არც იმის სჯერათ, რომ პრეზიდენტის მიერ ღირსების ორდენით დაჯილდოებული, ამჟამად ძებნილი ძებნილი შოთა სირაძე, რომელიც ჩოხატაურის მუნიციპალიტეტის საკრებულოს ლეგალიზაციის კომისიის თავმჯდომარე და ფრაქცია “ნაციონალების” თავმჯდომარე იყო, კაბინეტში იჯდა და ათობით ყალბ დოკუმენტს საკუთარი ინიციატივით გასცემდა. საქმემ, რომელიც ძიებაში თითქმის ორი წელი იყო, მხოლოდ სირაძის დანაშაული გამოკვეთა. თუმცა, ამის მიუხედავად, ყველა თანხმდება ერთზე _ სირაძე ამას დამოუკიდებლად ვერ გააკეთებდა.
სისხლის სამართლის საქმის მიხედვით, შოთა სირაძემ 132 ყალბი დოკუმენტი გასცა. თუმცა, თავდაპირველი ვერსიით და ჩოხატაურის საჯარო რეესტრიდან წაღებული ოფიციალური დოკუმენტის თანახმად, დოკუმენტების რაოდენობა 388 აღწევდა. არავინ იცის, რა ბედი ეწია 256 დოკუმენტს. არც ის, ვის და რატომ დასჭირდა ამ ციფრის ასე მკვეთრად შემცირება.
დაზუსტებით ცნობილია 132 დოკუმენტის მფლობელთა ბედი _ მათ, უკლებლივ ყველამ, მიწა, ზედ დამაგრებული ქონებით, სახელმწიფოს ჩააბარა. მათი უმრავლესობა თანამდებობის პირი იყო _ ბევრი პოლიციის მაღალჩინოსანი და მათ თანამდებობები დაატოვებინეს კიდეც.
ამ სკანდალს შეეწირა ჩოხატაურის მუნიციპალიტეტის იმდროინდელი გამგებლის, მამუკა დოლიძის თანამდებობა. მართალია, იმ დროს, სახლში დოლიძე კი არა, ანტონ ხუნდაძე უნდა წასულიყო, რომელსაც, კანონით, დოლიძეზე მეტი პასუხისმგებლობა ჰქონდა კომისიასთან მიმართებაში, მაგრამ განცხადება დოლიძემ დაწერა, რითაც დადასტურდა მოარული ხმები, რომ მის მოცილებას ანტონ ხუნდაძე დიდი ხნის მანძილზე ცდილობდა.
მამუკა დოლიძეს დღეს ამ თემაზე საუბარი არ სურს და ამბობს, რომ თანამდებობა საკუთარი სურვილით დატოვა:
_ ვიფიქრე, რომ ჩემი წასვლით სიტუაცია დაწყნარდებოდა. რამდენიმე დღის განმავლობაში, კუდ-ის და პროკურატურის თანამშრომლები გამგეობაში იყვნენ. ძალიან დაძაბული სიტუაცია იყო და ვიფიქრე, რომ ჩემი წასვლა ჯობდა. თუმცა, ბახმაროს მიწებთან არანაირი შეხება არ მქონია, _ გვითხრა დოლიძემ.
ის, რომ დოლიძეს ბახმაროს მიწებთან შეხება არ ქონია, ჩვენთან ექსკლუზიურ ინტერვიუში ძებნაში მყოფი შოთა სირაძეც ადასტურებს. მისი თქმით, მისი საქმიანობის შესახებ საქმის კურსში ის ადამიანები იყვნენ, რომლებთანაც სამსახურეობრივი შეხება ჰქონდა:
_ თავიდან, სააკაშვილმა შექმნა ეს კომისია _ როცა უჭირდა, წინასაარჩევნოდ. როგორც კი დამთავრდა საპრეზიდენტო და საპარლამენტო არჩევნები, მოგვივიდა ბრძანება შეაჩერეთ კომისიის მუშაობაო. ეს იყო 2008 წლის მაისში. განცხადებები ჩვეულებრივ შემოდიოდა და ვიღებდი. განცხადებებს ჰქონდა ვადა და პასუხი აუცილებლად უნდა გამეცა _ ან დადებით, ან უარყოფითი.
