კომისია საკრებულოს წევრებით, არასამთავრობო ორგანიზაციების და ადგილობრივი გაზეთების წარმომადგენლებითაა დაკომპლექტებული. თავდაპირველად, კომისიაში 15 წევრი იყო, მაგრამ მოგვიანებით, რაც მისი შემადგენლობა რამდენიმე პოლიტიკოსმა დატოვა, მუშაობა 11 წევრმა განაგრძო.
ამ ეტაპზე, ლანჩხუთში სიტუაცია ასეთია: გამგეობის შენობის წინ, გამგეობისა და საკრებულოს მაღალი თანამდებობების პირთა გადადგომის მოთხოვნით, კვლავ განაგრძობს შიმშილობას უკმაყოფილოთა მცირე ჯგუფი, ე. წ. ბიწაძის დაჯგუფება. გამგებლის თანამდებობის მოსაპოვებლად გამართულ ელექტრონულ კონკურსში კი მონაწილეთა რაოდენობა დღითი დღე იზრდება. ლანჩხუთის გამგებლობის სურვილს საქართველოს სხვადასხვა ქალაქებში მცხოვრები პირები გამოთქვამენ.
“გურია ნიუსს“ დღეს კოალიცია “ქართული ოცნებიდან“ ახალსოფლის საარჩევნო კომისიის წევრი ალეკო ევგენიძე დაუკავშირდა, რომელმაც საზოგადოებრივ საწყისებზე შექმნილი საორგანიზაციო ჯგუფის მიერ ჩატარებული კვლევის შედეგები წარმოადგინა.
“არსებულმა სიტუაციამ გვაიძულა ჩაგვეტარებინა მოსახლეობის სხვადასხვა ფენების გამოკითხვა, რათა გამოგვემჟღავნებინა მათი დამოკიდებულება ზემოთ აღნიშნული საკითხის მიმართ. ჩვენმა 10-კაციანმა ჯგუფმა დიდი სამუშაო გასწია და ლანჩხუთის თითქმის ყველა სოფელში ჩავატარეთ გამოკითხვა. ჩვენ მიერ დაბეჭდილ ანკეტებში ერთადერთი კითხვა იყო: ვისი არჩევა გსურთ ლანჩხუთის მუნიციპალიტეტის გამგებლად? ანკეტაში მითითებული იყო რამდენიმე, ლანჩხუთელებისთვის ცნობილი პიროვნება. აღმოჩნდა, რომ გამოკითხულთა დიდი უმრავლესობა ამ თანამდებობაზე ყველაზე შესაფერის კანდიდატად ცნობილ ადვოკატსა და უფლებადამცველს, წარმოშობით ლანჩხუთელ ქალბატონს ლია მუხაშავრიას ისურვებდა,” _ გვითხრა ალეკო ევგენიძემ.
არაოფიციალურ გამოკითხვაში მონაწილეობა მიიღო 500-მა ლანჩხუთელმა. მათგან, როგორც კვლევის ავტორი აცხადებს, 412 რესპონდენტმა უპირატესობა ლია მუხაშავრიას მიანიჭა.
