_ ბატონო გიორგი, თქვენს მიერ მომზადებულ ბრძანებას ვადა როდის ეწურებოდა?
_ ბრძანება, რომელიც სამინისტროში თავის დროზე მომზადდა პირადად ჩემი მომზადებულია. ბრძანების ძალის დაკარგვის თარიღად მითითებული იყო 2013 წლის 31 იანვარი. ჩემთვის ნამდვილად გაურკვეველია, როგორ აღმოჩნდა დოკუმენტზე, რომელიც სამინისტროშია შენახული 1 იანვარი დატანილი.
ამ ინფომრაციის შესახებ, ორი დღის წინ შევიტყვე. რამდენჯერმე გადავამოწმე საკუთარი ელექტრონული ფოსტა. იურიდიული დეპარტამენტის უფლებამოსილ თანამშრომელზე მქონდა გადაგზავნილი ბრძანების აქტი, სადაც ცალსახად ორივე მათგანზე ბრძანების ძალის დაკარგვის თარიღად მითითებული იყო 2013 წლის 31 იანვარი.
_ ამ საკითხთან დაკავშირებით ყოფილ მინისტრს გიორგი ტუღუშს თუ ესაუბრეთ?
_ ბოლო ორი დღის განმავლობაში ამ საკითხზე, რამდენჯერმე მქონდა გიორგისთანაც საუბარი. იგი ცალსახად ადასტურებს, რომ ხელი მოაწერა ბრძანებას, რომელშიც ძალადაკარგვის თარიღად მოხსენიებული იყო 31 იანვარი.
_ ე.წ. ,,მონიტორინგის საბჭოს” ძალადაკარგივს თარიღად 31 იანვარი რატომ გამოცხადდა?
_ ჩვენ, როდესაც ამ ვადის განსაზღვრაზე ვსაუბრობდოთ, 31 იანვრით შემოვიფარგლეთ, რადგან ამ პერიოდში პარლამენტს უნდა მოესწრო ,,პატიმრობის შესახე კოდექსში” ცვლილებების შეეტანა, რომლითაც ე.წ. ,,მონიტორინგის საბჭოს” ნამდვილ სტატუსს მისცემდა. ანუ, ის გახდებოდა მონიტორინგის ეფექტური ორგანო. სხვა შემთხვევაში სამინისტრო მოკლებული იყო შესაძლებლობას, დაერეგულირებინა ამ საბჭოს წევრების ქცევის წესი. მაგალითად: როგორ უნდა შესულიყვყნენ დაწესებულებებში, რა უფლებამოსილებები ჰქონდათ და ა.შ. აქედან გამომდინარე, თავის დროზე შევქმენით მონიტორინგთა საბჭო არა სამართლებრივი გაგებით, არამედ 51 ადამიანს მივეცით უფლება დამატებითი ნებართვის გარეშე 2013 წლის 31 იანვრამდე შესულიყვენენ სასჯელაღსრულების დაწესებულებებეში. ამას ადასტურებს, სასჯელასღსრულების სამინისტროს ვებგვერდზე განთავსებული განცხადება, რომელიც თავის დროზე გავრცელდა რელიზიის სახით. ეს განცხადება, პრესსამსახურმა სწორედ იმ ბრძანების საფუძველზე მოამზადა, რომელიც მაშინ იყო სამინისტროში. ჩემთვის ნადვილად გაურკვევლია და ახსნას ვერ ვუძებნი, როგორ აღმოჩნდა, ბრძანებაში 1 იანვრი. გულახდილად გითხრათ, ეს სამართლებრივადაც ნონსენსია. ლოგიკურია რაღაცის ვადისთვის რიცხვი 31 ჩაწერო, მაგრამ არც ერთ აქტში ვადად 1 იანვარს არავინ საზღვრავს… ან 31 დეკემბერს დაწერს, ან 31 იანვარს. ეს ბრძანება ელექტრონულად გავაკეთე და გავუგზავნე დეპარტამენტის თანამშრომლებს. შემდეგ ეს დოკუმენტი ავიდა გიორგისთან და გიორგიმ მოაწერა ხელი.
,,გურია ნიუსი” შეაგხსენებთ, რომ ე.წ. მონიტორინგის ჯგუფის ძალადაკარგვის თარიღად, სასჯელაღსრულების სამინისტროს მიერ დღეს გავრცელებული განცხადებით, 1 იანვარი იყო მითითებული. რამაც საზოგადოებაში გაურვევლობა გამოიწვია.
,,გურია ნიუსი” უცვლელად გთავაზობთ განცხადებას: ,,საზოგადოებრივი ინტერესიდან გამომდინარე, გ.ტუღუშის მიერ 2012 წლის 16 ოქტომბერით დათარიღებულ ბრძანებასთან დაკავშირებით, სასჯელაღსრულების, პრობაციისა და იურიდიული დახმარების საკითხთა სამინისტრო განმარტავს, რომ #148 ბრძანების საფუძველზე ციხეების საზოგადოებრივი მონიტორინგის ჯგუფს უფლებამოსილების ვადა ეწურება 2013 წლის 1 იანვარს.
ბრძანება ხელმოწერილია გ.ტუღუშის მიერ, რაც ცალსახად გამორიცხავს ნებისმიერ სპეკულაციას ბრძანების მოქმედების ვადებთან დაკავშირებით. (ბრძანების ორიგინალი შეგიძლიათ იხილოთ თანდართული ფაილის სახით)
რაც შეეხება მოსაზრებას, თითქოს სამინისტრო ზღუდავს ჟურნალისტების მონაწილეობას სასჯელაღსრულების ალტერნატიული მონიტორინგის მექანიზმის მონაწილეობაში, არ შეესაბამება სინამდვილეს. აღნიშნული გადაწყვეტილება მიღებული იქნა ხმათა უმრავლესობით, 22-23 დეკემბერს, გაეროს განვითარების პროექტის მხარდაჭერით გუდაურში გამართულ შეხვედრაზე, რომელსაც ესწრებოდნენ ადგილობრივი და საერთაშორისო არასამთავრობო ორგანიზაციების წარმომადგენლები, სადაც სასჯელაღსრულების, პრობაციისა და იურიდიული დახმარების სამინისტრო მხოლოდ მოდერატორის ფუნქციას ასრულებდა. ამავე შეხვედრაზე გადაწყდა მოქმედი ადვოკატების მონიტორინგში მონაწილების შეზღუდვის საკითხიც.
ალტერნატიული მონიტორინგის მექანიზმებთან დაკავშირებით შეხვედრების ორგანიზებით სამინისტრომ გამოხატა კეთილი ნება და აღნიშნული საკითხის დარეგულირება მიანდო სამოქალაქო სექტორს.”
პ.ს. ”გურია ნიუსი” გთავაზობთ გიორგი მშვენიერაძის მიერ საკუთარი ელექტრონული ფოსტით 2012 წლის 16 ოქტომბერს სასჯელაღსრულების სამინისტროს იურიდიული დეპარტამენტისადმი გადაგზავნილი ტექსტის ორიგინალს. ასევე გთავაზიბთ, დღეს სასჯელაღსრულების სამინისტროს ვებგვერდზე გავრცელებულ ბრძანებას, რომელზეც ხელს გიორგი ტუღუში აწერს. დოკუმენტი 2012 წლის 16 ოქტომბრითაა დათარიღებული.