_ ბატონო შოთა, თუკი მიწების გაცემა შეჩერებული იყო, ვინ მოგცათ დასტური, რომ დოკუმენტაცია გაგეკეთებინათ და საკუთრების მოწმობა გაგეცათ? ჩვენი ინფორმაციით ეს ყველაფერი ილია ჯალაღანიას კაბინეტში გადაწყდა, სადაც მან და იმდროინდელმა პოლიციის სამმართველოს უფროსმა, შოთა ჭანუყვაძემ გადმოგცეს 50-კაციანი სია, რომლებისთვისაც მიწა უნდა დაგემტკიცებინათ.
_ ჯალაღანიასთან მაგ საქმეზე საერთოდ არ ვყოფილვარ. ჩემთან მოიტანეს განცხადებები _ მათ შორის, ჭანუყვაძის. რაოდენობა ზუსტად არ მახსოვს. დასტური სიტყვიერად არავის მოუცია, მაგრამ ეგ ისეც ნათელი იყო. სიმართლე გითხრათ, მე ვიღაცეების დასახელება რომ არ მინდოდა, თან ისეთების, რომელთა ამ საქმეში მონაწილეობას ვერ დავამტკიცებ, ამიტომ ვარ ასეთ დღეში. ისე, ყველამ ყველაფერი იცოდა თავისთავად, ვისაც უნდა სცოდნოდა.
_ საკრებულოს თავმჯდომარემ, ანტონ ხუნდაძემ იცოდა, რომ ლეგალიზება არაკანონიერი გზით ხდებოდა?
_ იცოდა, ვისაც უნდა ცოდნოდა. ეს საქმე, გინდა-არ გინდა, მივიდოდა ყველასთან, ვისთანაც მე ურთიერთობა მქონდა სამსახურებრივად.
_ თუ ეს იცოდა ანტონ ხუნდაძემ, პოლიციის და პროკურატურის მაღალჩინოსნებმა, მაშინ რატომ არ აღძრეს მათზე საქმე?
_ არ მახსოვს, ზუსტად, 2008 წლის აგვისტო თუ სექტემბერი იყო, როცა გავეცი მოწმობები. მაშინაც მქონდა ანტონთან საუბარი. ზუსტად არ მახსოვს, ვის საქმეზე. ეს ის დროა, როცა გაჩერებული ჰქონდათ კომისიის მუშაობა.
_ და ამიტომაც დაურეკეთ გაქცევის შემდეგ ანტონ ხუნდაძეს? თუ ყველაფერი ასე იყო, მარტო თქვენზე რატომ გადატეხეს ჯოხი?
_ ბევრი ვინმე ნამდვილად არ იყო, ვისაც ეგ “აწყობდა”, მაგრამ ანტონს, შეიძლება, აწყობდა. ჩვენ შორის ნამდვილად არ იყო კარგი ურთიერთობა. იყო რაღაც სხვა საკითხები, რომელზეც კამათი გვქონდა, თუმცა, ამ საკითხთან დაკავშირებით _ არა.
_ ამ საქმეში ბევრი მაღალჩინოსანია გარეული. მათ შორის, პოლიციელები, პროკურორი… როგორ მოხდა, რომ საქმე აღიძრა და ვინ ვისზე იძია შური?
_ არ ვიცი. ხომ გახსოვთ, როგორი პოლიტიკა იყო _ ვინც პირველი ჩაუშვებდა სხვას, თავს გადაირჩენდა. ეტყობა, ვიღაცას “აწყობდა” კიდეც, მაგრამ მე არ ვიცი, ვინ ვის დაასწრო. ალბათ, იმან, ვისაც მე არ ვაწყობდი საკრებულოში რომ ვყოფილიყავი. მათ შორის ანტონიც არის, ალბათ.
_ პროკურორის კაბინეტში მოცემულ 50-კაციან სიაზე არაფერი მითხარით…
_ სია არავის მოუცია. მე ხომ ვერ გავაკეთებდი დოკუმენტაციას? ამას ძალიან ბევრი საბუთები სჭირდებოდა. საბუთებს თვითონ აკეთებდნენ, ჩემთან გაკეთებული საქმეები მოჰქონდათ. რამდენიმე ერთადაც მოუტანიათ.
_ ყველამ კარგად იცის, რომ ეს იყო ერთიანი სქემა და ამაში ბევრი ჩინოსანი იყო ჩართული. ასე რომ არ ყოფილიყო, მათ მიწები არ ექნებოდათ დარეგისტრირებული. პოლიციის სამმართველოს ყოფილმა უფროსმა, შოთა ჭანუყვაძემ დოკუმენტაცია თავად მოგიტანათ თუ სხვა გამოატანა?
