დღეს, თბილისის საქალაქო სასამართლოში, ირაკლი ოქრუაშვილის სასამართლო პროცესი გაიმართა. სასამართლოს პრესსამსახურმა, მედია საშუალებებს კადრების გადასაღებად მხოლოდ 2-წუთიანი დრო განგვისაზღვრა; თან საყვედურიც გვითხრეს – წინა სასამართლო პროცესზე ბევრი ,,ჭუჭყი” გადაიღეთ და ამიტომ, სანამ სასამართლო დარბაზში ოქრუაშვილს არ შემოიყვანენ, ოპერატორებს დარბაზში ვერ შეგიშვებთ, გალერეიდან გადაიღეთო. როგორც გაირკვა, ე.წ. ,,ჭუჭყი” ოპერატორების მიერ გადაღებული ვიდეოკადრი ყოფილა, რომელზეც ასახულია, რომ დარბაზში მსხდომი საზოგადოება ირაკლი ოქრუაშვილის განსასჯელის სკამზე გამოჩენას ტაშით შეხვდა.
დღეს, განსასჯელის სკამზე მჯდომი შსს და თავდაცვის ყოფილი მინისტრი, ირაკლი ოქრუაშვილი ნერვებს ასანთის კოლოფით და ასანთის ღერებით იმშვიდებდა.
მოსამართლე ხათუნა ხარჩილავამ, იმის გამო, რომ სასამართლომ ვერ უზრუნველყო პროცესზე ბრალდებულ გაბრიელ პავლიაშვილის მოყვანა, რომელიც 28 ნოემბერს დააკავეს და გლდანის #8 საპყრობილეშია მოთავსებული, სასამართლო სხდომა 5 დეკემბრის 10 საათისთვის გადადო.
