მიმდინარე წელს, ბათუმის ბიუჯეტი 202 მილიონს შეადგენდა, 2013 წელს კი 87 მილიონი ლარია. მომავალ წელს ქალაქის დაფინანსება 125 მილიონამდე შემცირდა. ბათუმის მერის განცხადებით, ბიუჯეტის 75% ინფრასტრუქტურულ დაფინანსებაზე მოდიოდა. ქალაქის პირველი პირის თქმით, ბიუჯეტის პროექტში ვერ მოხვდა 15 ქუჩის რეაბილიტაცია, ორი საბავშვო ბაღისა და ანგისის დასახლებაში სამედიცინო დახმარების ცენტრის მშენებლობა. ასევე, ე. წ. ჭაობის დასახლებაში სანიაღვრე სისტემების და ჟილინგის არხის კაპიტალური რეაბილიტაცია.
მერის განცხადებით, ქალაქი ვეღარც მუნიციპალურ ავტობუსებს შეიძენს.
მერია ვერ განახორციელებს სოციალური პროგრამების ნაწილსაც. ურეხის დასახლებაში დროებითი თავშესაფარის და ორი სოციალური სახლის მშენებლობაც შეჩერდება.
“სტატისტიკური გამოთვლებით, ზემოაღნიშნული პროექტების შეჩერება პირდაპირ იწვევს ახალი სამუშაო ადგილების დაკარგვას. ჩვენი გათვლებით, დასახელებულ პროექტებზე პირდაპირ და ირიბად უნდა დასაქმებულიყო ჩვენი ქალაქის 5000 მკვიდრი, რაც დაახლოებით, 2000 მოქალაქის კეთილდღეობაზე აისახებოდა,” _ აცხადებენ ბათუმის მერიაში.
ქალაქის თვითმმართველობა ცენტრალურ და ავტონომიური რესპუბლიკის მთავრობას თხოვს, ზემოთ აღნიშნული პროექტების მნიშვნელობა გაითვალისწინონ და ხელი არ შეუშალონ ბათუმის სოციალურ-ეკონომიკურ განვითარებას.