_ სხვას გამოატანა.
_ გურიის გუბერნატორმა, ვალერი ჩიტაიშვილმა იცოდა ამ ყველაფრის შესახებ?
_ არ ვიცი, ნამდვილად. შეიძლება, ცოდნოდა.
_ ამ ამბების შემდეგ მხოლოდ ორი დამნაშავე გამოიკვეთა _ თქვენ და მამუკა დოლიძე. იმდროინდელი გამგებელი რა დოზით იყო ამ ყველაფრის მონაწილე?
_ მამუკა საერთოდ არაფერ შუაში იყო. ვერ გეტყვით, რატომ მოხსნეს, რას ერჩოდნენ. ეტყობა, ეგეც ვიღაცას არ “აწყობდა” გამგებლად.
_ რატომ გაიქეცით და რატომ არ დაასახელეთ ის პირები, რომლებმაც ეს ყველაფერი იცოდნენ და, ასე ვთქვათ, საქმეში გადიოდნენ? ჩვენ ვესწრებოდით თქვენს სასამართლო პროცესებს და არც ერთი შემთხვევა არ ყოფილა, როცა პროკურორს სხვა თანამონაწილე პირების დადგენა ეცადა იგივე ანტონ ხუნდაძის, სავარაუდოდ, გუბერნატორის, პროკურორის, პოლიციის სამმართველოს უფროსის… თქვენ რატომ არ სცადეთ თავის დაცვა?
_ თქვენ როგორ ფიქრობთ, იმ სისტემასთან თავის დაცვა შესაძლებელი იყო?
_ თუმცა, ახლაც, შეცვლილ გარემოში, რაღაცას ან ვიღაცას ერიდებით…
_ ძალიან ძნელია ფაქტების გარეშე საუბარი. ამიტომ ვერიდები რაღაცეების თქმას, რასაც იტყვი, კიდეც უნდა დაამტკიცო. ვერავის დავასახელებ მეტს. ამ საქმეს მე ვაკეთებდი. ძირითად ვადებში იყო უმეტეს განცხადებებზე პასუხი გაცემული და ძალიან ბევრი ხალხი იყო კმაყოფილი, ბიუჯეტშიც ფული შედიოდა, თანაც საკმაოდ ბევრი.
_ გინდათ გვითხრათ, რომ ეს უკანონობები მხოლოდ საკუთარი ინიციატივით ჩაიდინეთ?
_ უკვე გითხარით, რომ ყველამ იცოდა, ვისაც უნდა ცოდნოდა. ეგ უკანონობა ნამდვილად არ იყო. შეიძლება მე გადავამეტე უფლებებს, მაგრამ მოწმობები, რომლებიც გავეცი, მესაკუთრეებს სრულიად კანონიერად აქვთ მიღებული. უკანონობა ის იყო, რომ გააჩერეს კომისიის მუშაობა.
_ თუ მოწმობები კანონიერად გაიცა, რატომ ჩააბარებინეს მოქალაქეებს მიწა უკან?
_ ეგ მათი საქმეა. რამდენმა არ ჩააბარა და რა უქნეს? ვერც ვერაფერს უზამდნენ. ვისაც სამსახურის დაკარგვის ან სხვა გარემოებების შეეშინდა, იმან ჩააბარა.
შოთა სირაძე ამბობს, ძალიან მალე სამართალდამცავებს ჩაბარდება და საკუთარი სიმართლის დასამტკიცებლად იბრძოლებს.
რაც შეეხება ანტონ ხუნდაძეს, რომელიც დღესაც ჩოხატაურის საკრებულოს თავმჯდომარეა, ამბობს, რომ უკანონოდ დაკანონებულ მიწებთან არანაირი კავშირი არ აქვს.
_ ბატონო ანტონ, ბახმაროს სკანდალთან და შოთა სირაძის მიერ გაცემულ დოკუმენტებთან კავშირი არ გაქვთ?
_ არანაირი. არ იცით, რომ კავშირი არ მაქვს?
_ მე საიდან უნდა ვიცოდე? წესით და რიგით, ამით გამოძიება უნდა დაინტერესებულიყო.
_ ხომ გვქონდა ამაზე საუბარი?
_ საუბარი კი გვქონდა და მაშინ მითხარით, შეკითხვები, რომლებიც ჩემთან გაქვთ, სირაძეს დაუსვითო. დავუსვით და მან გვითხრა, რომ თქვენ ამ ყველაფრის საქმის კურსში იყავით.
