ჯერ სოფლის მეურნეობის სამმართველოს შენობა, შემდეგ აგრარული ბაზარი, მერე ისევ ბაზარი, მთელი თავისი ავლადიდებით, შთანთქა ცეცხლმა. საფუძვლიანად არსებობდა და დღესაც არსებობს უამრავი საეჭვო ვერსია, თუმცა, არავის არაფერი გამოუძიებია. თითქოს მიყუჩებულ სახანძრო სერიალს, მორიგი გაელვებით, კიდევ ერთი ფაქტი დაემატა _ ამჯერად, მთლიანად დაიწვა მუნიციპალიტეტის კულტურის სახლი და სრულად განადგურდა ინვენტარი, დამწვარია დოკუმენტაცია. ფაქტის გარშემო გაცხარებული მითქმა-მოთქმაა _ ამბობენ, რომ შენობა განზრახ დაწვეს. ერთ-ერთი ვერსიით, ამ ადგილზე ბენზინგასამართი სადგური უნდა აშენდეს. ამბობენ იმასაც, რომ ღონისძიებებისთვის ძალიან დიდი თანხა იხარჯებოდა და კვალის წაშლა იყო საჭირო. აგრეთვე, აქცენტს აკეთებენ გამქრალ კომპიუტერებზე. აღსანიშნავია, რომ კულტურის სახლს ხანძარი 2010 წლის 31 დეკემბერს, დამდეგი ახალი წლის ღამითაც გაუჩნდა.(?) თუმცა, მაშინ მეხანძრეებმა დროულად მოახერხეს ხანძრის ლიკვიდაცია და მხოლოდ ერთი ოთახი დაზიანდა. გამოძიება მალევე დაიწყო, თუმცა ჩვენი ინფორმაციით, დღემდე წინა ხანძრის გამომწვევი მიზეზებიც კი არ დადგენილა. როგორც “გურია ნიუსთან” საუბარში შემთხვევის ადგილზე მყოფმა რამდენიმე წყარომ თქვა, არსებობს საფუძვლიანი ეჭვი, რომ ხანძარი ხელოვნურად გაჩნდა. აღსანიშნავია ისიც, რომ სახანძო სამსახურში შეტყობინება გვიან შევიდა. რა თქმა უნდა, ხანძრის გამომწვევი მიზეზის დადგენა გამოძიების პრეროგატივაა და “გურია ნიუსი” არაფერს არ ამტკიცებს _ მკითხველს ვთავაზობთ ძირითად ამონარიდს, როგორც კულტურის სახლის თანამშრომელთა, ისე თვითმხილველთა მონათხრობიდან. დავძენთ მხოლოდ, რომ დღეს ოზურგეთში ღიად საუბრობენ აქაური ხანძრების განზრახულობაზე და ამბობენ, ელქსელები რომ არ არსებობდეს, ნეტავ, “ჭიაკოკონების” სერიალის შემოქმედად ვის ან რას დაასახელებდნენო?
ოზურგეთის მუნიციპალიტეტის კულტურის სახლს ხანძარი 5 მარტს, გვიან ღამით, დაახლოებით, 23 საათზე გაუჩნდა. ხანძრის შედეგად, მთლიანად განადგურდა შენობის ორივე სართული. როგორც “გურია ნიუსს” ოზურგეთის ხანძარსაწინააღმდეგო სამსახურში უთხრეს, ხანძრის შესახებ შეტყობინება 23:26 წუთზე პოლიციიდან მიიღეს. შემთხვევის ადგილზე 4 ბრიგადა მუშაობდა, თუმცა, ხანძრის სიძლიერიდან გამომდინარე, მათ დამხმარე ბრიგადები ლანჩხუთის, ჩოხატაურის და ქობულეთის მუნიციპალიტეტებიდანაც გამოიძახეს.
_ მიუხედავად იმისა, რომ ჩვენმა მეხანძრეებმა ხანძრის ლიკვიდაციისთვის ყველაფერი იღონეს, სამწუხაროდ, ვერაფრის გადარჩენა ვერ მოხერხდა, _ გვითხრეს სახანძრო სამსახურში.
