სადაც ადრე საექიმო ამბულატორია და ფოსტის განყოფილება იყო. რამდენიმე წლის წინ, როცა სოფლის საკრებულოს საბავშვო ბაღისთვის ვასო ჯაბუას სახლი ჰქონდა დაქირავებული, აღნიშნული შენობიდან ამბულატორია იქვე მდებარე სხვა შენობაში გადაიტანეს, ხოლო გამოთავისუფლებული ფართი საბავშვო ბაღს დაუთმეს.
_ ეს ყოველივე სოფლის ხელმძღვანელობის უშუალო ჩარევით მოხდა. წელს კი, სოფლის პროგრამის პრიორიტეტით, გარემონტდა აქვე მდებარე შენობის მეორე სართული და მალე გადავალთ. მე სხვა რამეზე პრეტენზია არ მაქვს, _ ამბობს საბავშვო ბაღის გამგე ვიოლეტა ცერცვაძე.
თუმცა, პრეტენზია აქვთ საბავშვო ბაღის მეორე თანამშრომელს ნუნუ მახარაძეს და არა ერთ მშობელს:
_ ამ შენობის მეორე ნახევარში, კომუნისტების დროს, ფოსტის განყოფილება იყო განთავსებული. მეორე ნახევარში კი _ სოფლის ამბულატორია. სოფლის საკრებულომ გამონახა საშუალება, ეს ამბულატორია გადაეტანა იქვე მდებარე შენობის მეორე სართულზე. ამბულატორია გაკეთდა თანამედროვე სტანდარტებით. წინანდელ შენობას კი პირველი სართულის მიმდებარე ტერიტორიაზე გაუკეთეს ეზო და საბავშვო ბაღი იქ გადაიტანეს. ბაღის აქ გადმოსვლიდან ექვსი თვის შემდეგ, მოვიდა ნათელა გოლუბიანი, რომელიც ადრე ფოსტის გამგედ მუშაობდა. გვითხრა, რომ ეს შენობა მთლიანად ჩვენ გვაქვს ნაყიდიო. სახტად დავრჩით, _ ამბობს საბავშვო ბაღის თანამშრომელი ნუნუ მახარაძე.
როგორც ქალბატონი ნუნუ ამბობს, მათ ეგონათ, რომ არა თუ ფოსტის ყოფილი გამგე შეიძენდა ამ შენობას, არამედ რახან პირველი სართული იყო, ამ მეორე ნაწილსაც ბაღს შემოუერთებდნენ, მაგრამ პირიქით მოხდა.
როგორც საბავშვო ბაღის გამგე, ვიოლეტა ცერცვაძე ამბობს, საბავშვო ბაღი ამ შენობაში მრავალი წელი იყო განთავსებული: _ მერე, როცა აღმოჩნდა, რომ ეს შენობა მთლიანად შეუსყიდია ნათელა გოლუბიანს და მან თქვა, რომ ეს ყველაფერი სასამართლოს წესით აქვს გაფორმებული. ისევ საკრებულოს დახმარებით პრიორიტეტად იქნა მიჩნეული და გარემონტდა აქვე მდებარე შენობის მეორე სართული. მალე იქ გადავალთ და პირადად მე აღარ მაქვს პრეტენზია, _ ამბობს ის.
ზემო ნატანების საბავშვო ბაღის კონტიგენტი საშუალოდ 15 ბავშვია. თუმცა, სოფელში 600 კომლია და როგორც ნუნუ მახარაძე ამბობს, თუ კომფორტული პირობები იქნება, ბევრი მშობელი აქ მოიყვანს თავის შვილს.
