ამის მიზეზად ფინანსებთან დაკავშირებულ პრობლემებს ასახელებენ. მუშები, რომლებიც სამუშაოებს ასრულებენ, “გურია ნიუსთან” აცხადებენ, რომ მათ რამდენიმე თვეა კუთვნილი სახელფასო ანაზღაურება არ აუღიათ. მოსახლეობა კი გაზიფიცირების სამუშაოების განახლებას ელოდება.
_ რამდენიმე თვეა არ აგვიღია ხელფასი, კომპანიას დავალიანება აქვს ჩვენი, არც ვიცით განახლდება თუ არა სამუშაოები, კონკრეტულ პასუხს კი ვერავინ გვცემს, იქნებ თქვენ ჟურნალისტებმა გაიგოთ რამე ამასთან დაკავშირებით, _ განაცხადა რამდენიმე მუშამ “გურია ნიუსთან”.
“გურია ნიუსი” დაუკავშირდა სამშენებლო კომპანია შპს “სერვისი”- ს დირექტორს დავით გეგენავას. სწორედ ეს სამშენებლო კომპანია აწარმოებდა ოზურგეთის მუნიციპალიტეტის სოფელ გურიანთაში გაზიფიცირებას.
_ ბატონო დავით, სოფელ გურიანთაში წინასაარჩევნოდ დაწყებული გაზიფიცირების სამუშაოები არჩევნების შემდეგ შეჩერდა, რა არის ამის მიზეზი?
_ სამუშაოს დამკვეთი არის “სოკარ ჯორჯია გაზი”, მე როგორც ვიცი, არის ერთი ქუჩა დასამატებელი, რომელიც “სოკარმა” უნდა დაამატოს. აქედან გამომდინარე, ცოტა გაურკვევლობა მოხდა, მოსახლეობა არ გვამუშავებდა, მათ გაგვაჩერებინეს სამუშაოები, სწორედ მაგ საკითხთან დაკავშირებით მივდივარ ახლა ხელმძღვანელობასთან.
პროექტში არის გამორჩენილი ერთი უბანი, დანარჩენი ყველაფერი გაკეთებულია.
_ მოსახლეობა ამის მიზეზად სხვა პრობლემას ასახელებს, კონკრეტულად კი ფინანსებს, ეს პრობლემა არ დგას?
_ და ვინმეს აწუხებს ეგ?
_ რა თქმა უნდა, ჩვენ მუშები დაგვიკავშირდნენ ამ პრობლემასთან დაკავშირებით, ისინი აცხადებენ, რომ მათ რამდენიმე თვეა არ აუღიათ კუთვნილი ხელფასი.
_ ყველა პრობლემა მოგვარდება. სანამ შესრულებულ სამუშაოს ბოლომდე არ დავდებთ, მანამ იქნება პრობლემა. ცოტა დაუგვიანდათ, თუმცა არავის არცერთი თეთრი არ დაეკარგება.
_ წინასაარჩევნოდ დაწყებული გაზიფიცირება როდის განახლდება?
_ გაზიფიცირება გაცილებით უფრო ადრე დაიწყო.
_ დიახ, ზაფხულში დაიწყო, არჩევნებამდე რამდენიმე თვით ადრე…
_ კი ბატონო.
_ ახლა ფაქტია, რომ შეჩერებულია.
_ ყველაფერი მოგვარდება ძალიან მალე. გადაწყდება დარჩენილი ერთი უბნის პრობლემა და დაიწყება ისევ, _ გვითხრა სამშენებლო კომპანია შპს “სერვისი”-ს დირექტორმა დავით გეგენავამ.
წინასაარჩევნოდ დაწყებული და ასევე შეჩერებული გაზის გაყვანით სამუშაოებს ოზურგეთის მუნიციპალიტეტის სოფელ ოზურგეთში სამშენებლო კომპანია შპს “კლასიკ სერვის პლიუსის” ახორციელებდა.
“გურია ნიუსი” შპს “კლასიკ სერვის პლიუსის” დირექტორს შიო ქიტიაშვილს დაუკავშირდა, რომელიც აღნიშნავს, რომ გაზიფიცირების შეჩერების მიზეზი ფინანსებთან დაკავშირებული პრობლემებია.
სხვათაშორის, არჩევნების შემდეგ ვიმუშავეთ რამდენიმე დღე , _ ამბობს ქიტიაშვილი.
_ სამუშაოს დამკვეთი არის “სოკარ ჯორჯია გაზი”, ფინანსები ჯერჯერობით შეჩერებულია, მარტო მანდ კი არ არა, არამედ მთელ საქართველოში. დაფინანსებას კი გვპირდებიან ყოველ დღე, როგორც კი დაიწყება, მაშინვე განახლდება გაზიფიცირებაც.
_ როდის მიიღებენ მუშები კუთვნილ ხელფასებს?
_ ხელფასები აუცილებლად დარიგდება, ამასთან დაკავშირებით არანაირი პრობლემა არ იქნება.
