ევრაზიის ინსტიტუტის ხელმძღვანელი, მეცნიერი გულბაათ რცხილაძე თანაავტორია კვლევისა “ვარდების რევოლუცია”, შედეგები”. ეს ბროშურის სახით გამოცემული კვლევა კონფერენციაზე მოწვეულ სტუმრებს გულუხვად დაურიგდათ. მეცნიერთა ეს ჯგუფი, რომელშიც შედიან ეკონომიკის პროფესორი იოსებ არჩვაძე, საქართველოს ყოფილი ომბუდსმენი ნანა დევდარიანი, პოლიტოლოგი გიორგი ვეკუა, პოლიტოლოგი, პროფესორი ლევან ოსიძე, კატეგორიულად ეწინააღმდეგებიან საქართველოს გაწევრიანებას საერთაშორისო სამხედრო და ეკონომიკურ გაერთიანებებში. ისინი გადარჩენის ერთადერთ გზად ნეიტრალიტეტის პოლიტიკას მიიჩნევენ. სწორედ ამ იდეის პოპულარიზაციას ემსახურებოდა ამ კონფერენციის ორგანიზება. სტუმრებიც მხოლოდ ამ ნიშნით იყვნენ შერჩეული.
კონფერენციის მონაწილე უცხოელი მეცნიერები და პოლიტიკოსები ცდილობდნენ, ქართველი ჟურნალისტები და მოწვეული სტუმრები როგორმე დაერწმუნებინათ, რომ არც ევროკავშირი და არც ნატო საქართველოს ალტერნატივა არ არის. მაგალითად, ლატვიის სეიმის ყოფილი დეპუტატმა ალგირდას პალეცკისმა ევროკავშირში საქართველოს შესაძლო გაწევრიანების უარყოფითი შედეგების პროგნოზირებისას, თქვა, რომ ლატვა, ევროკავშირში შესვლის შემდეგ, დაიცალა მოსახლეობისგან და იგივე ელის ჩვენს ქვეყანასაც. იგი ძალიან იყო შეწუხებული იმ ფაქტით, რომ მისი შვილის 18 კლასელიდან, დღეს ლატვაში მხოლოდ ორი ცხოვრობს.
ესტონელმა პარლამენტარმა იანა ტოომმა იმ დისკრიმინაციულ დიფერენციაციაზე ისაუბრა, რაც ევროკავშირის ძველ და ახალ წევრ სახელმწიფოებს მკვეთრად განასხვავებს ერთმანეთისგან. მაგალითად, მისი თქმით, ესტონელი გლეხები გაცილებით ნაკლებ სუბსიდიას იღებენ ევროპული ბანკებიდან, ვიდრე ფრანგი ან ბელგიელი გლეხები. პარლამენტარი ესტონეთში არსებულ ეკონომიკურ სიტუაციაში არა მხოლოდ ევროკავშირის მაღალი თანამდებობების პირებს, არამედ საკუთარი მთავრობის უუნარობასაც ადანაშაულებდა.
კონფერენციაზე ხაზგასმით ითქვა, რომ არა მხოლოდ საჭიროა, არამედ აუცილებელიცაა რუსეთთან ურთიერთობების დალაგება. სტუმართა და ორგანიზატორთა მოსაზრებით, ვერცერთი პოლიტიკური ალიანსი ვერ დაეხმარება ჩვენნაირ პატარა სახელმწიფოს, რუსეთთან კონფლიქტის შემთხვევაში. “რომ არ გავანაწყენოთ გიგანტი მეზობელი, სამუდამოდ უნდა ვუთხრათ უარი ევროგაერთიანებებს!” _ ასეთი იყო კონფერენციის პოლიტიკური გზავნილი.
