“11 დეკემბერს, მედიის საშუალებით, გავრცელდა ინფორმაცია, რომ მოქალაქემ თ.გ. 9 დეკემბერს სისხლის სამართლის კოდექსის 108-ე მუხლით გათვალისწინებული განზრახ მკვლელობის მცდელობა ჩაიდინა, რაც ძალიან სამწუხარო ფაქტია და რეაგირების გარეშე არ დარჩება. თ.გ. იმ პატიმართა ჩამონათვალში შედიოდა, რომელთა გაჩერება თავისუფლების აღკვეთის პირობებში პირდაპირ საფრთხეს უქმნიდა მათ სიცოცხლეს და მათი გამოჯანმრთელება სასჯელაღსრულების სისტემის ფარგლებში შეუძლებელი იყო. სასჯელაღსრულების, პრობაციის და იურიდიული დახმარების საკითხთა მინისტრმა აღნიშნული პატიმრების შეწყალების შუამდგომლობით საქართველოს პრეზიდენტს მიმართა. საერთაშორისო კვლევების თანახმად, სასჯელისგან გათავისუფლებული ადამიანების საშუალოდ 16% კვლავ ჩადის დანაშაულს, თუმცა ადამიანის უფლებათა დაცვის პრინციპების გათვალისწინებით, მძიმედ დაავადებული პატიმრების შემთხვევაში სასჯელისგან გათავისუფლებაზე უარის თქმა მხოლოდ მსაჯავრდებულის მიერ ჩადენილი დანაშაულის სიმძიმის გამო დაუშვებელია. შუამდგომლობა შეწყალებაზე ამ შემთხვევაში ერთადერთ გამოსავალს წარმოადგენდა, რადგან სასჯელისგან გათავისუფლების სხვა მექანიზმები ვერ უზრუნველყოფდა 88 მძიმე ავადმყოფი მსჯავრდებულის გათავისუფლებას ჯანმრთელობის მდგომარეობის საფუძველზე. მომავალში ჯანმრთელობის მძიმე მდგომარეობის მქონე პატიმართა საკითხის შესწავლას საქართველოს სასჯელაღსრულების, პრობაციისა და იურიდიული დახმარების საკითხთა სამინისტროსა და საქართველოს შრომის, ჯანმრთელობისა და სოციალური დაცვის სამინისტროს ერთობლივი მუდმივმოქმედი კომისია გააგრძელებს, რომლის დაკომპლექტებაც გარკვეულ დროს მოითხოვს”, – აღნიშნულია განცხადებაში.
შეგახსენებთ, რომ შინაგან საქმეთა სამინისტროს მიერ გავრცელებული განცხადების თანახმად: “თბილისის მთავარი სამმართველოს დიდუბე-ჩუღურეთის სამმართველოს თანამშრომლებმა მკვლელობის მცდელობის ფაქტზე 1950 წელს დაბადებული თენგიზ გ. დააკავეს.
გამოძიების შედეგად დადგინდა, რომ 2012 წლის 9 დეკემბერს თამარ მეფის გამზირზე თენგიზ გ.-მ 1981 წელს დაბადებულ თამაზ კახიძეს დანით მუცლის არეში ჭრილობა მიაყენა და შემთხვევის ადგილიდან მიიმალა.
დაზარალებულის აღწერილობის საფუძველზე აღნიშნული პიროვნება პოლიციის თანამშრომლებმა ფოცხვერაშვილისა და ნინოშვილის ქუჩების კვეთაზე, სარდაფთან დააკავეს. დაკავების მომენტში მას ხელში ეჭირა დანა, რომელსაც პირზე სისხლის კვალი ჰქონდა.
ბრალდებული ე.წ. “ქურდული ტრადიციების” მიმდევარია და წარსულში მრავალჯერაა ნასამართლევი. 2007 წლიდან იგი 11-წლიან სასჯელს ყაჩაღობისთვის იხდიდა.
თენგიზ გ. 2012 წლის 7 დეკემბერს საქართველოს პრეზიდენტის შეწყალების საფულძველზე საპატიმროდან გაათავისუფლეს.”
