“1968 წელს დავიწყე მუშაობა და 51-ე წელია ჩემი პროფესიით ვმუშაობ. ყოველდღე ვმუშაობ კვირის გარდა და კიდევ ათი წელი ვაპირებ მუშაობას. მაქვს ამის შესაძლებლობა და ძალა“, _ ამბობს “გურია ნიუსთან“ საუბრის დროს “მედალფას“ ოზურგეთის სამედიცინო ცენტრის სამეანო განყოფილების თანამშრომელი მაყვალა ტუღუში.
მაყვალა ტუღუშის საიუბილეო თარიღი სამედიცინო ცენტრში საზეიმოდ აღინიშნა.
“ისეთი გახარებული და ამაყი ვარ, ამ ყველაფერს ვერ გადმოვცემ. დაბადების დღეზე ტელეფონზე 580 შეტყობინება მოვიდა. იყო არაერთი სიურპრიზი და საჩუქარი. 40 000 ბავშვი დაიბადა ჩემს ხელში, ეს პატარა რიცხვი ხომ არ არის?! იყო დრო, როდესაც წელიწადში 1500-1800 ბავშვი იბადებოდა ოზურგეთში, ეს რიცხვი ახლა შემცირებულია. მინდა, რომ მრავალშვილიანობა იყოს ჩემს სამშობლოში და მრავლდებოდეს ერი“, _ გვითხრა მაყვალა ტუღუშმა.
როგორც მან გვითხრა, საუბრის დროს განვლილი ცხორვებით კმაყოფილია.
“პასუხისმგებლობით ვეკიდები ჩემს საქმეს. ყველას მადლობელი ვარ, რომ დამიფასდა ჩემი შრომა. მინდა მადლობა ვუთხრა ჩემს უფროსს, დათო მდინარაძეს. ჩემი განვლილი ცხოვრებით ვამაყობ და ამისთვის მადლობელი ვარ უფლის. ესეც მიხარია, რომ “გურია ნიუსი“ წერილს ამზადებს ჩემ შესახებ. ყველას გილოცავთ 2020 წელს. წარმატებულ წლებს გისურვებთ“, _ აღნიშნა ჩვენთან საუბრისას მაყვალა ტუღუშმა.
“გურია ნიუსი“ ახალ წელს ულოცავს მაყვალა ტუღუშს და ჯანმრთელობას და დიდხანს სიცოცხლეს უსურვებს.
