2010 წელს, საპრეზიდენტო პროგრამას “პატრიოტი” დაახლოებით 1 მილიონი ლარი მოხმარდა, 24 ათასი გადაერიცხა საპატრიარქოს, “სხვადასხვას” _ ნახევარი მილიონი, ხოლო “უცნობ ხარჯებში” თითქმის 21 მილიონი ლარი დაიხარჯა.
სოციალურად დაუცველი მოქალაქეებისათვის ერთჯერადმა ფინანსური დახმარებამ სულ რაღაც 150 ათასი ლარი შეადგინა. ტურისტული პოტენციალის სარეკლამო კლიპებში კი, რაც მსოფლიოს სხვადასხვა წამყვანი ტელეარხებით გადაიცემოდა _ 1 361 875 ლარი. უცნაურია, რომ თითქმის მილიონი დაიხარჯა მივლინებებსა და ვიზიტებზე, წესით ეს ხარჯი პრეზიდენტის სარეზერვო ფონდიდან არ უნდა ფინანსდებოდეს.
ხარჯვის ტენდენცია არსებითად არც მომდევნო 2011 წელს შეცვლილა. ფონდიდან გამოყოფილი 49 289 600 ლარიდან ყველზე მეტი საცურაო აუზებზე, სკვერებსა და პარკების მშენებლობაზე დაიხარჯა. კონცერტებსა და შემოქმედებით საღამოებს 7 მილიონი მოხმარდა, ადმინისტრაციული ორგანოების შეუფერხებელი მუშაობაც სარეზერვო ფონდიდან დაფინანსდა. ეკლესიების მშენებლობას 1 379 ათასი ლარი მოხმარდა, საახალწლო ღონისძიებებს _ 1, 5 მილიონი, ხოლო სოციალურად დაუცველ მოქალაქეებს 524 ათასი ლარი.
2012 წელი საარჩევნო წელი იყო და შესაბამისად, მთელი სარეზერვო ფონდი ინფრასტრუქტურის მოწესრიგებას და სოციალური პროექტების დაფინანსებას მოხმარდა, ადმინისტრაციული ორგანოების შეუფერხებელი მუშაობა, რატომღაც, კვლავ ამ ფონდიდან დაფინანსდა – დაახლოებით 4 მილიონი ლარით, სომალელი მეკობრეების ტყვეობიდან ქართველი მეზღვაურების სამშობლოში დაბრუნება 279 ათასი ლარი დაჯდა, ეკლესიების მშენებლობა და პატრიარქის აღსაყდრებიდან 35 წლისთავის აღნიშვნა კი _ 1 139 225 ლარი. “სხვადასხვას” 2, 5 მილონი მოხმარდა; რაც შეეხება უცნობ ხარჯებს, ეს გრაფა 2012 წელს საერთოდ გამქრალია.
ახალგაზრდა იურისტთა ასოციაციის თავმჯდომარე თამარ ჩუგოშვილი ამბობს, რომ პრეზიდენტის ფონდი კახეთის სტიქიის დროს თითქმის ცარიელი აღმოჩნდა და შესაბამისად, დაზარალებულებისთვის 81 მილიონის გადარიცხვა სხვა პროგრამების შემცირების ხარჯზე მოხდა.
”სარეზერვო ფონდები სწორედ სტიქიური უბედურებების შედეგების სალიკვიდაციოდ არის შექმნილი, მაგრამ აღმოჩნდა, რომ ეს ფონდი უაზროდ იხარჯებოდა კონცერტებზე და სხვა კულტურულ ღონისძიებებზე. პრეზიდენტი ამ ფონდიდან ასევე დამატებით აფინანსებდა სამინისტროებს ან ადგილობრივი თვითმმართველობებს, რაც ასევე დარღვევაა. არ შეიძლება თვითმმართველობა ფინანსურად ასე იყოს მიბმული ცენტრალურ ხელისუფლებასთან და პრეზიდენტის გადარიცხვებზე იყოს დამოკიდებული. სერიოზული პრობლემაა ისიც, რომ სარეზერვო ფონდიდან წინასაარჩევნოდ თანხების გამოყოფა ხდებოდა ისეთი ღონისძიებებისთვის, რაც აშკარად კამპანიურ ხასიათს ატარებდა,” – ამბობს ახალგაზრდა იურისტთა ასოციაციის თავმჯდომარე თამარ ჩუგოშვილი.
ახალგაზრდა იურისტთა ასოციაციაში ფიქრობენ, რომ აუცილებელია, საკანონმდებლო ცვლილების გახორციელება, რაც სარეზერვო ფონდების დანიშნულებას და საქმიანობას განსაზღვრავს. ჩუგოშვილი თვლის, რომ ხარჯვითი ნაწილი, უმეტეს შემთხვევებში, დასაბუთებული უნდა იყოს და ის სახელმწიფო შესყიდვების არეალში უნდა მოექცეს.
