მედპერსონალი ქობულეთის საავადმყოფოს მფლობელი კომპანიის “ჩემი ოჯახის კლინიკის” მიერ პერსონალისათვის ტესტირების ჩატარებას აპროტესტებს. ისინი ასევე ახალ შენობაში გადასვლის წინააღმდეგი არიან. ექიმები ასევე შრომის ადეკვატურ ანაზღაურებას და კარგ სამუშაო პირობებს ითხოვენ.
“გუშინ შუქი ჩაქრა. ახალშობილი ბავშვი, რომელიც 28 გრადუს ტემპერატურაზე უნდა იყოს, უშუქობის გამო 12 გრადუსზე არის. არანაირი პირობები ამ საავადმყოფოში არ არის. არ არის კვება, არ არის სითბო, აბსოლუტურად არაფერი არ არის. მედპერსონალის რამდენიმე წარმომადგენელი გადავიდა ახალი მენეჯერის მხარეს. დაპირდნენ რომ განყოფილების გამგეებად დანიშნავდნენ, ხელფასს გაუზრდიდნენ და ა.შ. ეს იყო მიზანმიმართული ქმედება, მაგრამ პერსონალის ძირითადი ნაწილი ჩვენს გვერდითაა” – ამბობს მეან-გენეკოლოგი ქეთევან ნოღაიდელი.
მედპერსონალს დახმარება აჭარის პროფკავშირების ხელმძღვანელმა აღუქვა. ილია ვერძაძის განცხადებით, დასაქმებულთა უფლებები ირღვევა. “როცა მათ ეუბნები, რომ უნდა გადაიყვანო ისეთ შენობაში სადაც 70 წლის განმავლობაში ნავთობგადამამუშავებელი ობიექტი იყო, სადაც ტრასა, რკინიგზა, ბენზინგასამართი სადგურია ირგვლივ, რაც თავისთავად უარყოფითი ჩვენებაა, რომ აქ ნორმალური პირობები იყოს როგორიც საავადმყოფოს სჭირდება. ამით კი ამ ადამიანების უფლება რა თქმა უნდა ირღვევა” – ამბობს ილია ვერძაძე.
ქობულეთის საავადმყოფოში მიმდინარე მოვლენები უფლებების დარღვევად მიაჩნია უფლებათდამცველ თამაზ ბაკურიძესაც: “ბუნებრივია, როცა ახალი მენეჯმენტი მოდის თავის წესებს ამკვიდრებს, მაგრამ ეს წესები უნდა იყოს აგებული იმ ადამიანების ინტერესებზე ვინც არის დასაქმებული. აქ ვხედავთ, რომ ვიღაცა ცდილობს ამ ადამიანების განდევნას და ემუქრება, რომ შემცვლელებს ჩამოიყვას სხვა რეგიონიდან. ეს კი ამ ადამიანთა უფლებების დარღვევაა” – ამბობს თამაზ ბაკურიძე.
მედპერსონალის განცხადებებს გამოეხმაურა ქობულეთის საავადმყოფოს მენეჯერი ნიკა ჭეჟია გამოეხმაურა:
“ჩემი ოჯახის კლინიკა” ქობულეთში ხსნის ახალ საავადმყოფოს. ნოემბრის თვეში კოლექტივის მიერ იყო გამოთქმული სურვილი, რომ მომხდარიყო კადრების ობიექტური შერჩევა. კიდევ ერთხელ ხაზგასმით მინდა გითხრათ, რომ ყველა ის თანამშრომელი რომელიც გადალახავს მინიმალურ ბარიერს, დასაქმდება ახალ კლინიკაში, რომელიც იქნება აღჭურვილი უახლესი აპარატურით და სადაც პაციენტებს გაუწევენ მაღალი ხარისხის სამედიცინო მომსახურებას” – განაცხადა ქობულეთის საავადმყოფოს მენეჯერმა.
საავადმყოფოს მედპერსონალი მთავრობას დახმარებას თხოვს. შესაბამისი განცხადებებით მედპერსონალმა უკვე მიმართა სხვადასხვა სახელმწიფო უწყებას, თუმცა ხელისუფლების მხრიდან რეაგირება ამ დრომდე არ მომხდარა.
