ლაითურის ციხის მშენებლობა, რომელსაც ყოფილი ხელისუფლება 4 000 პატიმრისთვის აშენებდა, თავდაპირველად 2007 წელს დაიწყო, შემდეგ გარკვეული დროით შეჩერებული იყო და 2012 წლის ზაფხულში, წინასაარჩევნოდ ისევ განახლდა. თუმცა, როგორც მუშები აცხადებენ, სამშენებლო კომპანიას სახელფასო დავალიანება აქვს და მათ, რამდენიმე თვეა, კუთვნილი თანხა არ აუღიათ.
ლაითურის ციხის მშენებლობას, თავდაცვის სამინისტროს ბაზაზე შექმნილი, სამშენებლო კომპანია “მშენებელი 2011” აწარმოებს.
ომარ ცქვიტიშვილი, მუშა: _ ელემენტარულად, ყურადღებას არ გვაქცევენ. აქ მუშაობს ოთხი ბრიგადა და დღეს ყველა შეკრებილია, დაახლოებით, 120 კაცი. ვითხოვთ ხელფასს, რაც გვეკუთვნის. კი, ბატონო, გასაგებია, მოვიდა ახალი მთავრობა, მაგრამ სამი თვე გადის და უკეთესობას ვერ ვამჩნევთ. ჩვენდა სასიკეთოდ რა კეთდება, ვართ ისევ ისეთ მდგომარეობაში, ისევ უხელფასოდ. გამოვედით იმიტომ, რომ მივიღოთ ჩვენი კუთვნილი ხელფასი. დღეს, როცა გაიგეს, რომ აქციას ვაპირებდით, დაგვპირდნენ, ხელფასებს იმ კვირაში აუცილებლად დავარიგებთო. ველოდებით. ასე გვაჩერებენ ამდენი ხანია და ჩვენც ოჯახები გვყავს სარჩენი. ასე გვითხრეს, ფული ჩამორიცხულია, გადარიცხული აქვს სამშენებლო კომპანიას და იმ კვირაში იქნება თანხაო. თუ არ მოგვცემენ, მივმართავთ სხვა ზომებს.
თემურ მახარაძე, მუშა: _ მოვითხოვთ ჩვენი ნამუშევრის ანაზღაურებას, რა შრომა გვაქვს გაწეული ამაზე, ეს ხომ ყველამ არ იცის. წარმოიდგინეთ, 100-150 მეტრ მანძილზე, არმატურა, რომელიც ძალიან მძიმეა და 30-35 კილოგრამს იწონის, სულ ზურგით გვაქვს ნათრევი და ასე მიდიოდა მშენებლობა. დავალება, რომელიც ჩვენ მოგვცეს, შევასრულეთ. ოქტომბრის ბოლოს უნდა ყოფილიყო ხელფასი, მერე ნოემბრისთვის დაგვპირდნენ და გვპირდებიან ახლაც, თუმცა, უშედეგოდ. გვიხაროდა, რომ ლაითურის მცხოვრებლები დასაქმდებოდნენ და ანაზღაურებაც გვექნებოდა, სანამდე უნდა ვიყოთ ასე? ამ ქვეყანაში როდის გაუმჯობესდება სოციალური ფონი? წარმოიდგინეთ უმუშევარი ადამიანი, რომელსაც არანაირი შემოსავალი არ აქვს და დამოკიდებულია საკუთარ ფიზიკური შრომაზე და იმასაც რომ ვერ აიღებს ოთხი თვის მანძილზე, ეს სამართალია?! როდის უნდა ამოვისუნთქოთ? ჩვენს ოჯახებს, შვილებს და შვილიშვილებს რა პასუხი უნდა გავცეთ?
_ თითოეულს რა რაოდენობის თანხა გაქვთ ასაღები?
_ მე, პირადად, 600 ლარი, სხვებს _ 800, 1000 ლარი…
ბარნაბ მგელაძე, სამუშაოთა მწარმოებელი: _ ამ ობიექტის მშენებლობა დაიწყო 2007 წელს, შემდეგ შეჩერდა და ისევ განახლდა 2012 წლის ივნისში. ძირითადი სამუშაოებია პირველ სართულზე რკინა-ბეტონის ფილების ჩასმა. ნოემბრის ბოლოს, რაკი ხელფასი არ იქნა გადახდილი, მუშა-მომსახურე პერსონალმა შეწყვიტა მუშაობა. დღეს დამირეკა ერთ-ერთმა ხელმძღვანელმა და განაცხადა, რომ იმ კვირაში ხელფასებს დავარიგებთო. დაახლოებით, 120 კაცს აქვს სახელფასო დავალიანება. ეს პრობლემა მალე გადაიჭრება.