_ კომისია არის დამოუკიდებელი.
_ თქვენი ქვემდებარე კომისია ხომ იყო?
_ გასაგებია, მაგრამ…
_ კიდევ ერთხელ დაგიკონკრეტებთ, რომ ადამიანი, რომელიც დღეს ძებნილია და რომელსაც გამოძიება ათობით ყალბი დოკუმენტის გაცემაში ადანაშაულებს, ამბობს, რომ თქვენ იცოდით ყველაფერი, რის გამოც ის პასუხისგებაში მისცეს, ანუ თანამონაწილე იყავით.
_ სად თქვა ეს შოთამ?
_ ჩვენთან ინტერვიუში.
_ სად ნახეთ?
_ მაგას თქვენთვის რა მნიშვნელობა აქვს? მთავარია, რომ ამბობს…
_ როცა ადამიანი ამბობს, რომ უკანონობის თანამონაწილე ვარ, სულ მცირე დასაბუთება და დამტკიცება უნდა. არის მაგისთვის სპეციალური ორგანოები.
_ ის, რომ თქვენ არაფერი იცოდით, არავის სჯეროდა. ჯერჯერობით, აქ საუბარი არ არის იმაზე, რომ ქრთამს იღებდით… ამ ეტაპზე ცოდნა-არცოდნაზე ვსაუბრობთ. ეჭვებს ისიც აჩენს, რომ მაშინ თანამდებობა დატოვა მამუკა დოლიძემ და არა თქვენ, ადამიანმა, რომლის დაქვემდებარებაშიც იყო კომისია…
_ არის რაღაც კანონმდებლობა და კანონმდებლობა განსაზღვრავს ყველაფერს, მათ შორის, დანაშაულსაც. რაც შეეხება თანამდებობას, ვიღაცა ტოვებს, ვიღაც _ არ ტოვებს.
_ მინიმუმ, მორალური პასუხისმგებლობა არ გიგრძნიათ?
_ როგორ ფიქრობთ, მე რომ ამის შესახებ მცოდნოდა, ასეთი რამ მოხდებოდა? ნამდვილად არ მოხდებოდა. რაც შეეხება მორალურ პასუხისმგებლობას, ამისთვის არ ტოვებენ თანამდებობას.
_ მამუკა დოლიძემ რატომ დატოვა?
_ მას ჰკითხეთ.
_ მე თქვენი მოსაზრება მაინტერესებს.
_ მე რა ვიცი?
_ მაშინ ხომ იყო მითითება, რომ თანამდებობა ორივეს უნდა დაგეტოვებინათ?
_ ვისგან იყო?
_ მე მგონი, კარგად უნდა გახსოვდეთ _ რამაზ ნიკოლაიშვილისგან.
_ არა, კაცო, არავის არ უთქვამს ჩემთვის მსგავსი რამ.
_ და ამას თქმა სჭირდებოდა? ამხელა სკანდალი მოხდა პატარა საკრებულოში, იქ სადაც 30 კაცი მუშაობს და სადაც თქვენ ხართ ხელმძღვანელი.
_ არავითარი სკანდალი არ იყო. პირიქით, მე გული დამწყდა, რომ ასეთი რაღაც მოხდა. შოთიკო ჩემი მეგობარი იყო.
_ ის ამბობს, რომ თქვენ კარგი ურთიერთობა არასდროს გქონდათ.
_ როგორ არა? ერთად ვიყავით სულ. ბავშვობის მეგობრები არ ვყოფილვართ, მაგრამ არავითარი ცუდი, პიროვნული ერთმანეთში არ გვქონია არასდროს.
_ ბატონო ანტონ, იქნებ, ამიხსნათ, როგორ მოხდა, რომ ადამიანმა, რომელიც პრეზიდენტისგან დაჯილდოებული იყო ღირსების ორდენით, რომელიც იყო ფრაქცია “ნაციონალების” თავმჯდომარე (თუმცა, როგორ გახდა ის ფრაქციის თავმჯდომარე, საზოგადოებამ კარგად იცის. რედ.), ლეგალიცაზიის კომისიის ხელმძღვანელი, ამდენ დოკუმენტს ბეჭედი ისე დაარტყა, რომ შედეგებზე არ უფიქრია? და თან ისე, რომ არაფერი იცოდით თქვენ, გუბერნატორმა… და თან მიწებს უკანონებდა ისეთ ადამიანებს, რომლებსაც, მინიმუმ, ასეთი საკითხების გამოძიება ევალებოდათ…
_ ეგ მეც მაინტერესებს და მართლა არ ვიცი, რატომ აკეთებდა ამას. არ მესმის, ვერ ვგებულობ, ახსნა არ მაქვს.
