_ “დაიჭირეს გვარამია, რომელიც სახელმწიფო სამსახურში ყოფნისას კორუფციასთან ერთ-ერთი მთავარი მებრძოლი იყო, მერე წავიდა, საუკეთესო უცხოური განათლება მიიღო და დაბრუნდა საკუთარი ქვეყნის სამსახურში. ახლა დაიჭირეს მართლა ოროსნებმა, რომლებსაც ორი წიგნიც არ აქვთ წაკითხული და მარტო დოლარის თვლა იციან. დაიჭირეს დამენია, რომელიც ერთ-ერთი ყველაზე პატიოსანი სახელმწიფო მოხელეა საქართველოში, ვინც მე ცხოვრებაში მინახავს. მას საერთოდ არ აინტერესებდა პირადი საკითხები. ესაა სამართლიანობა, რისი აღდგენისკენაც ჩვენ მოგვიწოდებდნენ? ხშირად ამბობენ, რომ “ნაციონალური მოძრაობის” მთავრობის დროსაც იჭერდნენ ხალხს. ჯერ ერთი, ციფრებს და რაოდენობას შეხედეთ. საქართველო პატარა ქვეყანაა და ამ რაოდენობის დაპატიმრებები აქ ყველაზე რთულ ეპოქაშიც კი არ ყოფილა. როდესაც “ვარდების რევოლუციის” შემდეგ დაიჭირეს ყოფილი ენერგეტიკის მინისტრი, იმ ადამიანმა ჩააბნელა საქართველო და ფულს აკეთებდა იმაზე, რომ საქართველოში არ ყოფილიყო დენი, ახლა კი დაიჭირეს ალეკო ხეთაგური, რომლის გამოც საქართველოში დენია, რომლის გამოც ბიუჯეტი 11-ჯერ გაიზარდა. განსხვავება აღარაა მასსა და საქართველოს დამბნელებელსა და ფულის მომპარავს შორის?”, – განაცხადა სააკაშვილმა.
პრეზიდენტის თქმით, ამ ყველაფრის შედეგი ხალხზე აისახება:
_ “მომპარავი გამოდის ციხიდან, კორუმპირებული ზის კაბინეტში და იჭერენ მას, ვინც ებრძოდა კორუფციას და კრიმინალს. თქვენ გგონიათ, ამას ყველაფერს ფასი არ აქვს ჩვენი ხალხისთვის და არ მოჰყვება შედეგები? შედეგი მოყვება და უკვე მოჰყვა კიდეც _ რუსთავში გზის, პარკის და სპორტის სასახლის მშენებლობა გაჩერებულია. აჭარაში ყველა სოციალური პროგრამა შეაჩერეს. გასაგებია, რომ აჭარაზე განსაკუთრებულია შურისძიების მოტივაციაა, გამოიტანეს დასკვნა, რომ ანბანის კოშკი და უნივერსიტეტის შენობა დასაშლელია. ეს ხალხი საერთოდ სხვა, პარალელურ სამყაროში არსებობდა, სად იზრდებოდა, რა ფასეულობებით სუნთქავდა”, – თქვა მიხეილ სააკაშვილმა.
პრეზიდენტი, გუშინ, ქუთაისში განვითარებულ მოვლენებსაც შეეხო და აღნიშნა, რომ პოლიციელებს სპეციალური დავალება ჰქონდათ მიღებული:
_ ერთადერთი არჩევნების შემდეგ, რაც არის გასახარებელი არის ის, რომ ძალიან ბევრი ღირსეული ადამიანი აღმოჩნდა, რომელიც ღირსეულად უძლებს ზეწოლას. გუშინ შეხვედრა მქონდა ქუთაისის საკრებულოში, სადაც პირიქით “ნაციონალურ მოძრაობაში” გადავიდა ხალხი. ამ შემთხვევაში მე ვლაპარაკობ როგორც ინსტიტუტების გარანტორი და არა როგორც “ნაციონალური მოძრაობის” ლიდერი. ის რაც ხდება, ეს არის ზეწოლა ინსტიტუტებზე. ძალიან მეწყინა ქუთაისში. “ფეისბუქზე” ბევრ წერილს ვიღებ, რომ არ იყვნენ ის ხალხი ქუთაისელები და არ მწყენოდა. ყველაზე კარგად ვიცი, ვინც იყვნენ ის საოცრებები ვინც იქ იყვნენ შეკრებილები. პოლიციელები სულ ბოდიშს იხდიდნენ, რადგან დილიდან მიიღეს ინსტრუქცია, რომ არ გაკარებოდნენ სიტუაციას და მიეცათ საშუალება სუბიექტებისთვის და ერთი კონკრეტული პარტიის აქტივისტებისთვის, რომ რაღაცა გაეკეთებინათ პრეზიდენტისთვის, – თქვა სააკაშვილმა.
მისივე განმარტებით, მას დაცვა არ სჭირდება და მაინც მიაღწევენ იმას, რომ “საქართველოში აღდგება კანონიერება და წესრიგი”.
_ “აქ არ არის მარტო საუბარი ცალკეულ პარტიის განადგურება-არგანადგურებაზე. რამდენი გეგმებიც არ უნდა დააწყონ და რამდენი ბულდოზერიც არ უნდა მომართონ, ვერავინ ვერ გაანადგურებს ჩვენს მიერ აშენებულ შენობებს. იმდენი ავაშენეთ, რომ პრემიერ-მინისტრს არ ეყოფა მომავალი 50 წელი, რომ ჩვენი აშენებული მიწასთან გაასწოროს, როგორც იმუქრება. მთავარი ჩვენ რაც შევქმენით არის ის, რომ შევქმენით ქართული სახელმწიფოებრიობა, დემოკრატიული ინსტიტუტები, ქართული ჯარი, ქართული პოლიცია”, – დასძინა სააკაშვილმა.
