ვასაძეს, გურიაში, განსაკუთრებით კი ჩოხატაურში, კარგად იცნობენ. მის სახელს რამდენიმე გახმაურებული საქმე უკავშირდება _ მათ შორის, “გურია ნიუსის” ჟურნალისტისთვის ფიზიკური და სიტყვიერი შეურაცხყოფის მიყენება.
ვასაძე ჟურნალისტს მხოლოდ იმის გამო გაუსწორდა, რომ იგი პოლიციის შენობაში შესვლას, პოლიციის უფროსის თანხმობით (მაშინ პოლიციის უფროსი ტატო ვასაძის მამა, გულთმისან ვასაძე გახლდათ) აპირებდა.
ჟურნალისტი იმ დროს დაპატიმრებული ოპოზიციონერის, მამუკა ცინცაძის ბედის გარკვევას ცდილობდა, რომლის საქათმეში სამართალდამცველებმა იარაღი იპოვეს და რომელსაც პოლიციაში 3 საათის განმავლობაში ადვოკატის გარეშე კითხავდნენ.
ვასაძე, კარებში შესულ ჟურნალისტს გადაუდგა, ჯერ სიტყვიერი შეურაცხყოფა მიაყენა, შემდეგ კი წიხლიც მოიშველია. ამ ყველაფერს რამდენიმე ადამიანი უყურებდა, აღარაფერს ვამბობთ იმ პოლიციელებზე, რომლებიც ინციდენტს მშვიდად ადევნებდნენ თვალს.
სამედიცინო ექსპერტიზის, სახალხო დამცველის და ახალგაზრდა იურისტთა ასოციაციის წევრების ჩართვის, მოწმეების არსებობის და ჩვენებების მიუხედავად, ფაქტზე აღძრული სისხლის სამართლის საქმე “უპერსპექტივო” აღმოჩნდა და არავინ დასჯილა. მოწმეებს ვასაძის თანამშრომლები ღამით სახლში აკითხავდნენ და სასურველი ჩვენების დაწერას სთხოვდნენ. საქმე ამ დრომდე არ დაუხურავთ.
ამ ფაქტის გამო, მედიის წარმომადგენლებმა ჩოხატაურში საპროტესტო მსვლელობა, პოლიციის სამმართველოს წინ კი აქცია მოაწყვეს, თუმცა, ამით არაფერი შეცვლილა.
სხვა ინციდენტებთან ერთად, ტატო ვასაძეს საარჩევნო გამოცდილებაც აქვს _ ჯერ კიდევ 2010 წლის თვითმმართველობის არჩევნების დროს, თანამოაზრეებთან ერთად, ე.წ. “ძველბიჭებთან” კარდაკარ დადიოდა და ხელისუფლების მხარდაჭერას აიძულებდა, წინააღმდეგ შემთხვევაში კი, ციხით ემუქრებოდა.
ოქტომბრის არჩევნების წინ კი, უშუალოდ ვასაძე რეკავდა ოპოზიციონერებთან და მათი საბანკო ანგარიშების მიმოქცევის გარკვევის მიზეზით, სწორედ არჩევნების დღეს იბარებდა პოლიციაში.
ვასაძე ამ დრომდე ინარჩუნებდა ჩოხატაურის პოლიციის უფროსის პოსტს, თუმცა, როგორც გაირკვა, რამდენიმე დღეში, ბათუმში გადაჰყავთ.
როგორც გავიგეთ, ვასაძის მსგავსად, გადაადგილება ელის ტარიელ ცერცვაძეს _ პოლიციელს, რომელიც ზემოთ აღნიშნული ინციდენტის დროს, როცა ვასაძე ჟურნალისტს სცემდა, ვასაძეს ზურგს უმაგრებდა და უფრო მეტიც, დაკავებული მამუკა ცინცაძის დედას სიტყვიერ შეურაცხყოფას აყენებდა.
ტარიელ ცერცვაძეს ოზურგეთის პოლიციის უფროსის მოადგილედ ნიშნავენ, მიუხედავად იმისა, რომ ვასაძის მსგავსად, მის წარსულშიც მოიძებნება ბევრი შავი ლაქა _ ჯერ კიდევ შევარდნაძის პერიოდიდან მოყოლებული.
“გურია ნიუსის” არქივში შემონახულია მასალა, სადაც ასახულია, როგორ უსწორდებოდა პოლიცია ფიზიკურად პენსიონერებს, რომლებიც ოზურგეთში მყოფ იმდროინდელ სახელმწიფო მინისტრთან, ავთო ჯორბენაძესთან მისვლას ცდილობდნენ.
“ნაციონალურ მთავრობაში” ცერცვაძე ლანჩხუთის პოლიციის უფროსად დანიშნეს. გურიის გუბერნატორი, ვალერი ჩიტაიშვილი, ცერცვაძეს ასეთ შეფასებას აძლევდა: “ტარიელ ცერცვაძე პრინციპული ადამიანია, დაუნდობელი იქნება დამნაშავეების მიმართ.”
ცერცვაძემ გუბერნატორს იმედები გაუმართლა და “დამნაშავეების” მიმართ მართლაც დაუნდობელი იყო. სწორედ მისი პოლიციის უფროსობისას დებდნენ ლანჩხუთელი ოპოზიციონერების ქათმები ავტომატის მჭიდებს და მის დროს დადიოდნენ ხელისუფლების მოწინააღმდეგე პირები ნარკოტიკით “სავსე ჯიბეებით” ლანჩხუთის ცენტრში.
აღსანიშნავია ისიც, რომ ბახმაროში უკანონოდ “დაკანონებულ” ნაკვეთებს შორის, ტარიელ ცერცვაძის ნაკვეთიც იყო, თუმცა, სხვა ჩინოვნიკებისგან განსხვავებით, მას თანამდებობა არ დაუტოვებია.
ბევრი კითხვის ნიშანი არსებობს ახლახან, გორის სამხარეო პოლიციის უფროსად დანიშნული გიგა ჯაფარიძის მიმართ; ერთ-ერთი კი, მისი ხელმძღვანელობით ჩატარებულ იმ სპეცოპერაციას უკავშირდება, რა დროსაც, თვითმხილველების თქმით, ხელებაწეულ ახალგაზრდას 27 ტყვია ესროლეს და გარდაცვლილი სცემეს.
ძალოვანი უწყების ხელმძღვანელს ხელი არც იმაში შეშლია, რომ ანტიტერორისტული სამსახურის ერთ-ერთი განყოფილების უფროსად დაენიშნა შოთა ჭანუყვაძე _ გურიის სამხარეო პოლიციის მთავარი სამმართველოს ყოფილი უფროსი, რომელსაც ბახმაროში 4 უკანონო ნაკვეთი აღმოუჩინეს და რომლის მუშაობის დროს, გურიაში რამდენიმე ოპოზიციონერი, სხვადასხვა ბრალდებით დააკავეს.