_ საზოგადოებასაც არ აქვს ახსნა, თუ როგორ შეიძლებოდა, თქვენ ეს ყველაფერი არ გცოდნოდათ…
_ ….
_ გამოდის, რომ თუკი ეს ყველაფერი მართლა არ იცოდით, სუსტი ხელმძღვანელი ყოფილხართ.
_ საიდან უნდა მცოდნოდა აბა?! თქვენ გინდათ, რომ ასე იყოს, მაგრამ ასეთი რამ არ ხდება.
_ მე არ მინდა. მე კითხვებს ვსვამ და ინფორმაციას ვამოწმებ…
_ როცა ადამიანი სახლშია და რაღაცას აკეთებს, მე საიდან უნდა ვიცოდე?
_ ისიც იცით, რომ სახლში აკეთებდა ამ ყველაფერს?
_ სახლში აკეთებდა თუ სად აკეთებდა, არ ვიცი. ინდივიდუალურად რომ აკეთებ რაღაცას, ეგ სხვამ როგორ უნდა გაიგოს?
_ რატომ დაგირეკათ გაქცეულმა შოთა სირაძემ პირველად თქვენ და არა მისთვის უფრო ახლობელ ადამიანებს?
_ როდის დამირეკა?
_ როცა გაიქცა მაშინ და ეს ოფიციალურად არის დაფიქსირებული…
_ თქვენ რა იცით, რომ მე დამირეკა და არა სხვას?!
_ ეს საქმეში დევს, ბატონო ანტონ…
_ ნუ, ახლა იცით რა არის? არ უნდა ახლა ასეთი, მე არ მესმის, რა არის. მაგაზე იყო გამოძიება და ყველაფერი ყველაზე უკეთ შოთამ იცის.
_ და მან რომ გვითხრა, იმიტომაც დაგიკავშირდით…
_ თქვენ მეუბნებით, რომ რასაც აკეთებდა, მე მითანხმებდა?
_ შოთა სირაძემ თქვა, რომ თქვენ იცოდით.
_ გამოვიდეს და თქვას.
_ თქვა ინტერვიუში და ამ ინტერვიუს წაკითხვა გაზეთში შეგიძლიათ…
_ თქვენ გაზეთში რას წერთ, ეს სხვა თემაა.
_ ბატონო ანტონ, ჩვენ ვწერთ იმას, რაც გვითხრეს და არასოდეს არ ვწერთ ერთი მხარის კომენტარს…
_ გავიგე, მაგრამ მასე ყველაზე ყველაფრის თქმა შეიძლება, _ გვითხრა ხუნდაძემ.
საკრებულოს თავმჯდომარემ ასევე უარყო ერთ-ერთი თვითმხილველის მიერ მოწოდებული ინფორმაცია, რომელიც სირაძის გაქცევის შემდეგ, გუბერნიაში ჩატარებულ თათბირს ესწრებოდა. როგორც წყარომ გვითხრა, სწორედ იმ თათბირზე, რამაზ ნიკოლაიშვილმა პირდაპირ მიუთითა ანტონ ხუნდაძეს, რომ თანამდებობა უნდა დაეტოვებინა, თუმცა, ხუნდაძე არ დაეთანხმა იმ მიზეზით, რომ ინფორმაცია იმის შესახებ, რაც ლეგალიზაციის კომისიაში ხდებოდა, უშუალოდ მის მიერ მიწოდა მხარის გუბერნატორს, ვალერი ჩიტაიშვილს და რომ მარტო ის პასუხს არ აგებდა. როგორც გვითხრეს, სწორედ ამ სიტყვების გამო მოახერხა ხუნდაძემ თანამდებობის შენარჩუნება.
_ მსგავსი საუბარი არ ყოფილა, _ მხოლოდ ეს კომენტარი გააკეთა ამ ინფორმაციაზე ანტონ ხუნდაძემ.
ჩვენ შევეცადეთ ამ საკითხზე გუბერნატორის კომენტარიც მოგვეპოვებინა, თუმცა, მან ჩვენ სატელეფონო ზარებს არ უპასუხა.
