“ნიკა გვარამიას ამ ფორმით დაკავებით, ქვეყნის რეპუტაცია საგრძნობლად შეილახა”

ამასთან დაკავშირებით “გურია ნიუსი”  საქართველოს სახალო დამცველს უჩა ნანუაშვილს ესაუბრა.

_ ბატონო უჩა, თქვენ დაკავების შემდეგ  მოინახულეთ   ნიკა გვარამია. რა შეფასება მისცა მან მისი დაკავების ფაქტს?

_ მისი შეფასებით, ეს ყველაფერი უკავშირდებოდა მისი, როგორც ტელეკომპანიის დირექტორის საქმიანობას და იყო მედიის წინაღმდეგ განხორციელებული ქმედება.

_  თქვენ, როგორც სახალო დამცველი, როგორ აფასებთ ტელეკომპანის დირექტორის დაკავებას?

_ ნებისმიერ ქვეყანაში, როდესაც აკავებენ ნებისმიერი ტელეკომპანიის დირექტორს, რა თქმა უნდა, რა საქმე, რა მუხლი და სარჩულიც არ უნდა დაედოს საქმეს,  ჩნდება კითხვის ნიშნები. თუმცა, როგორც მე ვიცი და ამბობენ, ასევე გამოქვეყნდა მტკიცებულებების რაღაც ნაწილი. იმისთვის რომ გვქონდეს დეტალური ინფორმაცია, ჩვენ უკვე დავიწყეთ ამ მასალების გამოთხოვა, რომელიც უნდა იყოს შესწავლილი. ამის შემდეგ, შეიძლება ყველაფერს თავისი სახელი დავარქვათ. სანამ არ იქნება შესწავლილი, ასე პირდაპირ იმის განცხადება, რომ რაღაც მოხდა, ან რაღაც არ მოხდა, არ შეიძლება. მე ვერც უარვყოფ და ვერც დავადასტურებ, ჰქონდა თუ არა ადგილი რამე სახის გადაცომას.

_ როგორ ფიქრობთ ნიკა გვარამიასთვის აღკვეთ ღონისძიებად პატიმრობის შეფარდების გამოყენება აუცილებელი იყო?

_ შესაძლებელია, არ ყოფილიყო თავიდანვე გამოყენებული  აღკვეთის ღონისძიება, ან  არ ყოფილიყო გამოყენებული მათი დაკავება. შესაძლოა, აღძრულიყო საქმე, საგამოძიებო  ქმედებები  ჩატარებულიყო. ამისთვის არ იყო თუნდაც იმ ფორმის გამოყენება საჭირო, რამაც  ძალიან დიდი აჟიოტაჟი გამოიწვია. ქვეყნის რეპუტაცია საგრძნობლად  შეილახა. ეს ფაქტია, ამას ვერ გავექცევით.

– სასამართლომ ნიკა გვარამიას  გირაო შეუფარდა. თუ გირაოთი გაათავისუფლებდნენ, რატომ მოხდა მისი დაკავება?

_ იცით რა არის, გირაო შესაძლოა, დაკავების გარეშეც შეეფარდოთ. ნებისმიერ შემთხვევაში, შესაძლებელია დაპატიმრების, დაკავების გარეშე მოხდეს საგამოძიებო მოქმედებების წარმართვა, საქმის გამოძიება და გახსნა. თუ დადასტურდება და დადგინდება, რომ არის დანაშაულის ნიშნები, იმ წუთას უნდა მოხდეს  სასჯელის სახით თუნდაც აღკვეთი ღონისძიების გამოყენება. ცოტა  არ იყოს ეს ფაქტი აჩენს კითხვებს. თუ გირაოთი გათავისუფლდნენ, მაშინ რატომ მოხდა მათი დააკავება. ეს ნიშნავს, რომ რაღაცა ვერ არის თავის ადგილას. მე ვფიქრობ, რაღაც მყარი არგუმენტები არ იყო, ან იყო ნაჩქარევი გადაწყვეტილება მიღებული.  გაცნობიერების შემდეგ, რაღაცნაირად მიხვდნენ, რომ ეს უნდა შეცვლილიყო და ფაქტობრივად, ასეც არის.

­_ მთავარმა პროკურატურამ  ნიკა გვარამიასთან და სხვა ყოფილ მაღალჩინოსნებთან დაკავშირებით, მედიის საშუალებით გაავრცელა სატელეფონო ჩანაწერები, რომელზეც როგორც გაირკვა, არ არსებობს სასამართლო გადწყვეტილება. იმეორებს თუ არა ახალი ხელისუფლება წინა ხელისუფლების შეცდომებს ჩანაწერების გავრცელებასთან დაკავშირებით?

_ ჩვენ ვაპირებთ შევისწავლოთ, რამდენად კანონიერად ხდებოდა კონკრეტული ჩანაწერების მოპოვება და გამოქვეყნება. პრინციპში, თუ დადასტურდა, რომ ეს ნამდვილად  უკანონოდ ხდებოდა, რა თქმა უნდა, ეს არის უკან გადადგმული ნაბიჯი.  ფაქტობრივად, იმ პრაქტიკის გამეორება, რომელსაც ქვეყანაში ადგილი ჰქონდა წლების განმავლობაში.  რა თქმა უნდა, ნებისმიერ შემთხვევაში, ეს დასაგმობი იქნება.

უახლოეს დღეებში მექნება დეტალური ინფორმაცია, თუნდაც საიდან მოხდა ეს ჩანაწერები ერთ-ერთი ტელეკომპანიის ეთერში. დეტალებში გარკვევის შემდეგ, უფრო ნათლად შეგვიძლია განცხადებების გაკეთება. ჩვენი მოთხოვნები, იგივე რეკომენდაციები ჩამოყალიბდება დეტალური ინფორმაციის მიღების შემდეგ.