თანამდებობას ინარჩუნებს და გურიის პოლიციის უფროსის ერთ-ერთ მოადგილედ რჩება გოჩა ფერსაშვილი, სკამი დატოვა პეტრიაშვილის მეორე მოადგილემ ლაშა ჩიქვილაძემ, რომელიც გურიის სამხარეოს ყოფილი უფროსის დავით ცირეკიძის კადრი იყო. მან თანამდებობიდან წასვლის შესახებ ინფორმაცია “გურია ნიუსთან” დაადასტურა. ლაშა ჩიქვილაძის ადგილი კი გურიის სამხარეო მთავარ სამმართველოში დეტექტივების ხაზით თბილისელმა პაპუნა გობეჯიშვილმა დაიკავა.
თანამდებობა დატოვა ასევე ოზურგეთის პოლიციის სამმართველოს უფროსმა ზვიად სვანიძემაც. ის ჩვენს სატელეფონო ზარებს არ პასუხობს.
როგორც ჩვენთვის არის ცნობილი თანამდებობას მალე დატოვებს ჩოხატაურის პოლიციის სამმართველოს უფროსი ტატო ვასაძე. მან შესაძლოა ბათუმში ძალოვან სტრუქტურებში გააგრძელოს მუშაობა.
ტატო ვასაძე “გურია ნიუსთან” საუბარში აცხადებს, რომ მისი თანამდებობიდან წასვლის შესახებ განცხადება ხვალ ან ზეგ აუცილებლად დაიწერება.
_დღეს ვასრულებ ჩემს მოვალეობას, ვარ სამსახურში. ალბათ ხვალ ან ზეგ ბრძანება დაიწერება. რომ უნდა დავტოვო თანამდებობა, ეგ ვიცი, თუმცა გადაწყვეტილი არ არის, სად გავაგრძელებ მუშაობას _ გვითხრა ვასაძემ.
ჯერჯერობით, გადაწყვეტილი არ არის, ვინ დაიკავებს გურიაში პოლიციის ოზურგეთის, ლანჩხუთისა და ჩოხატაურის სამმართველოების უფროსების ადგილს. შინაგან საქმეთა სამინისტროში ახალი კანდიდატურებზე ბრძანებები ამ კვირაში დაიწერება.
როგორც ჩვენთვის ხდება ცნობილი, ოზურგეთის პოლიციის სამმართველოს უფროსად ეროდი გორდელაძის კანდიდატურა განიხილება, ლანჩხუთის პოლიციის სამმართველოს უფროსი ირაკლი შავიშვილი ოზურგეთის პოლიციის სამმართველოს უფროსის ერთ-ერთ მოადგილედ დაინიშნება.
ოზურგეთელი ეროდი გორდელაძე დიდი ხნის განმავლობაში მუშაობდა გურიის პოლიციაში სხვადასხვა თანამდებობებზე, ბოლოს ის გურიის სამხარეო მთავარი სამამრთველოს უფროსის მოადგილედ მუშაობდა, რომელიც ბახმაროს მიწებისგახმაურებულ სკანდალურ ფაქტებს გადააყოლეს.
_ ჯერ არ არის გადაწყვეტილი, ბრძანება ამ კვირის ბოლოს დაიწერება სავარაუდოდ, _ გვითხრა გორდელაძემ.
“გურია ნიუსი” დაუკავშირდა ლანჩხუთის პოლიციის უფროსს ირაკლი შავიშვილს, რომელმაც განაცხადა, რომ ის ჯერჯერობით თავის უფლება მოსილებას ასრულებს.
_მე ვარ ლანჩხუთის პოლიციის სამმართველოს უფროსი. რა და როგორ გადაწყდება მომავალში, არ ვიცი. თუ დავინიშნები ოზურგეთში მოადგილედ დარწმუნებული ვარ, ამასაც გაიგებთ, _ გვითხრა შავიშვილმა.
ჩვენ დავუკავშირდით გურიის სამხარეო მთავარი სამმართველოს ახლად დანიშნულ შეფს ზაზა პეტრიაშვილს, რომელმაც პრესსამსახურთან გადაგვიმისამართა.
_ძალიან გთხოვთ ნებისმიერი ინფორმაციის დასაზუსტებლად დაუკავშირდით შინაგან საქმეთა სამინისტროს პრესსამსახურის ხელმძღვანელს ნინო გიორგობიანს, _ გვითხრა პეტრიაშვილმა.