ოზურგეთის მუნიციპალიტეტის კულტურის სახლის დირექტორი კობა ბანძელაძე “გურია ნიუსთან” საუბარში ვერსიებზე არ საუბრობს: _ არანაირი ვერსია ამ საქმესთან დაკავშირებით არ მაქვს. როცა დამირეკეს, დაწყებული იქნებოდა ღამის 12 საათი. მითხრეს, რომ შენობა ცეცხლში იყო გახვეული, ჩამოვედი და აი, ყველა ხედავთ, რაც მოხდა.
_ ბატონო კობა, რატომ ვერ მოხერხდა ცეცხლის ლოკალიზება დროულად, მით უმეტეს, შენობა ქალაქის ცენტრში მდებარეობს და აქვეა სახანძრო სამსახურიც?
_ ვერ გეტყვით, რატომ ვერ მოხერხდა, თუნდაც, რაღაც ნაწილის გადარჩენაც კი. შესაბამისი სამსახური მობილიზებული იყო და თითოეული მეხანძრე სიცოცხლის ფასად მოქმედებდა. არაფერი არ არის გადარჩენილი _ ყველაფერი განადგურებულია. არ ვიცი, ცეცხლი რა მიზეზით გაჩნდა, ალბათ, ამას შესაბამისი ორგანოები დაადგენენ. კულტურის სახლში მუშაობდა ექვსი მოქმედი ანსამბლი, რომელიც ბიუჯეტიდან ფინანსდებოდა. გვქონდა მასალები, ინვენტარი, ჩოხები, რაც კულტურის სამსახურს სჭირდებოდა, ყველაფერი იყო. ფართს, ვფიქრობთ, გამოგვიყოფენ და ჩვეულებრივ რიტმში გავაგრძელებთ მუშაობას, _ ამბობს ბანძელაძე.
მოსწავლე ახალგაზრდობის სახლის დირექტორი მაია ნიკოლაიშვილი: _ როცა 31 დეკემბერს ცეცხლი გაჩნდა, მაშინ ვთქვით, რომ ალბათ, ელექტროგაყვანილობის მიზეზით მოხდა. თუმცა, მას შემდეგ არაფერი გარკვეულა.
იმ დღეს 11-ის ნახევარზე დამირეკა თანამშრომელმა, მისი სახლიდან ცეცხლი კარგად ჩანდა. მე რომ გამოვიხედე ფანჯრიდან, ცეცხლი საკმაოდ მაღლა იყო ასული. გამოვიქეცით მე და ჩემი მეუღლე, მაგრამ ვერაფერი შევძელით. მეზობლის სახლსაც კინაღამ წაეკიდა ცეცხლი. შესანიშნავი ტექნიკა დაიწვა და განადგურდა. დიდი იმედი მაქვს ჩვენი ხელმძღვანელობის, რომლებიც ყოველთვის ზრუნავდნენ მოსწავლე-ახალგაზრდობის სახლის გადასარჩენად. თუ იქნება მათი კეთილი ნება, ალბათ, სადღაც მიგვიჩენენ ბინას, _ ამბობს მაია ნიკოლაიშვილი და აღნიშნავს, რომ მომხდართან დაკავშირებით ჭორები და ვერსიები აუცილებლად იქნება.
ოზურგეთის მუნიციპალიტეტის კულტურის სახლის დარაჯი ოთარ ჩიკაშუა “გურია ნიუსთან” საუბარში ამბობს, რომ, როცა ცეცხლი გაჩნდა, ადგილზე არ იმყოფებოდა: _ მე ოთახების გასაღები არ მაქვს, შევდივარ იქ, სადაც ვათევ ღამეს. არ ვიცი, რა მოხდა, ან რამდენჯერ უნდა მოხდეს ეს? ერთხელ პირველ სართულზე გაჩნდა ხანძარი. მაშინ დროზე მოუსწრეს, გადაარჩინეს. ახლა ჭერიდან გაჩნდა. მანამდე, 10 საათისთვის მამაჩემმა დაათვალიერა, მოიარა ყველაფერი.
