სიმართლე,” _ განაცხადა თეა წულუკიანმა დღევანდელ პრესკონფერენციაზე.
მინისტრის თქმით, ქართული მხარის ინიციატივას სასამართლო ხალისით შეხვდა და მხარეებს შორის შეთანხმებაც შედგა: “700 მიმდინარე საქმეზე, რომელიც არის დასაბუთებული, ადრე თუ გვიან დადგება დარღვევის გადაწყვეტილება და ბიუჯეტიდან ძალიან დიდი თანხა გვექნება გადასახდელი. ამიტომაც, პირველადი შეთანხმების თანახმად, მიმდინარე საქმეებზე, როგორც კი მათ შესახებ ინდივიდუალურად შეგვატყობინებს სტრასბურგის სასამართლო, ჩვენ მომჩივან მხარესთან დავიწყებთ მოლაპარაკებას მორიგების თაობაზე. რაც შეეხება პოტენციურ საქმეებს (ადამიანის უფლებათა დაცვის მხრივ 4 კვირაში ვერ მოგვარდებოდა სიტუაცია), რომლებიც მომავალში შევა ევროპის სასამართლოში, ჩვენ შევეცდებით, რომ სისტემური პრობლემები, რომელთა იდენტიფიკაციაც პრაქტიკულად მომხდარია, მოვაგვაროთ ქვეყნის შიგნით მანამდე, სანამ ის წავა სატრასბურგის სასამართლოში,” _ განაცხადა მინისტრმა.
იუსტიციის სამინისტრო მიმართავს ყველა იმ ადამიანს, ვისაც სტრასბურგის სასამართლოში საჩივარი აქვს შეტანილი, დაიწყონ მოლაპარაკება ხელისუფლებასთან: “თუკი მათ მიაჩნიათ, რომ ხელისუფლების ცვლილების შემდეგ გაჩნდა შანსი, მათი საქმე მოგვარდეს ქვეყნის შიგნით, არ დაელოდონ სტრასბურგის სასამართლოს გადაწყვეტილებას, რასაც ხშირად 4-5 წელი ჭიანურდება. ჩვენ ვართ სახელმწიფო და ვართ იმისათვის, რომ ადამიანის უფლებებთან დაკავშირებული მათი პრობლემა მოვაგვაროთ,” _ განაცხადა წულუკიანმა.
