“ისე, ღარიბაშვილს კი ვუთხარი, რომ მის სიმამრთან კარგი ურთიერთობა მქონდა “

სოფელ დუისში, გამგეობის შენობაში გამართულ შეხვედრას როგორც ადგილობრივები ამბობენ, ძირითადად  ნაციონალური მოძრაობის აქტივისტები და ყოფილი ჩინოვნიკები დაესწრნენ. ჯარაფ ხანგოშვილი ჩვენთან საუბარში არ მალავს, რომ მინისტრის სიმამრის თამაზ თამაზაშვილის “ძალიან ახლო მეგობარია”.

_ ღარიბაშვილის სიმამრი ჩემი ძალიან ახლო მეგობარი იყო და დღესაც არის. მე ძალიან კარგი დამოკიდებულება  მაქვს თამაზაშვილთან, მაგრამ სხვანაირად რომ არ ეფიქრა, არც დამირეკია და არც მიმილოცავს. ცუდი რა არის, რომ მივედი და შევხვდი მინისტრს? მე არ მესმის, ვინ გააღიზიანა ჩემმა გამოჩენამ ღარიბაშვილის გვერდით? პირიქით, მე დარწმუნებული ვარ, პანკისელების 80%  ჩემი თანამდებობაზე  დაბრუნება უნდა.ჯერჯერობით, არ ვაპირებ თანამდებობაზე მოსვლას, მაგრამ რომ დავაპირო, ხალხს ძალიან გაუხარდება.

_ ბატონო ჯარაფ, “ქართული ოცნების” მხარდამჭერები ამბობენ, რომ ისინი ვერასდროს იგებენ მინისტრების ჩამოსვლას, თქვენ როგორ იგებთ ამ ვიზიტების შესახებ?

_ მოვიდა ჩვენთან ადამიანი და გვთხოვა დავსწრებოდით ღარიბაშვილთან  შეხვედრას. ბატონ მინისტრს გამოვეცნაურე, ტელეფონითაც მოკითხვა შევუთვალე, ძალიან გაეხარდა. იმ არეულ წლებში, თამაზ  თამაზაშვილთან ძალიან კარგი ურთიერთობა მქონდა, მე გამგებელი ვიყავი, ის _ პოლიციის უფროსი. იმ პაატა ზაქრეიშვილსაც კარგად  დავხვდი. მერე რა, რომ დავდივარ ამ შეხვდრებზე, ვინმეს ვეუბნები რომ სამსახურიდან გამიშვეს და უკან დაბრუნებას ვთხოვ? მათ არც კი იციან, რომ მე  აღარ ვმუშაობ. მე როგორც დუისის რიგითი მკვიდრი, ისე ვხვდები  მინისტრებს. ისე, ღარიბაშვილს კი ვუთხარი, რომ მის სიმამრთან კარგი ურთიერთობა მქონდა , მაგრამ არ ვაგრძნობინე რომ დღეს უსამსახუროდ ვარ დარჩენილი.

_ საკრებულოს თავმჯდომარის მოადგილეობიდან ახლახანს გაგათავისუფლეს. რა გეგმები გაქვთ?

_ შემომთავაზეს თანამდებობა, მაგრამ ჯერჯერობით ვისვენებ,  არ გამოვრიცხავ რომ დავთანხმდე.

_ რა თანამდებობა შემოგთავაზეს?

_  არა ბოლომდეც არ შემოუთავზებიათ, უფრო სწორედ მითხრეს, ჯერ მოიცადეო.

_ მოსახლეობას თქვენს დაბრუნებაზე როგორი რეაქცია ექნება, თქვენ ხომ ნაციონალური მოძრაობის აქტიური მხარდამჭერი იყავით ხეობაში?

_ ვის ეწყინება ჩემი მოსვლა?  “ქართულ ოცნებას” თუ ეწყინება, რომლებიც დღეს თანამდებობებს ვერ იყოფენ. ნაციონალი იყავიო, რომ მეკითხებით, ვინ დამიტერორებია, ვინ ვაიძულე ხმა “ნაციონალებს” მიეციო?  ლაფანყურის ამბავი  რომ მოხდა, მე განვუცხადე იმათ, რომ კი მე თქვენი გუნდის წევრი ვარ,თქვენს მთავრობას წარმოვადგენ, მაგრამ სოფლებში ვერ გავალ და ხალხს ვერ მოვუწოდებ რომ ხმა ნაციონალურ მოძრაობას მისცენ. თქვენ ისეთი რამე გააკეთეთ, რომ ხალხი ხმას არ მოგცემთ-მეთქი. ჩემი ცხრა  აგიტატორი დავსვი და ვუთხარი, არც ერთი არ გახვიდეთ, მოითმინეთ, ასეთი ახალგაზრდები დაგვიხოცეს და მოსახლეობა თავში რაღაცას ჩაგარტყამთ-მეთქი.

_ ლაფანყურის მერე თქვენი კოორდინატორები უბნებზე აღარ დადიოდნენ?

_ არა, როგორ არ დადიოდნენ, მაგრამ ერთი კვირა გაჩერებულები იყვნენ. მერე კი გავიდნენ, მაგრამ ხმების მოტანა კი არ ევალებოდათ, უბრალოდ, ფიქტიურად დადიოდნენ. გინდა თუ არა ხმა მიეცით ნაციონალებსო, არ უთქვამთ ხალხისთვის.

_ ლაფანყურის სპეცოპერაციის შემდეგ მაინც ნაციონალურ მოძრაობაში დარჩით.

_ ეს ამბავი ძალიან მეწყინა, მაგრამ აქ ზოგიერთებს ძალიან გაეხარდათ, იმიტომ რომ პოლიტიკური ქულების მოპოვების იმედი გაუჩნდათ, ახალგზრდა ბიჭების ჩახოცვა გაუხარდათ, ეხლა გავიმარჯვებთ არჩევნებშიო.მე თვითონ წავასწარი სამ პიროვნებას, ამას რომ ლაპარაკობდნენ.

_ თქვენ არ იცოდით, ხეობაში რა ხდებოდა და რა მზადდებოდა?

_ მე ამ საქმეებში არ ვერეოდი, როგორც ეხლა გაირკვა,  ვინც ჩვენთან  ახლოს იყო, თურმე ის ხალხი ყოფილა ამ ამბავში გარეული.

პანკისელები ამბობენ, რომ არ მოსწონთ მინისტრების მხრიდან მათი რჩეული დეპუტატის იგნორირება.

“ჩვენ საკუთარი ოჯახების, შვილების უსაფრთხოება დავაყენეთ ეჭვქვეშ იმისათვის რომ ზვიადაურს გაემარჯვა და დღეს ის არსად ჩანს. მინისტრები ისე ჩამოდიან ხეობაში, რომ დეპუტატი საქმის კურსში არ არის. არც ჩვენ , “ქართული ოცნების” აქტივისტებს გვეძლევა შეხვედრებზე დასწრების საშუალება.  რბილად რომ ვთქვათ, გაკვირვებულები ვართ.” _ ამბობს  დუისის ერთ-ერთი მკვიდრი  “გურია ნიუსთან” საუბარში.