_ შენობა, რომლის მეორე სართულზეც ახალი საბავშვო ბაღი უნდა გაიხსნას, იქვე, ცენტრში მდებარეობს. რემონტი, რომელიც, მათივე თქმით, სოფლის დახმარების პროგრამით გაკეთდა, 33 ათასი ლარი დაჯდა და ჯერ კიდევ არ არის დასრულებული. წვიმის დროს წყალი ჩამოვიდა, მეორე სართულის კიბიდან პირდაპირ სამანქანო გზაზე ჩამოდიხარ. ეს სჯობს თუ ეზოს მქონე, კეთილმოწყობილი პირველი სართული, სადაც ბავშვები ითამაშებენ? _ ამბობენ მშობლები.
ნატო ლაცაბიძე, მშობელი: _ ძალიან კარგი იქნება, თუ საბავშვო ბაღი პირველ სართულზე იქნება განთავსებული, თან ეზოთი. ბავშვები ითამაშებენ, კარგ ამინდში გარეთ გამოვლენ. მეორე სართულზეც კი არის საბავშვო ბაღები ქალაქში და ზოგან სოფელშიც, მაგრამ იქ, სადაც ახლა უნდა გადავიდნენ, არ მინდოდა _ ძალიან მაღალია და ვიწროდ არის. კარგი იქნებოდა, თავიდანვე შევთანხმებულიყავით.
მერი ბოლქვაძე, მშობელი: _ პირველი სართული ჯობია. თავიდან უნდა მომხდარიყო ამაზე მოლაპარაკება. კარგი ეზო აქვს ამ შენობას. ბავშვები ითამაშებენ. არ ვიცი, თავიდანვე რატომ არ მოხდა შეთანხმება. მშობლების და მასწავლებლების უმეტესობას ასე ურჩევნია, მაგრამ ასე გადაწყვიტეს…
ირინა გოგიჩაიშვილი, მშობელი: _ მე მირჩევნია, ბავშვი იყოს უსაფრთხოდ. მინდა, ბაღს ჰქონდეს ეზო. სოფელია და ზაფხულში ბავშვები ითამაშებენ.
თეონა ბოლქვაძე: _ როგორც უმრავლესობა გადაწყვეტს, ისე ვამჯობინებ. მირჩევნია, იყოს პირველი სართული და ეზო ჰქონდეს, ვიდრე მეორე სართულზე აიყვანონ ბავშვები. მე თავიდანვე არ ვიყავი თანახმა, მერე ასე გადაწყვიტეს. სოფელია და ხომ იცით, ერთმანეთს არავინ აწყენინებს, თორემ ყველას პირველ სართულზე ურჩევნია.
სოფელ ნატანების მკვიდრი ნათელა გოლუბიანი ამბობს, რომ ათეული წლების მანძილზე მუშაობდა ზემო ნატანების ფოსტის გამგედ: _ მერე კი, კანონის თანახმად, ნატანების სააქციო საზოგადოებისგან საკუთრებაში შევისყიდე ეს შენობა მთლიანად. მე შიგ ვმუშაობდი და მქონდა ამის უფლება. ახლა ეს ყველაფერი კანონის ძალით, სასამართლოს წესით მაქვს დამტკიცებული და ჩემი საკუთრებაა. ქირა ხომ არ მომითხოვია? თუ მიჩივლებს ვინმე, მეც მექნება პასუხი. ისე კი, მანდ ზოგიერთს მეორე სართულზე ასვლა ეზარება და იმიტომ სურთ ძველ შენობაში დარჩენა, _ ამბობს გოლუბიანი.
ნუნუ მახარაძე კი, სარედაქციო წერილის გარდა, ჩვენთან საუბარშიც ადასტურებს, რომ ეს გადაწყვეტილება უსამართლოა: _ იუსტიციის მინისტრ თეა წულუკიანთანაც წავალ, ბევრი მშობელი და თანასოფლელიც დამიდგება გვერდით. აქ, როგორც უნდოდათ, ისე გადაწყვიტეს ყველაფერი. დააკვირდით, რა და როგორ სჯობია ბავშვებისთვის, ნახეთ ცხადად და სურათზეც. როცა არჩევნის საშუალებაა, რომელი სულელი აირჩევს უარესს?! _ ამბობს მახარაძე.
