“ბოლო ორი წლის განმავლობაში 10 000-მდე მასწავლებელია გათავისუფლებული”

სემინარი ბოლო ორი წლის მოვლენებს შეეხებოდა. როგორც გამომსვლელებმა განაცხადეს, ძველმა ხელისუფლებამ, პედაგოგთა პროფკავშირის წინააღმდეგ ბრძოლაში, მის ხელთ არსებული ყველა რესურსი გამოიყენა: პროვოკაციები, ორგანიზაციის საქმიანობის ხელის შეშლისთვის ფინანსური ბლოკადა, მასწავლებელთა იძულებით, სამსახურიდან გაშვების მუქარით გაყვანა, პედაგოგთა დაშინება.

საქართველოს პედაგოგთა და მეცნიერთა თავისუფალი პროფკავშირის პრეზიდენტი მაია კობახიძე:

საქართველოს პედაგოგთა და მეცნიერთა თავისუფალი პროფკავშირის სახელით ჩავატარებთ პროფკავშირულ სემინარს, მოწვეული გვყავს გურიის რეგიონის მასწავლებლები, ჩვენთან არიან აგრეთვე გურიის რეგიონიდან რაიონული ორგანიზაციის თავმჯდომარეები. ჩვენი ძირითადი მიზანი არის ორგანიზაციის გურიის რეგიონში აღორძინება და განვითარება. საქართველოს პედაგოგთა და მეცნიერთა თავისუფალმა პროფკავშირმა გამოიარა ზეწოლა წინა ხელისუფლების მხრიდან, მასწავლებლებს ექმნებოდათ პრობლემები,  მათ ეკრძალებოდათ კონსტიტუციით მინიჭებული უფლების გამოყენება, გაერთიანების თავისუფლება, პროფკავშირობის წევრობა, აშინებდნენ სამსახურიდან გაშვებით. ახლა თავიდან დავიწყეთ შეხვედრები, რადგან განვითარდეს ეს ორგანიზაცია, დავიცვათ პედაგოგთა უფლებები, უკანასკნელი ორი წლის განმავლობაში პედაგოგებმა თავად დაინახეს, რომ ყველაზე მეტად დაზრალდნენ თვითონ, უხეშად ირღვეოდა პედაგოგთა უფლებები.

ასევე, ჩვენ დღეს გავაცნობთ მასწავლებლებს საერთაშორისო პროექტს. გავაცნობთ ამ პროექტის ძირითად მიზნებს და მიმართულებებს. პროექტი დავიწყეთ ნოემბრის თვეში, პროექტში მონაწილეობს ოთხი ქვეყანა, ეს არის საქართველო, ზიმბაბვე, ეგვიპტე, ჰონდურასი. ეს ის ქვეყნებია, უკანასკნელი ოთხი წლის განმავლობაში, სადაც განსაკუთრებით შეიმჩნეოდა ზეწოლა ხელისუფლებისგან პროფკავშირებზე და ჩარევა მათ საქმიანობაში.

ორგანიზაციის ძირითადი მიზანია, გაძლიერება, განვითარება, რათა ჩვენს ქვეყანაში იყოს პედაგოგთა გაერთიანება  ძლიერი, ეფექტური, თითოეული წევრი უნდა ჩაერთოს მისი უფლებების დაცვაში, მათი აქტივობით შევძლებთ, რომ გაუმჯობესდეს პედაგოგთა შრომითი, ეკონომიკური და სამართლებრივი უფლებები.

მასწავლებლებმა ძალიან დიდი პროტესტი გამოთქვეს პროფკავშირის უმოქმედობასთან დაკავშირებით, ვინაიდან დაგვიხურეს ყველა კარი განათლების სამინისტროსი, არ არსებობდა სოციალური დიალოგი, დაგვიხურეს სკოლის კარები, აგვიკრძალეს პედაგოგებთან შეხვედრები. ჩვენ უნდა დაგვეცვა გათავისუფლებული მასწავლებლები სასამართლოში,

ჩვენ მხარს გვიჭერდნენ საერთაშორისო ორგანიზაციები, განსაკუთრებით აღვნიშნავ ამერიკის ელჩის უპრეცედენტო მხარდაჭერას.

უკანასკნელი ორი წლის განმავლობაში გათავისუფლებული 10 000 – მდე მასწავლებელი, ჩვენ არ შეგვიწყვიტავს მუშაობა, მიუხედავად მძიმე მდგომარეობისა, ეს გათავისუფლებები სხვადასხვა მიზეზით მოხდა, ერთი _ ეს იყო პოლიტიკური ნიშნით და მეორე _ მანდატურის აქტით გათავისუფლებები, ასევე სკოლების რეორგანიზაცია  თუ ლიკვიდაციის შედეგად, მცირე საათობრივი დატვირთვის გამო და აქედან აბსოლუტურად ყველა იყო არაკანონიერი, არაობიექტური გათავისუფლებები. კი, ბატონო, სამინისტროს ჰქონდა რეორგანიზაცია- ლიკვიდაციის უფლება, მაგრამ ყველა გათავისუფლებული მასწავლებელის ბრძანებაში არის მითითებული შრომის კოდექსის 37-ე მუხლის დ(ქვე) პუნქტი, სადაც არ ჩანს რა მიზეზით გაათავისუფლეს პედაგოგი, ამიტომ სასამართლოებშიც გაგვიჭირდა პედაგოგების დაცვა, თუმცა, გავიმარჯვეთ ორი პედაგოგის შემთხვევაში და აღვადგინეთ, ახლა მიმდინარეობს ოთხი მასწავლებლის სასამართლო პროცესები სხვადასხვა ინსტანციებში, ხოლო ერთი პედაგოგის სარჩელი გავგზავნეთ სტრასბურგში სახელმწიფოს წინააღმდეგ.

ეკა კობახიძე,  საქართველოს პედაგოგთა და მეცნიერთა თავისუფალი პროფკავშირის გურიის კოორდინატორი, ოზურგეთის # საჯარო სკოლის პედაგოგი: ძალიან დიდი მნიშვნელობა აქვს დღეს, პროფკავშირების როლს დასაქმებულთა უფლებების დაცვაში და  მასწავლებლების პროფესიული გადამზადების და სერთიფიცირებისთვის. როცა ვსაუბრობთ პროფკავშირის აღდგენაზე და მისი როლის გაძლიერებაზე ამისთვის აუცილებელია პროკავშირის წევრების ჩართულობა, მიიღონ სათანადო, სწორი არჩევანი.

ძალიან დიდი მნიშვნელობა აქვს  კოორდინირებას. აუცილებლად უნდა იყოს მოწესრიგებული დამსაქმებელსა და დასაქმებულს შორის ურთიერთობა.