საქართველოს პარლამენტის უმცირესობის წევრის გოგა ხაჩიძის მამის მევლუდ ხაჩიძის ქონებას, კერძოდ მიწის ნაკვეთს საგადასახადო გირავნობა გუშინ დაედო. ამის შესახებ ინფორმაცია გოგა ხაჩიძემ საკუთარი facebook-ით გაავრცელა. დეპუტატი წერს, რომ მამამისის უძრავი ქონება ფინანსთა სამინისტროს მიერ სრულიად დაყადაღებულია. მოგვიანებით პარლამენტარი ამ თემას კიდევ ერთი პოსტით გამოეხმაურა, სადაც, აღნიშნულია, რომ ეს ჩვეულებრივი საგადასახადო პროცედურებია და აღარ მინდა ყველაფერი პოლიტიკური ზეწოლის ჭრილში განვიხილოო.
საქართველოს ფინანსთა მინისტრის ნოდარ ხადურის განცხადებით: “ქონების დეკლარირება ავტომატურ რჟიმში მოხდა და ეს არ ეხება მხოლოდ ბატონი მევლუდ ხაჩიძის ქონებას. ყველა იმ გადამხდელს, რომელსაც გადასახადი დროზე არ აქვს გადახდილი, ელექტრონულად, ავტომატურად რეჟიმში ხელოვნური აღსრულების მექანიზმი ედება… რამდენადაც ვიცი, ბატონმა გოგა ხაჩიძემ თავად გააკეთა განმარტება და განაცხადა, რომ ეს საკითხი პოლიტიკურ თემას არ უკავშირდება. ეს წმინდა საგადასახადო თემაა და აბსოლუტურად მოგვარებადია. ვფიქრობ, საკითხი დღესვე მოგვარდება. ბატონი მევლუდი გადაიხდის გადასახადს და საგადასახადო გირავნობა მოეხსნება.”
18 816 კვ.მ მიწის ნაკვეთის წლევანდელი გადასახადი 250 ლარი მევლუდ ხაჩიძეს კანონის შესაბამისად 15 ნოემბრამდე უნდა დაეფარა. “ვადასტურებ, რომ მოხსნილია ყველა “პტიჩკა” და ვისაც გადასახადი დროულად არ აქვს გადახდილი, ყველას მიმართ ამ ტიპის ღონისძიებების განხორციელება იწყება,” – აცხადებს საქართველოს ფინანსთა მინისტრი.
(ფოტო “კომერსანტ. გე”)
